top of page
Search

018 臺灣經濟奇蹟ê掖種者-張漢裕

咱攏知影臺灣 ê 經濟奇蹟,毋過真濟人毋知影台灣 ê 經濟奇蹟是由張漢裕教授掖種--出-來--ê。今仔日咱 tō beh 來講張漢裕教授是按怎替「台灣錢淹腳目」拍--落-來ê 穩健基礎。 看不懂台文請按這裡用podcast來聽

文稿編寫: 杜荷洲、王宇莉、葉信鴻、李以如 校稿: 杜荷洲、葉信鴻

張漢裕教授1913年 tī 台中東勢 ê 客家庄出世,東勢公學校畢業以後,伊就去台灣人開--ê 好學校台中一中就學。猶袂讀完一中,就跳級去到台灣高等學校。這ê學校學風自由,以”人”為本 ê 教育方針,tī 這二年,伊佇tsia看文學冊、小說、看電影、開講、踅冊店,探討人生 ê 未來中渡過日子,mā 決定了以後欲讀經濟,來解決社會ê問題。伊講這二年是伊一生中 ê 黃金時間。


1934年,張漢裕考入去東京帝國大學經濟學部,佇遮拄著恩師矢內原忠雄教授,kah 伊研修殖民政策 ê 理倫,有名 ê 『帝國主義下ê 台灣』是老師 ê代表作。張漢裕用一年半ê時間kah老師鬥陣討論、發表,伊佇老師遐認捌『知之為知之,不知為不知』ê 治學態度。矢內原引導學生佇討論中,欲按怎去揣資料、讀冊、思考。這種治學方法開起了張漢裕ê研究生涯之門。


1926年ê時,矢內原捌去台灣訪問50工,這擺旅行,是由台灣ê民主鬥士蔡培火先生擔任導遊kah通譯--ê。伊轉去到日本了後,寫了一本『帝國主義下ê 台灣』ê 冊,以知識份子ê良知直言,批評日本政府殖民政策 ê 不當所在,甚至預言 nā-sī 繼續不義橫行,日本應該會滅亡--ê。這種 ê 言行引起東京帝大教授 ê 指責 kap 議論,1937年 suah 去 hōo 東京帝大辭去教授 ê 頭路。張漢裕另外一位恩師是大塚久雄教授,伊上出名 ê 是重商主義 ê 理論,這對張漢裕一生 ê 研究影響誠大。


1939年,經過矢內原老師 ê 紹介,張漢裕 kap 蔡培火 ê 第三个查某囝蔡婌姈小姐結婚。蔡培火 mā 是矢內原老師40年深交 ê 朋友。1940年,張漢裕 tī 東京帝大擔任兩年 ê 助教,1943年 koh tī 東洋文化研究所擔任兩年 ê 副研究員。1946年第二次世界大戰後,台灣百業蕭條,急需復原。恢復了原職 ê 矢內原系主任建議 i 愛轉去臺灣參與建設,貢獻所學。1947年,張漢裕應用兩位恩師 ê 學術理論,提出博士論文「重商主義 kap 殖民地政策」,經過全體評審教授一致 ê 通過,得 tio̍h 東京帝大經濟學博士學位,這是台灣人 ê 第一位、mā 是殖民地出生-- ê 第一ê 人得 tio̍h-- ê 地位。


1948年,擔任台灣大學教授後,mā 繼續認真研究,攏總發表成百篇 ê 文章,十外本著作,翻譯了七本經濟冊。I tī 台灣經濟史、西洋經濟史、職業倫理 kah 經濟思想 ê 領域,攏是開創者,到今,權威 ê 地位猶無人會當代替--ê。


1970年升任為台大經濟系系主任,當時李登輝提 tio̍h 康乃爾農業經濟博士轉來台灣 tshuē 頭路。各學系攏講李登輝 ê 華語講了無好,而且 i 有參加過讀書會 ê 黑資料,攏毋敢共採用。張漢裕系主任傳承 tio̍h 矢內原老師 ê 道德勇氣,聘請李登輝博士為經濟系 ê 兼任教授。Tī 彼時 ê 政治氛圍,張系主任表現--出-來 ê 知識分子 ê 勇氣,使人欽佩。


1970年,張老師講西方國家毋管是勞工、技師、經理、企業主攏有敬業、誠實 kah 樂業 ê 精神。企業主樂意捐獻所得設立公益法人,mā 會承擔納稅金的責任。I 不時仔會強調,國民 lú 敬業,國家 ê 工商業 tō-ê lú 發展,國民 ê 收入 mā-ē khah 懸。這種先進 ê 企業理念,張教授 tī 1970年代 tō 積極鼓吹 kā提出來。


有學生問老師 kóng:「欲按怎讀經濟學--neh?」張老師說:「提大作來讀。經典 ê 大作愛用一、兩年 ê 時間,逐工不斷仔念,tō 親像唸經仝款。愛有恆心毅力,逐工做,逐工想。尤其是精神層次 ê 理論,拄開始 tō kah 修行仝款,真正艱苦,m̄-koh 經過時間 ê 磨練,最後 tō ē-tàng 享受 tio̍h 甜蜜 ê 果實。」

第13屆吳三連獎 經濟學類-張漢裕 圖片來源:吳三連基金會

晚年,張老師致力 tī 職業倫理 ê 推廣,晨鐘暮鼓,一再交代,tī 追求快速經濟成長 ê 同時,m̄-thang 袂記得職業倫理是工商發達 ê 重要因素。張漢裕教授的著作 kah 治學理念,對台灣 ê 經濟 kah 社會發展有 tsiânn 深 ê 影響, hōo 學界尊稱做經濟學 ê 泰斗。張教授 tī 台大 tō 開過18 種 ê 課程,作育英才無數,52年來 ê 產業、官方、學術各界 ê 引導面相當 ê 廣闊。tī 四十年內,做台灣經濟決策 ê 官員,lóng 是老師 ê 門生子弟,受到老師學術上 ê 薰陶,依照老師經濟哲學 ê 理念,kā 台灣𤆬入去已開發國家 ê 行列。張漢裕教授 ē-sái 講是臺灣經濟奇蹟 ê 掖種人。

多謝各位收聽, lán 後禮拜二 tsiah koh 來坐。



33 views0 comments

Comentários


bottom of page