top of page
Search

027 培養音樂人才ê教育家 陳泗治 校長

你感覺佗一種樂器演奏出來 ê 音樂上會表現出台灣 ê 鄉土風味?咱 kin-á-jit 故事 ê 主角--陳泗治校長認為是鋼琴!伊創作「台灣素描」等等精彩 ê 鋼琴曲描述台灣 ê 美麗風光,koh hőng 收錄到國際標準 ê 鋼琴曲集,kah 貝多芬,蕭邦 ê 作品並列,誠是台灣之光!


m̄-niā án-ne,伊 ê 一生,對台灣音樂和音樂教育 mā有真濟真重要 ê 貢獻。咱 tsit-má tō 作伙來聽培養音樂人才ê教育家--陳泗治校長 ê 故事!

看不懂台文:點這裡聽李講古我來聽podcast 唸給你聽


文稿編寫:杜荷洲、李以如、蕭如娟 校對:杜荷洲

陳校長是佇1911年出生 ê 台北士林人。老爸陳應麟是清國 ê文秀才,家教嚴格,培養伊成做一个彬彬有禮 koh 有氣質 ê 人。公學校出業後老爸送伊去廈門接受清國式 ê 教育。Tshím 出門,就啼啼哭哭無欲去學校,老爸 bô-tai-tit-uâ,只好送伊返來到淡水中學初中部。

少年時練鋼琴ê模樣

第一位音樂恩師 Margaret Gaould 牧師娘 從來 m̄ bat 看過鋼琴 ê 陳泗治,佇遮拄著第一位音樂恩師 Margaret Gaould 牧師娘,牧師娘是一位傑出 ê 音樂家,伊致力台灣教會聖歌教育31冬。咱台灣教會 hőng 認定講是「唱詩歌ê教會」,會當佇教堂內歌聲悠揚,攏是牧師娘拍出來 ê 基礎。佇牧師娘 ê 啟蒙之下,陳泗治對西洋音樂發生興趣。彼時,學校 ê 鋼琴房鋼琴有限,學校規定學生一工干焦會當練習一點鐘 niā-niā。陳泗治只好佇暗時,逐家 tī-leh 睏 ê 時,偷偷入去琴房練習,一直到天光。Tō sī 愛 tī 這款辛苦ê環境中練習,伊下定決心,以後 nā 有機會,會提供較四序 ê 音樂環境 hōo 少年家,來栽培較濟音樂藝術人才。

陳泗治ê親筆批。內容記錄家己受tio̍h恩師Margaret Gauld(吳威廉牧師娘)ê啟蒙。

圖說編註: 陳泗治用正範ê台羅,寫講家己彼當時“gōng-gōng.” 逐家敢有看著?


第二位音樂恩師,Isabel Taylor 德明利姑娘 1930年,伊進入去四年制 ê 台北神學院,tn̄g tio̍h 人生 ê 第二位音樂恩師,Isabel Taylor 德明利姑娘,德明利姑娘 tshím 對 Canada Toronto 皇家音樂學院畢業,tō 來淡水女子中學kah台北神學院教音樂。伊攏總蹛佇台灣42冬,共伊 ê 音樂素養kah青春奉獻 hōo 台灣。上課ê時,伊攏用輾轉 ê 台語教學,培養 tshut 足濟 ê 音樂人材,陳泗治 tsa̍t-tsinn ê 音樂理論 kah 鋼琴基楚,攏是參德姑娘學來--ê。德姑娘愛惜人材,用心栽培陳泗治,in 兩人 ê 歲數是頂下歲--ê,感情 ná 親像姐弟 á 仝款。

日本東京神學院深造

1934年,陳泗治去日本東京神學院深造,kah 木崗英三郎學習做曲,mà 跟隨中田羽後學習發聲 kah 指揮,佇遮 mā 熟似 liáu 同鄉 ê 民族音樂家,江文也。歇熱 ê 七--月,先輩楊肇嘉組團成立海外鄉土訪問演奏團,這个團高手雲集,是由高天成擔任曲目解說--ê,音樂家有江文也、高慈美、林秋錦、李金土等。該團去台灣各地巡回舉行音樂會,攏是由陳sù治鋼琴伴奏--ê,這真正是台灣音樂界 ê 盛事。


1936年,陳泗治完成東京神學大學 ê 學業,發表畢業作品: 清唱劇「上帝 ê 羔羊」。1937年 tī 士林長老教會傳教 ê 時,和牧師 ê 查某囝劉淡梅小姐結婚。仝年,陳泗治感覺鋼琴是上會當表現出台灣 ê 鄉土風味,鋼琴 ê 聲音代表 tioh 台灣人 ê 人生觀,這時伊完成鋼琴曲「淡水 ê 幻想」kah「台灣素描」 面臨兩款殖民者的憤青

1940年,陳泗治 kah 士林憤怒青年何斌、郭琇琮、張鈺、曹永和等人發起「士林協志會」,推捒士林地區 ê 文化,反對皇民化運動,扮演著知識分子 ê kioh-siàu,向政府提出建言。猶 m̄-koh,到國民黨政府 ê 白色恐怖時期,郭琇琮 hőng 掠去銃殺,何斌逃去中國,曹永和 bí tī 台大圖書館內,陳泗治全家走去淡水山頂 tsiah 逃過災難,「士林協志會」tō án-ne 解散去--ah。 開始YMCA佇台灣 1942年,雙連、艋舺、大稻埕 ê 教會組成「三一聖詠團」,tī 台北公會堂演唱「上帝 ê 羔羊」,由陳泗治親身指揮。這擺 ê 演出全部由台灣人擔綱--ê,優美 ê 展現出台灣人 ê 音樂水準,mā 得著全場日本人 ê o-ló,是日本時代臺灣人上重要 ê 音樂活動,iā 提懸臺灣人 ê 自信心。1945年,林茂生、杜聰明、藍蔭鼎、陳泗治發起成立台北基督教青年會YMCA,造福青年。

擔任純德女子學校校長

1946年,陳泗治到純德女子學校(進前 ê 淡水女子中學)去教冊,伊 kah 情同姐弟 ê 德明利姑娘合作創辦音樂科,佇這年伊 mā 完成鋼琴曲「記持」。1952年,陳泗治升任校長,伊除了重視科學和藝術之外,mā 重視體育活動。純德女中籃球隊揚威國際,三不時 tō 會代表國家出國比賽。1955年純德女中 hām 淡江中學合併成做「淡水中學」,仝款由陳泗治擔任校長。伊建立音樂大樓,提供 khah 四序 ê 環境 kah khah好 ê 樂器,聘請好 ê 教師。伊 mā 推捒體育活動,出名 ê草橄仔球隊,m̄-nā 球技好,陳校長 mā 要求隊員愛參加合唱團,增加合作性 kah 團結力。這个充滿藝術氣息 ê 草橄仔球隊,tī 體育界真出名,屢創佳績。


陳泗治kah早期ê鋼琴學生戴逢祈等,tī淡江中學八角塔前合影。正pîng第一、二為陳泗治、戴逢祈。

陳校長逐工七點半 tō tī 學校門口迎接學生來上課。每一个學生 ê 姓名 、學習狀況、家庭環境等等, 伊 lóng 知影。伊 mā 交代註冊組 tuì(對) 清寒子弟學費愛優待, nā iáu-ū 困難 tō uì(對) 伊 ê 薪水代纳。 名歌星洪榮宏、林哲夫教授、原住民牧師宋榮村等 lóng bat 受過陳校長 ê 照顧。聽人講伊 sī 賣士林祖厝 ê 錢來幫助清寒子弟--ê。伊恐驚學生無經濟能力來讀册毋敢 kā 學費起 siunn 懸。伊因為三不五時 kā 薪水、公務費或者出差費捐予學校,家庭 ê 所費來源 suah 愛倚靠夫人劉淡梅女士開幼稚園 ê 收入來承擔。夫人愛看册 mā 愛欣賞音樂,是陳校長 ê 知音 mā sī 伊教育事業 ê 支持者。


陳泗治kah夫人劉淡梅女士

提倡高貴 kah 優雅 ê 制服風格

陳校長紳士風格 ê 穿插,mā 影響著淡水中學 ê 學生,學校制服 ê 設計特别注重色水 kah 形體,所以學校 ê 制服一直保持著高貴 kah 優雅 ê 傳統風格。伊感覺淑女穿裙才 ē 呈現端莊優雅 ê 氣質, 所以查某學生 ê 制服是裙裝, 連女性教職員 mā 是按呢要求--neh! 陳校長一直遵照服務、犧牲 ê 辦學理念,伊特別注重人文素質 ê 培養, 三十年來伊付出寶貴 ê 精華歲月予學生,這種 ê 台灣精神影響著學生 ê 一生。

作品被收錄去Guide to the Pianist's Repertoire 特別值得提起--ê 是陳泗治 ê 鋼琴創作< 鋼琴三重奏 >、< 十首前奏曲 > : <鍵盤頂 ê 遊戲>、<弄龍>、<記持>、<台灣素描> tsia-ê 充滿 tio̍h 台灣鄉土色彩 ê 作品被鋼琴家 Maurice Hinson ê 經典著作< Guide to the Pianist's Repertoire > 收錄入去,hām 貝多芬、蕭邦齊名並列,這是陳泗治一生 ê 榮耀 mā 是台灣音樂界 ê 榮耀!

陳泗治夫婦、呂泉生夫婦kah黃月蓮。倒pîng為呂泉生妻子(蕭美完)、中央為陳泗治夫婦、正pîng為黃月蓮(林寬老師的夫人)。徛tī後壁ê是呂泉生。

恬恬仔離開服務三十年 ê淡水中學

1981年70歲 ê 陳校長想欲退休,伊恐驚學校愛付一大筆 ê 退休金,就用辭職 ê 方式恬恬仔離開服務三十年 ê淡水中學, 去到美國洛杉磯。 兩翁某租一間小公寓,過著平靜簡樸 ê 生活。隔轉年學校推派蘇光洋董事 tsah 三十萬新台幣 ê 禮金予伊,堅持伊愛 kā 錢收-- 起--來。殊不知蘇董事一轉到台灣,三十萬箍 ê 禮金又閣匯轉來淡水中學, 註明欲做學校 ê 詩班訓練基金! 陳校長這款無私奉獻 ê 精神, 予全校師生非常 ê 敬佩。

陳泗治全家福。前排正pîng:夫人劉淡梅;後排倒手pîng開始:伶兒、信雄、仁兒

咱 tī 陳泗治先生身上會感受著伊 ê 台灣精神,伊有日本謙虛有禮 ê 訓練,有歐美文化 ê 紳士風度, tō kánn-ná hām 台灣 ê 歷史仝款。 陳泗治先生融合 tio̍h 台灣文化、日本文化 kah 歐美文化 ê 優點 tī 伊一人 ê 身上,是上接近完美 ê 人!


39 views0 comments

Comments


bottom of page