top of page
Search

030 永樂町ê天才藝術家 郭雪湖

Updated: Nov 3, 2023

一个無背無景 ê 少年,後來是按怎變做享譽台灣、日本 ê 天才畫家?你 kam 知影 tī 總統府內「圓山附近」這幅圖是 siáng 畫--ê-neh? 這禮拜 lán 鬥陣來聽李老師講一代天才畫家郭雪湖 ê 故事。

文稿編寫:葉信鴻

28歲,1936《南國村情》

咱佇拜二,beh 來聽台灣人 ê 第30 ê 故事,永樂町 ê 藝術家郭雪湖。

自學少年 師承陳英聲、蔡雪溪

郭雪湖本名郭金火,1908年出生 tī 台北大稻埕南街,家庭散赤。Tī 日新國校三年 ê 時,石川欽一郎 ê 學生陳英聲導師,發現著郭金火 ê 美術才華,tō 教伊水墨畫 kah 水彩 ê 技法。真少年 tō 開拓了藝術 ê 眼界。畢業後考入去人人欣羨 ê 名校台北州立工業學校。冊讀一年 niā,發現興趣不在此,tō 毅然離開學校家己 tī 厝--裡畫圖,老母 mā 尊重伊 ê 決定,上尾仔 tshuē著出名 ê 畫師蔡雪溪。16歲 ê 郭金火 tī tsia 向-蔡雪溪拜師學藝。師傅 mā 不三時分析作品 ê 優缺點 hōo 金火聽。師傅 tō kā 伊 ê 畫名「雪湖」送 hōo 郭金火。


松壑飛泉》1927


嶄露頭角

1927年伊以「松壑飛泉」 ê 水墨畫 hām 陳進小姐、林玉山先生三个未滿20歲臭奶呆 ê 少年家 ê 作品入選第一屆「台灣美術展覽會」。這三个青年才俊 hōo 人稱做「台展三少年」。

隔轉年,郭雪湖以膠彩畫「圓山附近」入選第二屆「台展」並且得著特選獎。這幅畫 hōo 台灣總督府以 500 箍 ê 高價收藏。500 箍 tī hit 時會使買二間樓仔厝--nih,自按呢伊脫離了貧困 ê 日子--ah。


《圓山附近》 1928

這時郭雪湖搪著一生上重要 ê 人,日本畫家鄉原古統。伊指導郭雪湖 kā 中國 ê 岩彩畫 hām 日本 ê 東洋畫融合入去成做「雪湖派膠彩畫風」,奠定了伊藝術 ê 地位。


1930 《南街殷賑》 台北市立美術館

代表作「南街殷賑 1930年伊以「南街殷賑」 ê 作品參加「台展」得著大獎。作品是描述伊 tī 朋友南街寶春齋餅店 ê 二樓向樓跤看落去霞海城隍廟口中元普渡 ê 情境。「南街殷賑」戲劇化-- ê kā 兩層 ê 樓仔厝加疊 kuânn 一層,描繪出旗海 tī 空中飛揚 ê 動態 kah 靜態 ê 五彩看板,動靜適宜-- ê 相映配合著色彩豔麗 ê 三層洋樓。這幅「南街殷賑」,這 mā hōo 台北市立美術館典藏,是該館 ê 鎮館之寶。


兩位膠彩畫家結連理 27歲 ê 時,老師紹介伊 ê 學生,17歲 tō 入選「台灣美術展覽會」 ê 膠彩畫家,大稻埕南街 ê 富家千金林阿琴,阿琴放棄好額人子弟 ê 追求。聽老師 ê 話,嫁 hōo 一个無錢、無背景,毋過緣投閣有才華 ê 郭雪湖。1935年兩个人 tī 台北圓山仔 ê 台灣神社舉行婚禮,轟動了台灣 kah 日本 ê 文藝界。

爭取總督府府展改作省展

1945年二次大戰後,郭雪湖、楊三郎等想講戰爭已經結束--ah。想欲恢復過去 ê 美術展覽會,tō 向國民黨政府建議籌備「台灣省美術展覽會」獲准。1946年10月第一屆 ê 「省展」tī 台北市中山堂舉行,分做國畫、西畫、雕刻三部分,展覽成功。

tī獨尊中國水墨畫的時代求生存

1945年國民黨政府撤退來台,一開始 tō kā 中國 ê 水墨畫列做國畫,膠彩畫 suah hōo 人認為是日本畫,列為邊緣藝術,地位大大 ê 降低。除了膠彩畫,西洋畫 mā 被輕視。這種打壓本土藝術 ê 結果是作品無人欲買,家庭經濟陷入困難。當時,好友陳澄波、文友作家呂赫若被槍殺後,家屬猶是 hōo 情治單位監視中。Tsia--ê 代誌產生了伊想欲離開台灣 ê 原因。


1952年伊代表國家去菲律賓參加美術展,伊 ê 作品竟然受著南洋僑胞 ê 歡迎,作品大賣,自按呢開始家庭 ê 經濟大大 ê 改善,生活 mā 過了 khah 四序。1964年郭雪湖決定單身留落來日本 tshuē新 ê 機會。當時伊閣仔一个人 tī 日本,長男、次男、長女攏 tī 美國留學。夫人阿琴 hām 兒女香美留 tī 台灣,一家伙仔分做三位,過著聚少離多 ê 日子。他決定全家攏去美國舊金山團圓做伙。

台展三少年 郭雪湖 陳進、林玉山

解嚴後返台辦畫展

1989年台灣解除戒嚴以後,出名 ê 郭雪湖20年後,第一擺踏入國門。「郭雪湖近20年 ê 作品展」tō tī 逐家 ê 期待中展開。台北市立美術館主辦「郭雪湖浸淫丹青70年作品展」。另外1990-1997年之間「台展三少年」聯合舉辦兩改 ê 展覽。2008年99歲 ê 郭雪湖得著行政院文化獎。歷史博物館、國家美術館 mā 紛紛為伊舉辦「百歲回顧展」。2012年104歲 ê 郭雪湖過身去--ah。

雪湖畫派成做台灣風情典範

咱台灣 ê 膠彩畫有突破傳統 kah 大膽實驗 ê 精神,真適合表達台灣 ê 民俗民情,前輩畫家郭雪湖細膩綿密--ê 用豔麗 ê 色彩,表達出伊豐富 ê 內心世界。日本南畫大師松村吳村 o-ló 伊是「幼路畫 ê 變種」講伊是「雪湖畫派」ê 典範。


做伙賞畫 同齊hām前輩修心養性

咱這馬 tō hām 郭雪湖前輩做伙來去鬧熱 ê 南街踅踅--咧,閣再去寧靜 ê 圓山仔欣賞山景。雖然前輩離咱而去,毋過平常重視修心養性 ê 郭雪湖伊所創造出來-- ê 心靈故鄉,一直會啟發咱 ê 後代 -- ê。 圖片來源: 1. 結婚照



87 views0 comments

Comentarios


bottom of page