Search

031 第一个台灣女記者─楊千鶴

Updated: Jun 8

「我欲kah日本人領仝款ê月給。」、拄著日本人批評台灣就寫文章kā人搧喙䫌,伊是日本時代ê現代新女性,欲証明台灣人絕對袂輸日本人,伊以台灣人ê角度寫出有台灣特色ê報導,用女性獨有ê文筆寫文章,這tō是台灣第一个女記者楊千鶴。 看不懂台文? 請點李講古我來聽的連結,用podcast講給你聽 (聽故事請點我)


楊千鶴 (圖片來源:2011台灣文學年鑑)

文章編寫:郭孟樺 校正:洪偉婷、劉嘉佳


楊千鶴(Iûnn Tshian-ho̍k)1921年出世tī台北ê好額(hó-gia̍h)人家庭,因為是厝裡ê屘查某囝,tī老母ê苦苦哀求之下,tsiah毋免hőng送去做養女。老母kā伊tshuā tī 身軀邊,逐工kā惜命命。1934年對公學校畢業後,伊去讀四年制ê私立靜修高等女學校。Tī學校受著國文科濱田老師ê鼓勵,開始對文學有興趣。真不幸,上疼惜伊ê老母tī讀初二ê時suah過身--去-ah。伊tī學校ê宿題頂kuân,kā伊對母親ê懷念、悲傷、無奈ê心情寫--出-來。Hōo濱田老師評語講:「寫了誠好,老師看甲目屎流。」失去慈母ê楊千鶴,逐工看冊tháu-pàng伊孤單ê心情,tī冊本內得著安慰,mā養成伊一生愛讀冊ê習慣。

1938年日華戰爭開始,本來欲去日本讀冊ê計劃煞發生了變化。伊tō拜託老爸hōo伊去讀「台北女子高等學院」,這間學校ê學費tsiânn貴,招生ê人數少,3分之一是日本人來讀--ê,hōo人號做「貴族ê新娘仔學校」。楊千鶴tī這段期間真認真拍拚讀冊,成績(sîng-tsik)優良。學校除了看重學科以外,mā注重體育教育,鼓勵全校老師、學生運動。楊千鶴hām球友劉玉女bat提著幾落擺乒乓ê社會組雙人冠軍kah團體冠軍。 楊千鶴20歲ê時,朋友紹介伊去台北帝大蓬萊米(hông-lâi-bí)之父磯永吉研究室做助理,哪知影收著ê月給(gue̍h-kip)竟然比日本人khah少;伊感覺這是無理--ê,無公平--ê,為著平等,伊甘願放棄工課,tō激氣(kik-khì)--ê kā頭路辭掉。

要求報社hōo伊ê月給愛kah日本人仝款

有一工,楊千鶴tī「文藝台灣」雜誌看著日本人批評台灣ê出山文化,文章內底講出山陣頭、孝女白琴、哭棺材...等等ê現象無夠莊嚴;楊千鶴tō寫一篇文章「哭婆」kā伊回應,投稿tī西川滿主編ê「文藝台灣」,伊強調台灣kah日本ê文化生本tō sī無相仝--ê,猶有對日本人無想欲了解台灣文化ê事實提出抗議。1941年「台灣日日新報」ê文藝版欲本土化,按算欲tshiànn一位台灣記者,總編緝西川滿最後錄取著「哭婆」ê作家楊千鶴;楊千鶴iā要求報社hōo伊ê月給愛kah日本人仝款,西川滿真愛惜人才,替伊走傱爭取,落尾報社同意楊千鶴ê要求,mā sī因為伊ê學歷khah懸,月給suah比仝期新進ê日本人khah濟。 楊千鶴頭一日上班ê時,穿一身軀白色ê套裝,配合著紅色ê siat-tsuh,頭戴一頂闊邊ê帽仔,穿甲phānn-phānn--ê去上班。伊講伊欲証明毋管是穿插ia̍h-sī寫文章,台灣人絕對袂輸日本人。


楊千鶴以台灣人ê角度寫出了有台灣特色ê報導,有紹介台灣ê風土民情,mā有採訪當時出名ê人物,受著讀者ê歡迎,伊mā定定參加「山水亭」ê文人聚會。除了採訪畫家郭雪湖、菊花名人楊仲佐(楊三郎之父),甚至去採訪異議人士,像文學家賴和醫師。西川滿講自從楊千鶴來到文藝版了後,tī伊ê高度自我要求之下,文藝版suah做一个iāng--起-來--ah;可惜ê是,隔轉年因為二次大戰,報社為著配合戰時ê需要,文藝版愈kiu愈小,楊千鶴英雄無用武之地,tō離開「台灣日日新報」--ah。

楊千鶴著作《花開時節》

楊千鶴ê短篇小說「花開ê時節」,內容是描寫女校ê畢業生,對未來人生ê探討,智識分子女性對相夫教子傳統生涯ê迷惘,伊用女性幼膩ê心思反應出少年女性對家庭價值ê看法。日本筑波大學教授張良澤形容楊千鶴有女性作家幼路ê筆調,koh有女中豪傑ê骨氣,伊充分--ê利用伊ê特質,扭掠--ê使用日文kā伊tī內心深層ê感受,用文字表達出來,這種文筆是男性作家無法度kah伊比平--ê。


22歲ê時陣楊千鶴結婚--ah,伊tō親像「花開ê時節」ê內容仝款,行--入-去相夫教子ê人生,生有一女二男。戰後政治ê變化,伊所依賴創作ê日本文字被迫滅亡(bia̍t-bông);tī大中國ê文化霸權之下,伊suah變做一ê青暝牛--ah。


當選縣議員

結婚了後,翁婿林嘉雄去台東糧食局事務所做所長,所內ê少年員工定定會kah所長夫人楊千鶴拍乒乓,鬥陣去郊外𨑨迌,時間一久逐家成做好朋友。1951年,伊tī少年朋友ê鼓勵之下,參加全台灣第一改ê縣議員選舉。楊千鶴ê參選政見是以建立托兒所(thok-jî-sóo)為主,配合著少年家ê創意,發明了踏話頭:「各位親愛ê父老兄弟姊妹」,意外--ê竟然當選第一屆婦女保障名額(miâ-gia̍h)ê縣議員。伊代表台東婦女會參加全省婦女大會,以kuân學歷ê背景hőng選做省婦女會ê理事,開始了伊ê政治生涯。1953年,翁婿受著政治迫害(pik-hāi)被判七年ê徒刑入冤獄坐監。隔當年蔣介石再度當選總統,全國大赦,hőng關一年ê翁婿tō對監獄出來--ah。

省縣市女議員座談會留念 (照片來源:台灣文化紀錄片影展).jpg

移民美國 重新提筆書寫自傳

楊千鶴56歲ê時,去美國探親tshuā孫了後,決定移民去美國hām in囝做伙。長女林智美bat擔任北美洲台灣人教授協會ê會長,囝婿林文彥教授捌做台灣人公共事務會ê會長,是台灣民主運動ê前鋒。智美一直期待老母kā伊精彩ê人生用文字留--落-來,tī1991年伊去日本𨑨迌ê時,買一台日文ê文字處理機送hōo楊千鶴。經過兩年ê時間,楊千鶴ê自傳(tsū-tuān)小說「人生ê三稜鏡」tī日本出版。後來,日本筑波大學張良澤教授kā這本反映戰前、戰後兩个時代,被壓迫ê歷史文學作品,用一年ê時間,逐字仔逐字初譯做華文。再由林智美教授kā華文ê初稿編修。1995年,華文ê「人生的三稜鏡」正式由台灣ê出版社發行。


楊千鶴著作《人生的三稜鏡》

記錄台灣婦女行過的坎坷路 這本「人生ê三稜鏡」是楊千鶴封筆40年後,再度夯筆寫--出-來ê珍貴史料。伊講伊出版冊ê目的,是欲予人知影台灣婦女行過ê khám-khia̍t-lōo,用文字記錄台灣ê查某人是按怎hőng𧿬踏(thún-ta̍h)koh重新徛起ê故事。楊千鶴是戰前台灣少數ê女性作家之一,伊tī 70歲ê高齡留--落-來ê女性傳記文學,特別--ê珍貴,mā拄好彌補了伊tī台灣文壇欠席40年ê損失。


編註:西川滿主編的《文藝台灣》封面圖片來源









〈我對日據時代台灣文學的一些看法與感想〉手稿影本 (圖片來源:國立臺灣文學館典藏)

69 views0 comments