文稿編寫：吳鈺瑾
頂一集咱有講著伊能嘉矩1897年開192工tī全島做調查ê目的、伊ê研究ê重要性kah伊做研究ê時代制限。頂一集咱kā 重點khǹg tī伊能嘉矩對台灣「人類學」ê影響kah貢獻。Tī 這集內底，lán欲講伊能嘉矩是一ê siánn-mi̍h款ê研究者，kah伊對台灣「歷史學」ê影響kah貢獻。收聽文稿內容，請點我-Podcast連結
Lán 講過，1895年，台灣無公共衛生ê設備，自然環境造成ê生命威脅對初初來到台灣ê日本人是一ê誠要緊ê問題 。伊能嘉矩有兩擺 tī做調查ê中途tòo-tio̍h mararia，差一點仔命tō休--去，無法度繼續完成調查報告。所以伊訂了「五戒」、「踏查三原則」、「三條件」lâi勉勵kah要求家己。
「五戒」是：
1.身體愛勇健
2.愛有克服地形ê才調
3.敢做敢擔ê決心
4.語言ê能力
5.科學ê智識。
「踏查三原則」是：
1.不管如何，破病ia̍h是發生事故，彼工考察過ê代誌，一定愛記錄完備
2.為著達成「科學調查」ê目標，應該「注意周全」。事後nā有任何有憢疑ê所在，tō代表踏查記錄ê時陣無夠周全。
3.周全ê記錄，ài用周全ê文字寫--落-來。
「三條件」是：
1.愛有蕃地ê智識
2.愛對蕃人好
3.愛bat蕃語。 Lán這馬會當看著tsiah-nī tsē完整ê調查資料，tō sī因為伊能嘉矩有如此頂真ê學術態度。以上ê「五戒」、「踏查三原則」kah「三條件」mā成做後--來去台灣ê探險家入去山區調查ê指引。
頂真koh骨力ê伊能嘉矩，mā tio̍h ài tú-tio̍h重視建設台灣ê頭家才有機會展現伊ê內才。1889年，後藤新平就任台灣總督府ê民政長官。這位主張「生物學統治」ê民政長官，真重視台灣ê民情調查。總督府為著beh「經營番地」，特別重視蕃人ê教育kah蕃人ê建設，拄好tse mā是伊能嘉矩想beh追求ê目標。
伊能嘉矩想欲追求siánn-khuánn ê理想？伊一心一意想欲證明ê tō sī「蕃人是會使教育--ê」。
咱頂一集講過，伊能嘉矩去到台灣，隨創立「台灣人類學會」。同時，伊設立「蕃人教育部」tī學會之下。彼時，日本人思考ê理路就是「蕃人非人」，m̄-koh伊能嘉矩有信心透過教育kā「蕃」變做「人」。伊收兩ê原住民契囝mā sī為著beh證明這ê理想。
伊能嘉矩有兩ê契囝，兩位lóng sī Tayan/Tayal，tō sī北京話講ê 「泰雅族」。一位是查某囡仔，叫Ai. 一位是查埔囡仔，叫Ivan（Iban）. 兩ê囡仔仝年歲，mā lóng sī清帝國時期，劉銘傳為著樟腦ê 資源，去phah 大嵙崁地區ê Tayan部落ê時，hōo清帝國tshuā落山ê人質。兩ê Tayan囡仔，後--來tō hőng安排去清帝國開設ê「番學堂」讀冊。伊能嘉矩tú-tio̍h Ai kah Ivan ê時，因為in兩人有法度講族語koh會當用漢字kah伊能嘉矩「筆談」—「筆談」tō sī透過用寫漢字ê方式來問問題kah回答—m̄ tsiah會hōo伊能嘉矩收做契囝。
伊能嘉矩真疼惜兩ê契囝，日本統治台灣ê時陣，兩ê Tayan囡仔，mā hőng安排去學校學日本話。無偌久，兩人lóng有基本ê日文能力。M̄-koh 查某囝Ai tshiânn不幸ê iáu-buē滿20歲tō過身--去。伊能嘉矩kā滿腹ê悲傷寫做一篇哀詞。這篇哀詞後來刊khan tī《東京人類學會》雜誌內底。
若是Ivan，伊能嘉矩對伊ê紀錄tō ū khah濟。伊能嘉矩講Ivan是契囝，mā是良僕、朋友，Ivan iā sī伊ê Tayan族語老師。伊能嘉矩beh進行 192工ê全島調查前，Ivan特別kā伊能嘉矩提醒種種 kah伊ê族人交流、tsih-tsiap ê phiat-pōo. Mā交代伊能嘉矩愛去Ivan原本ê部落，Ivan koh有三ê兄弟tī hia，in會kā伊能嘉矩照顧。後--來，伊能嘉矩真正來到部落，mā見tio̍h Ivan ê兄弟。伊能嘉矩kā這段過程，記tī 1897年6月7號ê日誌內底。
教養Ivan ê 經驗hōo伊能嘉矩對伊ê「蕃人教育ê理想」足大ê信心。終其尾，對伊能嘉矩來講， tō sī kā「蕃人」教育tsiânn做「人」，就代表上大ê成功。
Tī 1895 kàu 1905 tsit十年之間，伊除了愛專注家己ê研究方式，mā愛達成老師坪井正五郎tuì博士論文ê學術要求，iáu-ū愛配合總督府統治台灣ê目的性，kah顧慮tio̍h官僚ê政策，m̄-koh伊iáu-sī一步一跤印--ê完成了《台灣蕃人事情》、《台灣蕃政志》、《台灣志》等等十本冊tsham 170外篇ê論文。
1905年伊kā《台灣志》等論文提去東京帝國大學申請人類學博士學位，m̄-koh東京帝大認為論文ê著作權是屬於台灣總督府--ê，拒絕伊ê申請。事實上，伊lóng sī憑家己ê力量ta̍uh-ta̍uh-á完成--ê。失志ê伊能嘉矩，辭頭路離開台灣倒轉去日本。另外一ê致使伊離開ê原因，tō是一直kā伊支持ê後藤新平mā beh離開台灣--ah。Tō sī這兩ê原因，伊能嘉矩離開成就伊ê這ê「台灣舞台」。
1907轉去日本了後，伊能嘉矩kā收藏tī遠野市ê khiā-ke，kah伊uì台灣收集來ê文物，成做一間臺灣博物館。伊繼續研究台灣原住民kah台灣各地ê歷史、風俗，發表論文kah寫冊。1921年，台灣總督府史料編輯會，邀請 hőng尊稱做「台史公」ê 伊能嘉矩，負責處理清國ê文獻。台灣總督府拍算 beh kā 伊能嘉矩這部分ê文稿，成做《清朝統治之下ê台灣》這本冊。總督府beh kā 這本冊 khǹg tī大日本帝國統治之下ê《新台灣史》這套冊內底，成做《新台灣史》ê前傳。1925年，伊ê ma-ra-lí-á舊病koh-tsài發作suah雄雄過身--去，留落來54本ê文稿。 好佳哉後--來有弟子板澤武雄kah民俗大師柳田國男，用四年ê時間鬥完成這本冊，tī 1928年，這ê lóng總有150萬字ê《台灣文化志》出版。
這本百科全冊內底有紀錄台灣原住民ê語言、文化hām歷史，ná親像一座學術ê金字塔，sī研究台灣ê學者一定愛讀--ê十本冊之一。
伊能嘉矩1907 年轉去日本了後，伊本人tō毋捌koh再踏入台灣一跤步。M̄-koh各位聽眾朋友敢知影，伊能嘉矩其實一直用無仝款ê形式轉來到台灣。
頭一層大代誌tō sī 1928年，台北帝國大學創立ê時陣，kā伊能嘉矩收藏ê冊、手稿、台灣原住民ê文物買--來。文物khǹg tī彼時帝國大學ê土俗學人種學研究室做標本；冊kah手稿收入去圖書館，成做「伊能文庫」。第二， lán tī頂集講過，中國國民黨去到台灣ê時陣，tō是使用日本時代lâu--lo̍h-lâi ê原住民分類方式。這ê分類ê智識系統ê影響力，是伊能嘉矩不斷ê轉來台灣ê第二ê證明。第三，現此時，台灣原住民各族走揣家己ê歷史kah認同ê時陣，伊能嘉矩如此詳細ê紀錄，是in誠重要ê參考。Ketagalan族bat轉去貢寮做海祭，tō sī根據伊能嘉矩ê資料來展現。
伊能嘉矩m̄-nā以無仝款ê形式不斷ê轉來台灣，其實，伊mā用無仝款ê形式koh再轉去日本。伊能嘉矩對台灣ê研究，誠bô-tshái--ê，tī二次世界大戰了後，tō bô受tio̍h日本學術界ê重視--ah. 2011年3月11號，伊能嘉矩ê故鄉岩手縣受tio̍h地震、海漲kah核能廠爆炸ê災厄。岩手縣tī重建ê時陣，為著beh重新展現岩手縣ê文史，才kā故鄉這位真重要ê人類學kah歷史學家khioh--tńg-lâi。Beh揣伊留落來ê文物，才知影lóng tī台灣，趕緊kah台灣大學聯絡，希望tī伊能嘉矩ê故鄉koh再展現伊ê成就。 Lán ê故事已經來到尾聲。伊能嘉矩ê故事，分做兩集來講，tō sī因為伊ê故事會當hōo lán有兩ê誠重要ê思考。
第一，tō sī 對「平埔族」這ê名詞kah原住民各族分類ê思考。頂一集講tio̍h伊能嘉矩對人類學研究ê重要性ê時陣，tō hōo lán思考lán長久以來tuì原住民分類ê誤解。Lán講過，「平埔族」這ê名詞是充滿種族主義 kah殖民教化ê意義。伊能嘉矩受著ê人類學學術訓練，kah彼時世界人類學關心ê仝款：彼時ê人類學關心「人類ê演化」，kā原住民照文化層次分類，背後ê思考理路是「進步」kah「落伍」，這是為著世界各地ê殖民ê正當性做證明。伊能嘉矩照這ê理路做ê研究，當然是彼時台灣總督府beh做各種ê統治、管理政策ê時上重要ê方針。仝款是殖民頭腦ê中華民國佔領台灣了後，延續「平埔族」這ê用法，tō sī因為「漢化」對華國理路來講，是「khah進步--ê」。「平埔族」這ê名詞kah原住民各族ê分類，是lán tī伊能嘉矩故事內底ê第一ê思考。
第二ê思考，kah 這集khah有關係。Tī 這集內底lán ê重點是伊能嘉矩對歷史學研究ê重要性。伊能嘉矩寫ê文稿若thah起來，可能比伊本人koh khah懸。伊hiah-nī頂真kā日本統治進前ê台灣紀錄kā不止仔詳細：lán tī伊ê作品內底，會當看著台灣120外年前ê原始面模仔；lán tī伊ê作品內底，會當聽著台灣120外冬前各族群多語言ê聲音。Lín kám知影，因為《台灣文化志》這套冊，伊能嘉矩tī日本bat hőng分做「歷史學家」--neh。聽了這集，逐家以後想著伊能嘉矩，除了知影伊sī人類學家，mā ài會記得伊mā算是一ê歷史學家--ooh。
是講，講著這「歷史學」ê成就，A-kīn有一寡仔問題beh kah逐家討論一下：逐家敢會記得tī這集ê故事內底，講著伊能嘉矩是日本時代 ê「台史公」？Tsit-má若講著「台史公」，你會想著siánn-lâng？ Sī--looh，以早課本lóng教 lán講寫《台灣通史》ê連橫 sī「臺史公」。你感覺tó一ê人號做「臺史公」khah ū 道理？
欲回答這ê問題進前，lán koh有幾ê方向ē-īng-eh思考：第一、你認為台灣ê歷史，敢有需要繼續以「漢人」kah「漢文化」為中心？Ia̍h-sī你khah同意台灣是多族群共同生活ê島嶼，需要以「多族共榮」做特色？第二、台灣若是建國，你認為台灣共和國ê歷史，應該對tó位開始寫？
著--lah，伊能嘉矩ê故事hōo lán ê 第二ê大思考，tō sī如何定義台灣歷史文化ê範圍。
針對這，A-kīn個人有一寡仔想法，分享hōo逐家參考看覓：
Lán ê寶島台灣，tī美麗ê太平洋khiā-khí。Kâm-tio̍h海水開闊ê腹腸，lán ê寶島台灣，先養飼台灣ê原住民各族，後--來koh有唐山來ê漢人、西方來ê西洋人、東洋來ê日本人，tsit-má koh有南洋來ê新移民。M̄管是siánn-mih民族，lán ê寶島台灣lóng誠有量，用伊上甜蜜ê奶水kā tī 這ê土地上生活ê人一代一代晟養大漢。A-kīn認為，「多音交響」是台灣ê過去，所以，若是kā「多音交響、各族共榮」，成做台灣ê未來，是一ê用khah開闊ê角度思考台灣未來ê方式。
聽眾朋友一定知影台灣ê第一高山叫「玉山」，m̄-koh各位敢知影仝這ê山，是Bunun族ê聖山，族語叫「Tongku Saveq」；聽眾朋友應該mā lóng知影后羿射日ê傳說，m̄-koh各位敢知影仝這ê日頭，Tayan族有一ê充滿勇氣kah世代傳承ê射日傳說？逐家kám有想過tī漢文化強勢ê佔領這ê 島嶼進前，台灣原住民lóng sī用in ê母語來替這ê 島嶼ê每一座山、每一條溪號名？逐家kám有想過tī漢文化強勢ê佔領這ê 島嶼進前，台灣原住民lóng sī用in祖先ê智慧teh守護台灣ê一草一木？
向南島台灣這ê方向前行，A-kīn 我家己mā猶koh咧學習。Lán lóng ài經過一段時間，tsiah有才調kā已經慣勢ê漢人思考理路放--落-來。Kā已經慣勢ê漢人思考理路放--落-來，tsiah看會著南島台灣ê美麗，tsiah看會著南島台灣ê未來。這條路，lán做伙拍拚。
伊能嘉矩ê故事就講kàu tsia。我用一句Bunun祝福語kā逐家講再會。這句話，是我ê大學Bunun語ê老師Anu Ispalidav kā 我教--ê。Anu老師tsit-má已經tī天頂做天使--ah。無的確伊ê祖先，mā拄過伊能嘉矩。希望Anu老師會當tī天頂守護伊ê族人，mā守護lán逐家。守護這塊屬於in，一直lóng無屬於中國ê台灣，永遠民主自由、世世代代、各族共榮。
相片來源：
相片Ｅ：1901年，34 歲ê伊能嘉矩（正手爿） tī 台北，hām民政部學務課教科書編纂事務囑託杉山文悟（倒手爿）合影。相片來源：〈台灣踏查——伊能嘉矩〉。
相片Ｆ：1900年，伊能嘉矩tòo-tio̍h malaria。Tī旗後歇睏養病ê sî，伊tī日記《南遊日乘》寫了「踏查三原則」。相片來源：伊能嘉矩台灣踏查。
相片Ｇ：伊能嘉矩主編ê《台灣志》草稿。相片來源：〈台灣踏查——伊能嘉矩〉。
相片Ｈ：1907轉去日本了後，伊能嘉矩kā收藏tī遠野ê khiā-ke，kā伊uì台灣收集來ê文物，成做一間臺灣博物館。相片來源：台灣回憶探險團。
Comments