一个美國女性對台灣ê深情、對苦難者ê愛，奉獻tio̍h伊ê一生造福了百萬人ê性命，伊ē當講是lán台灣人ê母親。 看不懂嗎? 聽Podcast 用台灣話聽台灣古
文稿編寫：郭孟樺 校對：劉嘉佳、洪偉婷
孫理蓮牧師娘tī台灣成立第一个基督教救助機構「芥菜種會」，伊用「m̄是我hōo你，是耶穌hōo你」ê服務理念，為痲瘋病、肺癆、烏跤病、原住民、孤兒⋯等等ê弱勢族群提供tio̍h種種ê幫贊。
1901年出世tī美國明尼蘇達州ê孫理蓮，大學ê時熟似tio̍h伊後來ê翁婿孫雅各，大學畢業了後孫理蓮去紐約ê聖經神學院研修，1926年tī上帝ê安排之下，in翁仔某兩人來kàu台灣宣教，兩年後孫雅各擔任淡水中學ê校長，而且兼任理學堂大書院ê老師，因為定定愛招待各國來ê教會人士，加上伊愛交朋友ê個性，in厝--lí不三時lóng ū人客ē來，師母lóng愛鬥發落，mā愛照顧厝內ê兩个幼囡仔，時常無閒tshì-tsha̍k。
1940年二戰爆發後，加拿大長老教總會驚恐傳教士tī台灣ē hōo日本人施壓，愛配合皇民化ê政策，tō勸in離開台灣去南美洲ê Guyana，師母tī hia ê時四常去kah印地安ê囡仔做伙、分福音卡hōo in，囡仔足愛kah伊鬥陣，hōo伊感覺Guyana tō是伊ê兜。
1945年二戰結束孫雅各真想beh轉去台灣，師母勉強答應，m̄過伊講無愛kan-na是牧師娘niā-niā (a missionary’s wife)，伊beh行--出-去做一个太太宣教士（a missionary wife），beh為教育、醫療kah照顧弱勢來打拼；孫理蓮tsiânn gâu寫文章，文筆親切koh有感動人ê水準，不時寫出戰後台灣蕭條、需要重建ê狀況，寄hōo 伊ê厝--裡ê人知。Tsia ê批引起美國教會hām私人機構ê注目，足濟人lóng想beh讀，紛紛要求孫理蓮mā愛ke寄一份hōo in。頭起先伊是用寫--ê，後來改用刻鋼版油印，到尾á討批ê人竟然ū兩萬五千人遮濟，只好請印刷廠印--出-來寄hōo逐家，想bē到意外--ê收tio̍h ê捐款每年差不多ū 25萬美金tsiah爾仔濟，伊tō挈(khe̍h)遮ê錢開始做社會救濟ê工課。
1948年孫雅各接任台灣神學院，伊感覺tī台北市內中山北路ê神學院siunn吵，無適合做靈修ê教育，tō kā土地賣hōo台灣水泥公司，搬去風景優美ê草山設立新ê校園；孫理蓮用三年ê時間參加門諾教會ê山地巡迴醫療團，遮--ê過程hōo伊了解原住民ê需要，幫贊--tio̍h伊後來為原住民做ê代誌。親像tī南投設立一个「基督教山地診所」，tō是beh改善山區原住民得tio̍h肺病ê嚴重狀況，hit當時原住民嬰仔死亡率足懸(kuân)，伊tō設立馬利亞產院hōo in安心生產做月內，救活了足濟ê小生命。另外iā ū培養男性工藝ê訓練學校、hōo女性原住民讀--ê護理學校，提供in ê生活技能。甚至tī孫雅各牧師過身了後，師母遵照牧師ê遺願訓練原住民傳教士，hōo in行--出-去世界佈道福音，提kuân原住民ê社會地位。
另外，伊聽人講tī新莊ê痲瘋病樂生療養院，不時ū患者自殺ê不幸消息，伊tō請醫療傳教士來義診，成立「漢生病患聖望教會」hōo身軀破相ê患者tī精神上有所寄託；伊iā設立「安樂之家」hōo患者家屬kah患者分開蹛，避免感染ê風險；伊hām患者建立tsiânn深ê感情，35年來逐年ê聖誕節孫理蓮lóng ē出現tī樂生療養院參in過節。1953年開始伊四界去成立兒童之家，照顧失去爸母iah是遭受放捒(pàng-sak)、被苦毒ê囡仔。1958年伊koh tī西海岸地區設立25个牛奶、維他命ê供應站提kuân國民ê營養。1960年tī台北成立「流浪少年之家」，另外，koh hām王金河醫師、謝緯醫師tī台南北門成立免費治療烏跤病ê「憐憫之門診所」，建立手術室，25年之間治療超過700名患者。孫理蓮一直lóng是用母親ê關懷leh做公益，1965年為孤兒tī台北萬里ê海邊á成立營地，hōo孤苦人生ê孤兒，通好敨氣(tháu-khuì)kah𨑨迌(tshit-thô)ê所在。1970年tī花蓮成立未婚媽媽待產中心，hōo m̄ bat世事ê少年媽媽安心生產做月內；遮--ê種種義行感動tio̍h世界各地ê人，足濟人捐款贊助，mā帶動了逐家關懷社會ê風氣。
1983年服務台灣60年ê孫理蓮tī工作中過身--去，伊參翁婿鬥陣安歇tī草山ê台灣神學院，伊ê一生為台灣設--ê救助機構蓋濟，佗位ū困難tō往佗位去，伊創辦ê基督教芥菜種會這馬由查某囡kah囡婿繼承爸母ê精神，繼續服務台灣人；今年sī孫理蓮冥誕120週年紀念，四界hōo伊照顧過--ê人lóng轉來草山神學院悼念師母ê恩典，tī紀念會ê禮拜中逐家上台懷念這位造福超過百萬人ê台灣母親，in lóng講孫理蓮sī in這世人上重要ê貴人。
相片來源：
孫理蓮宣教士，一世人有51年時間奉獻hōo台灣這片土地
1958年，tī台北市ê芥菜種會辦公室
孫理蓮kah翁婿孫雅各牧師，後生孫萬福，查某囝馬利安
孫理蓮看著原住民婦人人需要照顧，tō去募款，tī埔里khí一間產院。
彈手風琴ê孫理蓮
Comments