top of page
Search

038 小兒麻痺之父-畢嘉士

Updated: Jan 18, 2023

台文編寫:林琪蓁 校對:吳鈺瑾、陳翔容

身障兒童的再生之父 台灣tī 1960年代有真tsē人得tio̍h小兒麻痺,有一位tuì挪威來ê醫師,tī台灣奉獻30年,照顧痲瘋病kah小兒麻痺ê患者,koh幫助小兒麻痺病童做鐵鞋、爭取受教權、設立職業訓練工廠,這位醫師tō是台灣ê小兒麻痺之父畢嘉士。

逐家好!我是李贊星。真歡喜逐家來收聽「李講古,我來聽」。Tī每禮拜ê拜二lán beh聽台灣人ê故事。這禮拜lán beh來聽一位tuì挪威來ê醫師畢嘉士(Olav Bjørgaas),伊是lán台灣ê小兒麻痺之父。

tī 北國挪威體驗過散凶的寒冷童年

畢嘉士醫師tī 1926年出世tī北國ê挪威。老爸tī世界經濟大蕭條ê時,失去頭路,koh致tio̍h肺結核無錢通好醫病;畢嘉士只好替老爸去申請社會救濟金來生活。伊立志以後beh做一ê醫生,去幫贊散赤ê人,絕對bē使hōo老爸、老母失望--ê。伊考入去荷蘭鹿特丹醫學院(Erasmus Universiteit Rotterdam),讀冊ê時加入去挪威基督教協立差會,準備beh去做醫療ê傳教士。 新婚tō來台灣服事上無人愛的人

1954年大學畢業ê時,hām新婚ê牽手奉神ê呼召去到台灣,tī桃園龜山ê樂生痲瘋療養院做醫生。Hit時染tio̍h痲瘋病ê人,被迫愛hām厝--裡ê人分開,關入去療養院內面,受tio̍h無人道ê對待,kán-ná是活ê死人。In特別排斥外國來ê醫生,畢嘉士為tio̍h beh得tio̍h患者信任,無掛手lông,無掛喙罨,無穿防護衣--ê近距離 hām患者接觸,漸漸仔才袂去hōo患者排斥。 用實際的行動愛患者 有一工,一位痲瘋患者嚨喉去hōo痰that--tio̍h,規ê面lik色,強強beh斷氣--去,畢醫師tō趕緊提一條塑膠管tshng入去嚨喉內,出力--ê用喙kā痰suh--出-來,連續suh三擺了後,患者ê氣tsiah順--起-來,面色轉做紅gê。這兩年tī tsia服務,伊付出ê關心kah愛,hōo病人對以後ê人生有所希望。

1957年,「屏東基督教診所」資深的傅德蘭醫師(倒爿)hām畢嘉士醫師(正爿)

主動去山區tshuē患者來治療 1956年,伊hōo挪威教會調去照顧屏東ê痲瘋病人,tī基督教診所ê時,伊kā bih tī山頂ê痲瘋患者tshuā出來治療,hōo in感受tio̍h人ê疼心;患者愈來愈tsē,診所無夠用ê 時,伊tō tī宿舍ê門口埕,搭布phâng通好加收一寡痲瘋病、肺結核kah小兒麻痺ê兒童。伊kā 60箍美金ê薪水捐--出-來,認養46 ê兒童,伊嘛收養台灣籍的一雙兒女,方勸、義雄;伊過tio̍h簡樸ê生活,除了看病以外是無啥物通好開銷--ê。 驚倒人的oo-to-bai三貼 有一擺,一位患者過身--去,beh倒tńg去厝--裡安息,半暝仔tshuē無車通載,畢醫師tō騎oo-tó-bái 坐tī頭前,中央giap tio̍h大體,坐tī後壁ê家屬kā大體mooh牢--leh,一路到亡者ê厝已經是半暝仔三點外,隔轉工透早七點,koh愛上班去巡病房。


來屏東ê第一年伊tō收tio̍h 350 ê tuà院患者kah門診病人兩萬外人。

兩翁某定定捐血、甚至幫病患結數 畢嘉士定定tī病院飼病童食飯,kā in洗身軀。病院若無血液通用,伊會kā手ńg pih--起-來,捐血hōo患者;血型是A型ê夫人,mā會照畢醫生ê意思kā血捐--出-來;患者若無錢通納醫藥費,伊會寫一張「B.O.B」ê欠條交hōo病院,對伊ê薪水內面扣除。

屏東「勝利之家」-台灣ê第一間小兒麻痺診所 1963年台灣ê第一間小兒麻痺診所tī屏東成立,這tō sī 後來ê「勝利之家」。Hit時ê小兒麻痺病童,因為無鐵鞋通穿,lóng tī-leh塗跤兜pê來pê去。畢爸爸tō送一ê病童去Hawaii訂做一雙鐵鞋後,伊請tī屏東基地ê美國工程師鬥相共,kā美國ê鐵鞋copy--起-來,設立一間鐵工廠,免費--ê提供鐵鞋hōo由四界來ê病童穿,所有ê費用lóng由挪威基督教協力差會提供。有一位駐台灣ê美國工程師,hōo in ê所作所為感動--tio̍h,kā公司hōo伊ê厝稅津貼每個月100箍美金捐--出-來,只要求tī鐵工廠內有一間房間通tuà tō好。

四界拜託 爭取身障兒受教權 Hit當陣,學校是無beh收行動不良ê學生--ê,tse造成了小兒麻痺ê兒童失學;畢嘉士四界去拜託學校收留學生,佳哉,最後有屏東仁愛國小同意成立特殊班,伊派兩位「勝利之家」ê工作人員,去幫贊學校教學時ê運作。這ê特殊班卻變成全校上優秀ê班級,模範生是不計其數--ê。兩年以後,教育部立法改變政策,規定學校bē-sái拒絕病童ê受教權。 開辦職業訓練工廠

1969年畢嘉士kā世界各地捐來ê生產機械,tī高雄ê覆(phak)鼎金開設特別為小兒麻痺患者設計ê職業訓練工廠,訓練病友有謀生ê能力,有一技之長,會當正常ê行入去社會,得tio̍h in生活所需要ê報酬。

1975年有部分ê小兒麻痺患者,因為龍骨受tio̍h長期ê壓迫,龍骨彎曲--去,會teh tio̍h心臟,致使喪失生命。畢嘉士去Hawaii邀請龍骨ê專家Dr. Jones來屏東指導龍骨ê手術,四界來ê醫生聚集tī「勝利之家」,kā這ê成功ê模式,帶轉去台灣各地建立小兒麻痺ê治療機構。嘉義ê基督教病院戴德森(Dr. Ditmanson)每禮拜固定會去「勝利之家」支援小兒麻痺ê開刀手術。

佗位有需要,我tō去佗位 30年來,畢嘉士用醫療ê專業,服務台灣ê弱勢人群。這馬lán台灣已經會當自立自強,會當照顧家己ê人民--ah,畢嘉士一直堅持「佗位有需要,我tō去佗位」ê信念,1984年離開台灣,去越南、尼泊爾、海地服務。伊這種跨越種族,跨越國界ê愛,mā影響tio̍h伊ê後代,查埔--ê hām老爸仝款,tī蒙古做醫療ê傳教士,照顧散凶ê人,查某--ê是兒童心理障礙治療師,用伊ê專業,四界去各國支援兒童ê需要。

1997年,畢嘉士得tio̍h第七屆台灣醫療奉獻獎,外交部mā肯定伊是「外交之友」。2008年挪威國王頒發聖歐拉夫勳章,肯定伊對世界醫療ê貢獻,屏東縣政府頒發「榮譽縣民」。2013年屏東地方人士追隨畢嘉士無私ê精神,成立「畢嘉士基金會」,照顧屏東ê老大人kah行動不良ê人士,提供長期ê服務。

2008年,畢嘉士得tio̍h挪威國王頒贈的 「聖歐拉夫勳章」(The Medal of St.Olav ),表彰他佇醫療宣教的貢獻。文圖/天下雜誌

2015年挪威記者索漢昆斯,替畢嘉士寫了一本傳記《奇醫恩典》tī世界發行。2014年88歲ê畢嘉士轉來到伊ê第二ê故鄉屏東,參加屏東基督教病院60周年紀念kah屏東小兒麻痺ê「勝利之家」成立50年紀念,hām《奇醫恩典》ê中文版發行ê記者會。

kā上帝的愛傳--落-去 Lán台灣bat接受tsiânn tsē外國人士ê幫贊,in用人類ê愛,kā被人放sat--去ê弱勢當作寶貝teh疼惜,hōo lán會當放心--ê發展lán ê經濟。這馬lán台灣富裕起--來--ah,應該kā這種溫暖ê人道精神傳--落-去。「畢嘉士基金會」這馬tō是kā這種精神傳去非洲ê馬拉威kah亞洲ê緬甸,用畢嘉士ê光輝,去照亮需要被照顧ê人。

2019年11月15日安息主懷,享壽93歲

圖片來源:天下雜誌出版社、畢嘉士基金會宣教士人物檔





29 views0 comments

Comments


bottom of page