一位tī日本、中國、kah國民黨政府lóng 去hőng打壓ê神祕作曲家，伊tī 30年代hiông-hiông tī 國際樂壇發出顯目ê光芒，hōo受tio̍h壓迫ê台灣人真大ê鼓勵。這位緣投koh有才情ê大明星，就是台灣ê江文也先生。伊tī 1936 年以「台灣舞曲」擊敗各國上優秀ê作曲家，得著柏林奧運作曲特別獎。像這款ê音樂天才，是án-tsuánn-iūnn台灣人險險kā伊放袂記--leh？
請逐家來收聽白光小姐少年時ê男朋友，江文也先生ê故事 (從 podcast用台灣話聽台灣古)
台文編寫：盧彥廷 校對：陳翔容，吳鈺瑾，林琪蓁
江文也本名是江文彬。老爸uì淡水三芝鄉到大稻埕做船運ê生理，江文彬是出世tī大稻埕ê大家族內。三歲ê時tō會曉唱搖囡仔歌鬥騙小弟，四歲tō會曉唱老母教ê客家歌曲「山頭」，五歲ê時伊會pha̍k tī「大稻埕教會」ê窗仔口，大聲 tuè教友teh唱聖歌。大稻埕不時有戲班來搬戲，伊mā學會曉唱「百家春」kah「八卦調」等。
1916年日本政府提著福建省沿海ê「獨家租借權」，日本政府鼓勵臺灣人去廈門做生理，臺灣人tī hia有經商免稅ê特權，hit時，差不多有一萬ê臺灣人去福建。江文彬in三兄弟lóng去讀臺灣總督府設立ê日本僑校「旭瀛書院」。江文彬上愛唱福建省內ê閩北、閩中、閩南無仝腔口ê「天烏烏」ê童謠。伊mā定定會坐渡輪去鼓浪嶼接觸西洋ê文化kah西洋傳教士學風琴、鋼琴、小提琴等樂器，mā學會曉看bat五線譜。
1923年tsiânn gâu唱歌ê老母過身--去，老爸無法度kā伊照顧，伊tō hām大兄hőng送去日本長野ê上田中學讀冊。大兄bat送伊一支口琴，江文彬會無師自通--ê pûn 出「櫻花」、「送別」、「卡布里島」ê旋律。伊koh會kā歌曲改編加油添醋--ê變做khah心適ê音調。兩兄弟仔逐年lóng會轉去廈門探親，中途會tī基隆歇睏，in會轉去大稻埕二伯ê厝--裡，去三芝ê祖厝祭祖，mā會去老母ê後頭厝花蓮，tī阿舅ê厝--裡熟似真tsē Amis（阿美族） ê朋友。
上田中學畢業了後，伊聽老爸ê話去讀「東京武藏高等工科學校」，欲學德國ê生產技術。因為確實是真kah-ì音樂，暗時tō去「上野音樂學校」進修聲樂。武藏工科學校歇熱ê時，bat tńg去台北發電廠實習，伊利用假期hām小弟文光四界去聽南管、北管ê戲曲，採集民間歌曲，mā bat坐火車去阿里山看日出ê雲海，去接觸著Tsou族ê音樂hām舞蹈。
自從tsiânn gâu唱歌ê老母過身了後，老爸心情大bái，逐工悶悶不樂。Koh tú-tio̍h世界經濟大蕭條，船運ê生理大敗。老爸tō食鴉片來消除煩惱，鴉片一食牢，kā財產 suah食了了去--ah。江文彬ê經濟來源tō被斷--去，伊只好去酒家走唱，趁錢度日。佳哉僑領楊肇嘉伸出援手，生活才有改善。伊去參加聲樂比賽提著頭名，hōo藤原義江歌劇團招攬去唱歌劇，擔任男中音ê角色。江文彬生做缘投，扮相飄撇，前後演出「波西米亞人」kah「托斯卡」，伊吸引了真tsē女戲迷，其中有一位上田市長ê千金瀧澤信子對江文彬非常痴迷。
江文彬定定有想欲作曲ê欲望，m̄-koh伊作曲ê理論基礎無夠，tō去東京音樂學校ê御茶水分校，hām田中規矩學鋼琴，hām橋本國彥學作曲，一年後橋本老師去德國留學--ah。伊不得己，去管弦樂團食頭路，做替團員抄寫總譜kah分譜ê工課。To sī ná 抄寫樂譜ná自我學習--ê，學著袂少ê和聲，對位等作曲ê技巧。伊kā tńg去「臺北城」市內𨑨迌ê印象，寫出第一號作品「城內之夜」ê鋼琴曲，為著欲慶祝伊完成了處女作「城內之夜」，伊kā伊ê名改做江文也。
1934年僑領楊肇嘉組立「鄉土訪問音樂團」邀請留日ê音樂家做伙去臺灣ê七縣市做巡迴ê音樂演出、團内有高慈美、陳泗治、林進生、翁榮茂等參加演出，其中以身穿白色西裝ê男中音江文也上蓋缘投，受著觀眾上大ê歡迎。伊除了tńg去三芝鄉祭祖以外，hām小弟文光鬥陣去原住民ê部落收集原住民ê音樂kah舞蹈。Tńg到日本了後，寫做鋼琴曲「生番四歌曲」。為著欲吸收較tsē ê臺灣風采，掌握原住民ê精神，伊定定去蔡培火先生開ê台菜館「味仙餐廳」吸收養份。伊koh kā第一號作品鋼琴曲「城內之夜」改寫做轟動世界ê管弦樂曲「臺灣舞曲」。
1934年hām戀愛多年ê市長千金瀧澤信子結婚，信子是武士ê後代，老爸瀧澤先生非常反對信子hām殖民地ê臺灣人結婚。M̄-koh信子是愛著較慘死--ê愛江文也，伊不管老爸ê反對，投奔去tshuē自由ê婚姻。信子小姐愛畫圖，有收藏畫册、唱片kah詩集ê愛好，兩人定定去日比谷公會堂欣賞歐洲名家ê演出。票價雖然有較貴，m̄-koh mā sī照買不誤--ê；兩人經常去TAD咖啡廳hām文藝朋友作伙欣賞古典音樂。嫁著這款ê藝術翁，信子只好認命--ê變賣嫁粧度日。
中場：故事講--tio̍h ê tsit-ê時陣，江文也ê才華猶未完全發揮，m̄-koh伊已經吸引tio̍h tsiok濟查某囡仔ê愛情--ah。浪漫多情ê江文也tú tio̍h痴情ê信子了後，猶是無法度控制家己ê情感，繼續tī外口招花惹草。可憐ê信子上尾kám等會tio̍h浪子回頭？是浪子mā-sī音樂才子ê江文也，上尾ê結局koh是按怎--leh？咱繼續來聽--lo̍h-khì。(從youtube用台灣話聽台灣古)
自認是出生tī「白翎鷥之島」ê江文也，tī 1934年以「白翎鷥ê幻想」管弦樂得著日本全國第三屆音樂比賽作曲組第二名。1934年koh再以「盆踊主題交響組曲」入選做第二名。1936以「潮音」合唱曲得著第二名。1937年以「賦格序曲」得著第二名。伊年年得獎，年年得著第二名。Tī日本ê音樂裁判ê心目中，江文也是殖民地ê台灣人，是永遠無資格提著第一名--ê。
1936年第11屆ê奧林比克運動會tī德國ê柏林舉行，德國傳承著希臘ê傳统，除了舉辦運動會以外mā辦畫圖、詩歌、雕刻，建築、作曲ê比賽，日本派出4 ê第一名ê作曲家kah第二名ê江文也參加；江文也以「台灣舞曲」管弦樂參加，結果是永遠ê第二名得著特別獎。4 ê資深ê作曲家竟然輸hōo 26歲ê殖民地ê人，日本ê樂壇tsiânn無面子，刻意--ê kā臺灣人得著獎ê事實淡化。M̄-koh這項代誌去hōo東京「日日新報」發現，獨家--ê大篇幅--ê kā獎牌、相片、樂譜lóng刊登--出-來。台灣ê「日日新報」當然mā是tuè leh kā事蹟用頭條新聞報導出來，tī故鄉造成了轟動，逐家才開始認bat這位樂壇ê彗星。
兩年後江文也再度以「斷章小品」ê鋼琴曲得著義大利威尼斯第四屆國際音樂節ê作曲獎，再次--ê證明伊ê實力。伊去hōo tuà tī巴黎ê鋼琴家、作曲家齊爾品（Tcherepnin）注目，齊爾品tī東京kah北京lóng有設立音樂出版社，伊講江文也是亞洲上有才華ê作曲家，伊kā江文也ê作品提去美洲、歐洲、亞洲發行，28歲ê江文也tō躍身進入去國際作曲家ê行列--ah。
1937年日本開始發動「日華戰爭」，日本人民全面投入戰爭。江文也被派擔任宣傳片ê電影「東亞和平之道」ê作曲配樂，並且指導uì滿州國來ê女主角史詠芬唱歌。兩人suah發生了感情，江文也甘願放棄tī日本創造出來ê音樂事業，欲去日軍佔領區ê北京hām史詠芬鬥陣，m̄-koh兩人甜蜜ê愛情生活，無到一年，史詠芬tō去上海ê影劇界發展，這對露水鴛鴦ê感情tō suah--去--ah。史詠芬tō sī有「一代妖姬」之稱ê大明星白光小姐。1940年江文也koh再hām伊ê學生吳韻真墜入愛河，兩人tī北京舉行正式ê婚禮，夫人瀧澤信子hām 4 ê幼囝tō tī東京痴情--ê等候翁婿 ê tńg--來。
江文也tī北平師範學院做音樂教授ê時，伊一方面培育人才，一方面潛心研究中國ê古樂kah民間ê音樂；伊利用西方ê現代音樂技巧，重新--ê詮釋中國ê古樂。1938年到1945年之間是伊作品產量上豐富ê時期。Tī聲樂曲伊完成了「中國民歌一百曲集」，tī管弦樂伊完成了「孔廟大成樂章」kah舞蹈音樂「香妃傳」。伊koh kā古歌、樂府、唐詩、宋詞、元曲、明清詩詞等等，陸續ê完成一系列ê作品集。
1945年日本戰敗，戰後tī中國ê江文也選擇留tī中國hām中國夫人吳韻真做伙，這錯誤ê選擇，開啟了伊悽慘ê後半生。首先--ê是國民黨政府kā伊lia̍h--去，理由是伊替日本政府創作「東亞民族進行曲」ê音樂，kā伊用「漢奸」ê名義判伊入獄10個月。出獄後，北平師範學院教授ê頭路tō無去--ah。佳哉tī北平藝專ê同事馬思聰tī天津創辦「中央音樂學院」聘請伊做院内ê音樂教授。
1957年ê「反右」運動，江文也再度hőng貼著「漢奸」、「資產階級」ê標籤。教授ê職務被撒銷--去，伊hőng派去圖書館做雜差仔ê工課，拄好利用這段時間kā伊收集ê一百外首ê臺灣原住民歌謠，寫出「台灣山地同胞歌」ê作品，伊講這是伊欲「盡一份對台灣同胞ê情義」ê作品。
1966年文化大革命ê時，江文也被迫剃光頭，罰跪tī塗跤兜向「偉大ê領袖」認罪，每工愛拚十外間ê便所，伊hām中央音樂學院ê教授kah馬思聰院長被下放去保定勞改。1976年四人幫倒台了後，十年ê煉獄結束--ah。江文也才有機會koh kā 伊進前tńg去臺灣ê sî， hām小弟文光鬥陣收集ê原住民歌謠改編做管弦樂ê聲樂曲。1978年伊用生命上尾ê氣力製作「阿里山之歌」ê管弦樂曲，m̄-koh已經是心有餘力不足--ah。十年來ê批鬥kah勞改，身軀已經被改kah hi-leh-leh--ah，腦力koh使用過度，致使腦中風，全身不逐，倒tī眠床五年，一直到1983年病死為止，遺作「阿里山之歌」mā無才調完成。
江文也雖然有台灣、日本kah中國ê背景，m̄-koh tī政治上每一ê政權lóng無欲接受伊ê身份主張。伊ê成就被台灣、中國、日本三方ê政府刻意--ê kā伊放袂記--得，伊tō-sī「生為台灣人ê悲哀」誠實ê寫照。
佳哉tī 1981年海外人士謝里法、林衡哲、韓國鐄等透過舉辦研討會、音樂會kah出版自傳ê方式，同鄉江文也ê作品才再度--ê重新tī臺灣出世。這位長年流落他鄉世界級ê作曲大師，伊所創作出來ê作品，經過坎坎坷坷ê人生，終其尾會當轉來到溫暖ê故鄉--ah！
圖片來源
Comments