top of page
Search

044 高木友枝-台灣ê醫學衛生之父

文稿編寫:蕭如娟 校稿 : 杜荷洲、 李以如


120年前日治時期 ê 初期,台灣 ê 公共衛生系統 iáu-sī tī 一个蠻荒 ê 狀態!鼠疫大流行,病死 kuí-nā 千人。 高木友枝 tō sī tī 這个緊急 ê 狀況之下, hőng 任命到台灣做防疫 ê 工課!


透過故事, 逐家會當比較120 年前鼠疫 ê 傳染病防疫觀念 kah 現此時 COVID-19 ê 防疫觀念是有 siánn-mi̍h 無 sio-kāng--ê 。


除了防疫 ê 工課,高木友枝博士 hām 作育英才 ê 台大醫學院、百年以上歷史 ê 台灣醫誌、台灣文化協會、中央研究所、甚至日月潭發電廠等等 lóng 有真深 ê 因缘。伊 tī 台灣 28 年文武雙全--ê 做真濟跨領域 ê 基礎建設。

臺北帝國大學校長、臺灣總督府中央研究所長高木友枝 。

早年生活 kah 醫界經歷

高木友枝(Ko-Bo̍k Iú-ki, Takagi Tomoe)1858年出世 tī 福島縣 ê 盤城市 (Puân-siânn-tshī) 。

1885年 (27歲) tī 東京帝國大學醫學部讀冊 ê 時, 熟似著後藤新平,兩人個性 tsiânn bā,講話真投機 ! 畢業後高木去鹿兒島 kah 福井 ê 病院做院長。

1893年後藤新平 tī 「相馬事件」中冤枉被關,高木去 thap 後藤 ê 工課缺,入去北里傳染病研究所擔任所長北里柴三郎 ê 助手 ; tī hia 伊學著真濟傳染病 ê 知識。Tī 後藤入監 ê 期間,伊 mā 替後藤照顧 in 厝--裡 ê 人。

1894年發生日清戰爭 (甲午戰爭),日本 ê 軍用船 tī 清國染著 khoo-lé-lah (落吐症);高木奉命成立陸軍臨時檢疫所來防止病菌侵入日本。伊 mā 製造血清用來治療病患,tse 是世界上第一擺用血清來治病 ê 實例。


德國/巴西學習傳染病防制

1897年 (39歲) 伊去德國 ê 傳染病研究所 hām 羅伯·柯霍學習兩年 ê 傳染病醫療。Tī 德國學習 ê 期間伊去過巴西參加花柳病 (hua-líu-pīnn)ê 預防會議 kah 柏林 ê 萬國肺癆 (hì-lô) 會議。這年原配夫人不幸--ê 過身,高木友枝 tō 娶陸路小姐為妻;陸路小姐是 tī 德國識似 ê 一位德國名望家庭 ê 千金。

1900年(42歲)轉來到日本了後,被任命為衛生局防疫課長兼試驗室主任。Tsia--ê 種種訓練,tō kán-ná 是特別為著伊替台灣 ê 防疫做安排--ê 。


台灣期間建立防疫工程 1901年台灣鼠疫大流行,病死了3600外人! 連台北病院 ê 院長 hām 出名 ê 藝妲若奴小姐 mā 是致著鼠疫過身--去--ê !

好友後藤新平當時是台灣總督府 ê 民政廳廳長,伊 tō 去日本討救兵,請高木友枝來台灣協助消滅鼠疫。高木友枝到台灣了後一方面撲殺鳥鼠,一方面設立衛生警察; 用公權力來加強環境衛生,減少虼蚤 (ka-tsáu) ê 數量(虼蚤就是鼠疫流行 ê 源頭)。另外派台灣醫學生去日本參訪,見習日本 ê 防疫方法;並且推捒 (tshui-sak) 全民 ê 鼠疫預防注射 ; koh tī 港口成立試驗所,對清國 ê 船隻實施防疫措施, 防止 in kā 鼠疫、khoo-lé-lah 等 ê 病菌傳入來台灣。

1919 年臺北廳實施家戶大清潔。

後藤新平 koh 建設地上 ê 自來水系統 kah 排污水 ê 地下水道。Tī 多方面 ê 策施之下,經過17年 ê 拍拚,這兩種傳染病 tō tī 台灣漸漸消失--去--ah。


實際上民政長官後藤新平將大部分 ê 醫療工課 lóng 交 hōo 高木友枝來執行--ê 。高木友枝 ê 行事作風有四項鐵原則: 第一、 無用親人,第二、容納無仝 ê 意見 ,第三、樸實,第四、寬待他人, 伊 koh 有歐洲自由思想 ê 做事風格。高木是衛生課長、防疫課長、赤十字會台灣支部副部長、mā sī 地方病 kah 傳染病 ê 調查委員,伊 tō 是台灣醫療事務 ê 負責人 。

黃土水所作ê高木友枝銅像。

擔任台灣總督府醫學校校長

1907年 (49歲) 高木友枝被任命為台灣總督府醫學校校長(台大醫學院 ê 前身)。 伊真重視品德教育, 每禮拜會親身授課倫理修身 ê 課程,這 ê 科目對學生是活 ê 學問,培養出品行優秀 ê 學生。

1912年高木 ê 學生蔣渭水、翁俊明、杜聰明從事抗日運動 ; 總督府欲入去校園掠人,去 hōo 高木校長以 「教育獨立」、「校園自治」ê 理由反對總督府入校掠人!


校長毋若無禁止學生講母語甚至鼓勵學生接觸台灣文化。大弟子杜聰明講先生是一位人格崇高智識廣泛 ê 學者。 15 年來伊 ê 畢業訓詞 lóng 是以「為醫進前, 愛先為人」做為精神指導。 學生畢業了後,先生 mā 會去職業現場關心學生 ê 工作狀況, sūn-sua 享受學生 tī 醫界 ê 成就。


發行台灣醫學雜誌

伊創立台灣醫學會,發行台灣醫學會雜誌 hōo 醫界有發表研究成果 kah 交換醫療知識 ê 機會;雜誌內容 mā 有醫學倫理、實驗成果、醫事法令 kah 人事變更等, 這本雜誌發行到今已經121年--ah,猶閣 tī-leh 發行中,對醫療學術有真大 ê 貢獻。


成立台灣總督府研究所/中央研究所

伊除了 tī 台灣總督府醫學校做校長以外, koh 參考德國 ê 制度 tī 1909年(51歲)成立總督府研究所,提升學術研究 ê 水準。所内有化學部、衛生部、痟狗病(siáu-káu-pīnn)ê 預防射等等 ê 研究。

1913年高木友枝 55歲 ê 時, 文部省肯定伊 ê 成就, 頒發醫學博士學位 hōo 伊。 1921年(63歲)研究所 koh 擴大組織,統合了農業、 糖業、 林業、園藝等試驗所,並且改名叫做中央研究所, 由高木友枝博士擔任創所所長。

中央研究所 ê 創立意義重大,tī 高木博士頂真 ê 領導之下快速 ê 提升台灣 ê 現代化。


成立台灣電力株式會社

1919年 ê 台灣經濟開始發展,糖廠、樟腦廠,工廠攏需要大量 ê 電力。明石元二郎總督請高木博士退出文官體系,轉任日月潭電氣工程 ê 發展計畫,並且成立台灣電力株式會社,由高木博士為創社社長。Tī 伊 十年 ê 拍拚之下,裝置容量成長 285%,年度發電量成長 315%, tī 充足 ê 電力之下, 大大 ê 促進了台灣經濟 ê 發展。


支持台灣文化協會 ê 成立

1921年 (63歲) 高木社長 hām 第三任 ê 醫學校校長堀內次雄去支持並且參加醫學校學生蔣渭水等 ê 台灣文化協會成立大會 ; 參加大會上主要 ê 原因是恐驚日本警察會去成立大會擾亂, in 兩人是頂下屆 ê 校長, 日本警察是會 kā in 尊重--ê。


退休了後 ê 日本生活

1929年(71歲)7月,伊自願 uì 台電退休, 原因之一是日本政府換政黨, 伊 beh hōo 新政府有 khah tsē ê 空間安排人事 ; 另外ㄧ个原因是後藤新平 tī 東京過身--去-- ah,伊失去 tī 政治界鬥陣奮鬥 ê 戰友,無心 koh 留 tī 政治界--ah!

轉到東京以後 「每日新聞」ê 記者 bat 問tuà住 tī 台灣 28 年 ê 高木博士講, 為何 tī 台灣出世 ê 日本人(灣生),是按怎會比土生仔 ê 台灣人素質較差 neh ? 高木回答講原因之一是 tī 台灣 ê 日本爸母看無目地台灣人,連第二代 mā 有天生 ê 優越感,無欲認同本土文化 ; 自命清高 ê 結果就是灣生變成做無競爭力 ê 戇人!

高木博士人生最後 ê 舞台是接任後藤新平 ê 職位, 做台灣俱樂部 ê 副會長,hōo 伊會當繼續關心台灣。往過伊教--過 ê 醫學院學生賴和、杜聰明、 李政源等去日本參訪 ê 時, 會去東京探望校長, kah 伊保持聯絡。

伊講 「毋管別人對我 ê 評價是好 ia̍h-sī 䆀(bái),若我猶賰 (tshun) 有一屑仔 (tsi̍t-sut-á) 氣絲,我 lóng 會替彼粒島嶼 tī-leh拍拚!」。

日本政府肯定高木友枝博士 tuì 台灣醫療衛生 ê 貢獻,頒 hōo 伊正三位勳章, tse 是上 kuân 級貴族 ê 位階。


煞話尾

高木友枝ê銅像,落尾收藏tī彰化高中「高木友枝典藏故事館」。

高木友枝博士對台灣tsiânn 有感情,不管是 tī 醫學 ê 領域裡 ia̍h-sī 總督府中央研究院所,伊 lóng 是以台灣本土做為學術研究 ê 主題。 平淡樸實 ê 高木友枝用伊優雅 ê 人格,高深 ê 學識 kah 政治家 ê 手腕推動台灣 ê 醫療衛生。兩年德國經驗,伊體會著科學 ê 研究愛配合民主自由 ê 環境,才有辦法順序 ê 進行。 伊無為而治 ê 領導風格,hōo 中央研究所 ê 研究員會當自由 ê 發揮 in-ê 才能,所致台灣 ê 學術研究有 tsiânn 可觀 ê 成就。


相片來源說明:

相片A: 臺北帝國大學校長、臺灣總督府中央研究所長高木友枝 。


相片B: 1919 年臺北廳實施家戶大清潔。


相片C: 黃土水所作ê高木友枝銅像。


相片D: 高木友枝ê銅像,落尾收藏tī彰化高中「高木友枝典藏故事館」。







30 views0 comments
bottom of page