霧峰林家是大家族。林獻堂這个tī 歷史課本定定看著ê名(其實…我讀ê歷史課本無伊。 年歲真正有差)，你敢知影伊老ê時陣是蹛tī日本毋敢轉來台灣？是啥物原因hōo這ê少爺決定欲爭取台灣人ê議會？台灣人ê文化啟蒙欲按怎做？ 看不懂嗎? 聽Podcast 用台灣話聽台灣古
台文編寫：郭孟樺 校對：洪偉婷、劉嘉佳 台文改寫：陳翔容
各位聽眾朋友lí好，這是李講古我來聽，tī每禮拜二，欲來講100 ê咱毋知影ê臺灣人ê故事。
阿罩霧林--家ê林獻堂是有財富，有名聲koh有能力ê台灣民族運動領袖。自細漢，伊就展現出眾ê領導才能。1895年臺灣hōo清國kuà 讓hōo日本了後，政治tsin 無安定，伊ê阿媽羅太夫人就命伊tshuā-niá 規个大家族渡海去泉州pī難 1 年。Hit年，伊kan-na 15 歲爾爾。
Tī中國，伊受tio̍h中國文化ê影響，開始有反日ê思想。
第一擺去到日本ê時，林獻堂已經26歲--ah。Tī奈良伊tn̄g-tio̍h 伊景仰真久，發起維新運動梁啟超先生，兩人講起台灣人受著種種無公平ê對待。
林獻堂：「面對日本ê壓迫，台灣人ài按怎爭取民主自由才好？」
梁啟超：「30年以內，清國無才調替台灣同胞出力，請台灣人家己保重，千萬毋通做無所謂ê犧牲，愛模仿愛爾蘭對付英國所採用ê無合作ê模式，mā愛交結日本內地ê中央級ê頭人，通好牽制台灣總督府政治迫害ê策施。 」
四年後，梁啟超逃亡到台灣，就去霧峰拜訪林獻堂，tuà tī 林家萊園ê五桂樓。這擺ê見面，koh khah 加強林獻堂投入非暴力運動ê決心，兩人之間ê談話，變做是日後林獻堂從事民族運動ê上kuân ê指導原則。所致林獻堂若是去到日本，就一定會kah中央官員hām參、眾議員密切來往。
1921年林獻堂發起「台灣議會設立請願運動」，不管時仔tō愛去東京請願， 14年來伊去東京15擺，替台灣人民爭取公平ê政治地位，伊就是咱ê「台灣議會運動之父」。
仝一年，蔣渭水提倡設立「台灣文化協會」，得著林獻堂ê大力支持。蔣渭水tō順勢請林獻堂做協會ê總理。文化協會tī臺灣造成大轟動，in設立ê讀報社，辦電影欣賞、講習會kah演講等等，紹介西方現代化ê思想，毋管去到tó-uī，民眾kā場地tsinn kah tshah-tshah-tshah，tī 台灣成做上時行ê全民運動。
不而過，1920年代是共產主義thuànn去全世界ê年代，這ê潮流，mā對日本內地kah中國傳到台灣。文化協會內部發生路線ê對抗，左派批評林獻堂右派溫和ê路線，文化協會落尾分裂做右派ê台灣民眾黨kah左派ê新文化協會，致使林獻堂tī右派ê民眾黨mā無參與ê空間--ah。林獻堂非常失望kah苦悶，kui-khì 決定lóng-tsóng放手，kah伊兩ê後生去環遊世界。
這逝出遊lóng-tsóng有370 guā 工，價數mā夠一般ê台灣人食一世人koh有tshun，有真濟人苦勸伊莫去，kā錢留--khí-lâi 做抗爭，m̄-koh伊猶是堅持beh去。伊規定家己ta̍k-kang寫日記，定期刊tī日日新報，目的就是beh tshuā-niá 台灣人認捌世界。伊ê遊記m̄-nā寫政治，是各方面ê文化kah生活lóng有生動ê記載。比論講伊去到法國巴黎ê時陣，uan-ná有觀察tio̍h in-ê咖啡館文化：「Pa-lê ê 咖啡店，有一千間以上，是歐洲各國首都內上濟--ê。Pa-lê 咖啡店kah柏林（pik-lîm），倫敦--ê tsiânn 無sio-siâng，伊ê店是一半tī厝內，一半tī厝外。」
1940年台灣開始皇民化ê時代，日本政府欲台灣人同心投入戰爭，林獻堂hőng giú去做總督府ê評議員。64歲ê時，日本政府koh再任命伊做貴族院ê敕選(thik-suán)委員，這是終身，無期限ê職位。經過半生ê請願，伊總算入去到日本議會--ah。
加入貴族院無偌久，日本就戰敗--ah。林獻堂suî歡喜加入中國國民黨，準備完成伊上大向望，來做台灣議會ê議長。第一屆台灣省參議會ê選舉，林獻堂以上kuân票當選參議員。照理講，伊是做議長上適當ê人選。無疑悟，suah出現一位半山ê黃朝琴，伊tī中國20年，早就kah國民黨早建立特別關係，閣有丘逢甲ê後生丘念台tàu疏通，林獻堂姑不而將宣佈放棄競選議長。簡單講，中國國民黨無愛有自治思想，有影響力ê林獻堂，in ài--ê，是早就去中國表示效忠，tī 台灣無ka-kī 跤手ê黃朝琴。
紲落來，到1949年，林獻堂hām台灣議會ê議員mā無法度做--ah。伊以欲去東京治療頭疼ê理由，退出政壇離開台灣。事實上，he是因為二二八事件後，長官公署出面征收台中縣400萬斤ê粟仔，引起糧食不足，糧價大起。警備總部派武裝憲兵，命令林獻堂kā存tī萊園ê糧食交出來。加上真濟伊日本時代做伙ê民族運動戰友，mā lóng 已經hōo中國國民黨逮捕，伊家己mā tī 逮捕名單頂懸，險去食免錢飯。無奈何（bô-ta-uâ），伊kan-na會當趕緊離開臺灣，保性命。
伊tī東京ê時陣，蔣介石有派人kā伊暗殺，hó-ka-tsài伊有貴族院議員ê身份，日本政府有派人保護伊，暗殺tsiah無成功。伊ê好朋友蔡培火奉國民黨ê命令去日本勸駕林獻堂轉來台灣。(相片：蔡培火赴東京請林獻堂回臺tī東京合影)
原底，伊真正kā東京ê厝賣掉，準備轉台灣，m̄-koh上尾一秒，伊猶是決定留tī東京。
伊講：「危邦不入，亂邦不居；受過先聖人ê教訓，哪會敢袂記。台灣，是危邦，亂邦，ná-ē thang入去，ná-ē thang khiā。Koh毋是kan-na危亂爾爾，是完全無法律，一切任蔣介石決定人是生抑是死；我若轉去，就kah籠仔內ê雞無啥無仝款--ah。」
（危邦不入，亂邦不居；曾受先聖人之教訓，豈敢忘之也。台灣者，危邦、亂邦也，豈可入乎，居乎。非僅危亂而已，概無法律，一任蔣氏之生殺與奪；我若歸去，無異籠中之雞也。）
林獻堂15歲tshuā-niá 規家伙仔去泉州避難ê時，1 年就轉去台灣。無疑悟，68歲孤1 ê去到日本bih中國國民黨，suah一世人lóng無法度koh轉去故鄉阿罩霧。伊ê第二囝林猶龍tī台灣過身ê時陣，伊猶是無法度轉--去。隔轉年，伊就tuè 猶龍ê跤步，去天國相會--ah， hióng-liân 75歲。
林獻堂一定無想到伊等待「祖國」一世人，等--來--ê竟然是會迫害伊ê獨裁政者。一世人對抗ê日本，suah成做是保護伊性命ê恩人。人生，實在是真pháinn 算--ah～～
Beh知影林獻堂先生koh較濟環遊世界ê記錄，請參考《林獻堂環球遊記》。
今仔日咱ê故事就講到tsia，咱後禮拜才koh來坐。
相片3 臺灣議會設置請願活動 東京留影 《新紀元》第424期 20150416 相片4 台灣文化協會第一屆理事會 風傳媒 相片5 林獻堂中與大兒子攀龍(倒爿)、小兒子猶龍tī巴黎街頭合影 《故事》 相片6 林獻堂於1921赴東京遊說設置臺灣議會 維基百科 相片7 《林獻堂環球遊記》 天下文化出版
Comments