top of page
Search

047 鄭氏王朝

明華園製作了《海賊之王─鄭芝龍傳奇》ê戲,鄭氏家族雖然最後hōo施琅phah敗,投降清國,反清失敗,m̄-koh tī彼時in是稱霸一方ê海賊王、貿易商,對台灣ê影響真深,mā一直受tio̍h後來台灣各政權ê推崇。


In家族對台灣有siánn-khuán實際ê貢獻?Koh是按怎「鄭氏王朝」會受著後來ê政權——清國、日本帝國kah中華民國——lóng beh kah推崇--leh?

(看不懂台文? 無要緊,從 podcast用台灣話聽台灣古)

文稿編寫:林琪蓁 校對:吳鈺瑾、陳翔容


海賊王hām日本武士千金之子 鄭森是1624年出世tī日本肥前國ê平戶籓(phuann)--ê。老爸鄭芝龍是tī日本做生理ê海賊。鄭森是鄭芝龍hām日本人田川小姐所生--ê。六歲ê時,鄭芝龍kā伊接tńg去福建,改名做鄭成功,送伊去南京金陵,是tī國子監讀冊ê監生,讀完冊了後,提tio̍h明國ê功名。


海賊王父親自投羅網

21歲ê時,清國ê兵馬攻入江南,老母田川氏tī亂軍中自盡。鄭芝龍招鄭成功鬥陣去福州向知府博洛投降,被鄭成功拒絕並再三--ê苦勸,老爸iáu是堅心 uì安平港出發,去福州ê天興府投降。沿路各縣府ê文武百官出城迎接,phong-phài ê招待,隆重ê儀式。到福州天興府鄭芝龍hām知府博洛兩人at箭tsiù-tsuā成做換帖--ê,博洛設宴hōo投降軍痛飲三工了後,kā鄭芝龍500名隨身ê侍衛調走,挾持鄭芝龍去到北京kā伊斬頭;三囝世恩、四囝世蔭、六囝世永等mā tuè leh人頭落地。德國ê記者Albrecht Wirth講:鄭芝龍是「戇kah bē pê-tsiūnn」--ê,滿清用lia̍h厝鳥ê鳥籠仔,lāi-hio̍h竟然家己nǹg入去籠仔內。


據守東南沿海 拒絕投降滿清

1657年鄭成功tshuā老爸殘留--落-來ê部隊tī東南沿海反抗清國。兵部侍郎王忠考推薦21歲ê泉州同鄉陳永華hām鄭成功討論政局,陳永華發表伊對未來政治趨勢ê見解,受tio̍h鄭成功ê欣賞,講伊是當代ê諸葛亮,封伊為參事,並且做為大漢囝鄭經ê老師


有可能是洪門開基祖

鄭成功發現tī閩南ê知識份子,追求個人ê利益,意志無夠堅定,有會hōo清國安撫投降ê傾向。M̄-koh民間ê基層志士,卻是一心--ê心向明國,m̄願做清國奴。民氣可用,鄭成功tō成立「金台山」,自封「山王」,手下ê人自稱是「洪門」ê志士,「洪門」以朱洪武ê後代自居,lóng是一家人,一律平等,互稱「兄弟」。後--來陳永華tī台灣整理洪門會務ê章程,以「陳近南」ê名號宣揚組織。「洪門」流傳到廣東以後,為避免清國ê注目改名為「三點會」、「三合會」、「天地會」,主旨lóng是「反清復明,振興中華」,入會需要有人紹介,入會後tō是兄弟--ah,iā是生死之交ê親人。內面設有龍頭、坐堂、執堂、心腹、巡風、么滿等職務,洪門有組織、有紀律。台灣ê角頭、烏道ê不良份子自稱是「兄弟人」,tō是由洪門天地會而來--ê。


台灣鹿港ê福靈宮、沙鹿ê福興宮tō是祭拜洪門天地會九龍山ê王勳為主神。1721年台灣朱一貴鴨母王ê反清起義、1911年孫文推翻滿清,lóng hām烏社會ê洪門天地會有直接ê關係。


愛恨分明 性格猛烈 險咧刣死親生囝孫

1661年鄭成功東征台灣ê時,命令陳永華kah馮錫範隨護世子鄭經,愛堅守金門、廈門。鄭成功奪取台灣了後,聽tio̍h廈門傳來ê消息講,鄭經ê第一ê囡仔鄭克𡒉(Tēnn Khik-tsong)是鄭經kah四弟ê奶母陳昭娘私通所生--ê;陳氏身分低賤,這ê囡仔ê出世,hōo鄭成功真正憤怒,命令大兄鄭泰去廈門監督,beh kā鄭經、鄭克𡒉、陳昭娘kah管教不當ê鄭經老母董夫人等斬頭。鄭泰恐驚鄭成功到時會反悔,按呢伊ê生命mā可能會不保--ê。伊tō以皇兄有抵抗王命ê權力,放in一馬,只thâi死陳昭娘niā-niā。此事傳到鄭成功,伊非常ê受氣,無guā久suah突然間病死--去。Tī台灣鄭成功ê小弟鄭襲(Si̍p)趁機會篡位,自立「東都主」beh繼承大兄鄭成功ê事業。


智取親叔叛亂

這時,tī廈門ê鄭經mā自行宣佈繼承老爸ê王位,並且giâ明國ê寧靖王朱術桂做kha̋ng-pán表示伊是明國ê正統。Tī諮議參軍陳永華kah侍衛長馮錫範ê協助,整備兵馬東征台灣,beh討伐阿叔鄭襲。艦隊駛到澎湖ê時,鄭經聽從老師陳永華ê建議,先禮而後兵--ê宣布,世子tit-beh帶領六ê軍團,班師回朝,辦備延平王鄭成功ê後事。這ê宣告發布以後,大部分ê文武百官lóng出城迎接世子回駕,kan-na安平ê李應清、蕭拱宸、曹從龍等有小規模ê反抗。平定王位爭奪戰了後,鄭經tshuā阿叔鄭襲tńg去廈門ê大本營就地監管。想bē到--ê是,後--來鄭襲suah tī一年後投降清國;大將周全斌、黃廷mā tuè leh投降。鄭芝龍、鄭成功手--裡辛苦經營來ê閩南海賊基地,就此tō失去--ah。


設屯田制 搶土地 遷軍眷駐台

失去大陸江山ê鄭經tī 1664年tńg到台灣,自稱是「東寧國王」,國際貿易ê文書中kah外國人mā稱呼伊為The King of Tyawan。伊kā查某囝嫁hōo總制陳永華做新婦,另外一ê查某囝嫁hōo侍衛長馮錫範做新婦,tō是beh hām兩位當朝上重要ê大臣建立姻親關係,來鞏固伊ê政權。總制陳永華ê地位如同宰相,伊設立「十年成長,十年教養,十年成聚」ê長期方針。首先愛解決--ê是糧食ê問題,伊設立軍人平時愛種田,戰時愛做兵ê「營盤田」屯田制度,命令tī唐山ê軍人眷屬遷移到台灣,來安撫軍心,beh做長期抗戰ê準備,koh收留10外萬ê唐山難民共同開發台灣ê農地。鄭經tō四界去搶原住民ê土地,來hōo 25萬漢人通好有地耕作。有一擺劉國軒將軍去到大肚王國ê沙轆社搶原住民ê土地ê時,遭遇沙轆社ê反抗,劉國軒kā沙轆社ê人,thâi死到tshun六ê人niā-niā。鄭經ê 政權tī短短ê四年間,搶盡原住民ê土地,自1666年開始,25萬漢人ê糧食問題tō免煩惱--loh。

興辦教育

陳永華起聖廟、設立學校;建立教育、考試、用人ê一貫制度。設立高等學府「太學」,tī三年ê學習中,每個月lóng有考試,來要求學生認真讀冊。每三年舉辦殿試,政府取人才,士子有功名。鄭經mā重視文學,禮遇文人沈光文、王忠孝等為老師,教育人才。Tī 1664到1674年ê十年期間,lóng是和平、安定ê時期,推sak教化ê工課,相當--ê順利。陳永華ê第二後生中tio̍h進士,tse tō是伊提倡教化ê成果。


製鹽

台灣所有ê鹽lóng是uì唐山高價進口--ê。陳永華tō引進製鹽技術「lâm滷曝鹽法」,tō是kā海水不斷--ê引入來沙土--裡,koh再kā鹹ê砂土過濾提煉,提去tī塗跤--兜ê瓷仔池曝日,曝--出-來--ê tō是品質tsiânn好ê白鹽。It--來免uì唐山進口,jī--來部分ê白鹽mā會使賣去呂宋、日本。


貿易興盛 街市繁榮

鄭--家自鄭芝龍開始tō以海賊王自居,每一隻uì台灣海峽通過ê船隻lóng愛交保護費,依照船隻ê大細,發「報水牌」ê號令,毋管是去東洋--ê, iah是去暹羅ê船隻。每年大隻船愛交2000兩ê白銀,細隻船交500兩ê白銀,可觀ê收入tō壯大鄭--家ê勢力。鄭--家設立「山五商」,以杭州為採購中心,杭州ê絲綢、江西ê瓷仔、紹興ê lâ-lí、藥材等,透過以廈門為中心ê「海五商」,經過仁、義、禮、智、信ê系統送去各地;In向日本出口砂糖、鹿仔皮、米糧、鹽、藥材等,買日本ê銅炮、刀具、盔甲、永曆幣錢轉口去暹羅、交趾做國際ê三角貿易。因為清國實施海禁,西洋各國lóng無法度買tio̍h瓷仔,鄭經突破清國ê封鎖,走私瓷仔去日本賣,再由日本轉口去歐洲,伊是世界唯一瓷仔ê供應商。以上所thàn ê錢,養兵十萬,戰船數千,會當強盛--ê對抗清國26年,當時ê台灣街市繁榮,物產豐富,袂輸清國領土ê任何所在


反攻大陸失敗 鄭經失志 太子失勢相繼怨死

1673年平西王吳三桂聯合靖南王耿繼忠起兵反清,邀請鄭經以水師軍參加起義。鄭經mā beh趁機會反攻大陸,tī七年ê戰鬥中,結果是吳三桂、耿繼忠被lia̍h、頭被斬--去,鄭經逃回台灣。就此鄭經意志消沉,不理政務,沉迷tī酒色當中,身體就此phah pháinn--去,倒tī眠床--裡peh bē khí-lâi。這時鄭氏王朝ê東寧國分做兩派,一派是tú uì唐山轉--來--ê反攻大陸派ê軍人劉國軒、馮錫範,另外一派是鎮守台灣支援後勤ê文人鄭克𡒉、陳永華。兩派ê人馬lóng想beh掌權,經過激烈ê惡鬥以後,軍人ê反攻大陸派得tio̍h政權,陳永華就此退出政壇,不問世事--ê tī 1680年失志而死,享年46歲。隔轉年「東寧國王」鄭經死,陽壽39歲。鄭經死了ê第三工,監國ê世子鄭克𡒉被軍人馮錫範thâi死,得年19歲。馮錫範另立13歲ê囝婿鄭克塽為「東寧國王」,自封忠誠伯,所有ê東寧國事lóng由馮錫範決定。


清國派叛將施琅攻克澎湖台灣

清國得tio̍h這ê大好ê消息,tō派鄭成功進前ê海軍大將,這馬投降tī清國ê施琅,準備船隻、糧草通好出兵台灣。1683年施琅率領兩萬軍士kah 600隻戰船向澎湖進軍,守軍馮錫範派伊ê好友劉國軒tshuā領六千軍士kah戰船120隻出兵迎戰,兩方ê兵力相差tsiânn tsē,施琅佔tī風頭--裡,順風勢--ê攻入媽宮,劉國軒正pîng ê目睭中箭,逃回台灣。1683年陰曆8月13日施琅ê大軍到府城ê鹿耳門ê時,14歲ê「東寧國王」鄭克塽率領馮錫範、劉國軒、何祐等文武百官tī海邊恭候施琅,ànn-thâu投降。結束鄭氏王朝tī台灣建立--ê歷經三代人、經營21年ê東寧王國。事實上,清國進前tō成立引誘東寧國投降ê專職單位「修來館」,tī 4年間不斷--ê發動招撫、和議、勸降,尾手koh有加強版ê挾降、待降、誘降、迫降ê各種方式強迫東寧國就範ê策略。


仝個月,鄭成功ê 6 ê後生、鄭經ê 9 ê囝、劉國軒kah馮錫範ê子弟hām明國遺孤朱桓等,即時--ê hőng送去唐山。另外,25萬ê漢人mā是全部被遣送去清國大陸,徹底--ê清理tī台灣ê鄭氏子民

台灣西部hām噶瑪蘭(宜蘭)納入清國ê版圖

Suà--落-來台灣應不應該留tī清國版圖ê問題,正、反兩方lóng各有說詞,經過8個月ê考慮,清國接受施琅ê意見,kā台灣1/3 ê土地,由打狗向北ê西海岸hām噶瑪蘭納入清國ê版圖,隸屬於福建省,由東寧國改名轉做「台灣」。清國雖然佔領台灣,m̄-koh是消極ê對待台灣,無beh認真經營,並無制定建設台灣ê方針,清國無相信台灣人,軍事是派清國ê軍兵來台鎮守--ê,軍士是三年一任,六年一換,in看台灣是邊緣ê化外地帶,以殖民ê手段壓榨、豪奪台灣ê物資。


俗語講「三年官、兩年滿」tō是講來台灣做官,兩年lak袋仔tō té kah滿滿滿--ah。 投降後被送去唐山ê官兵,身體khah勇健--ê被派去各戰場做敢死隊,不死不歸,其他--ê被分派去各所在開墾荒地,顛沛流離--ê,連起碼通khiā ê所在tō無。鄭克塽雖然是被封正黃旗漢軍公,伊是南方人卻tuà tī北方ê寒地,有官名,無權、無錢,死坐活食--ê,鄭--家財產耗盡,囝孫失志,自án-ne,in tī歷史ê舞台慢慢--á消失去。


鄭成功是tsi̍t ê失敗者,被清國迫退到台灣ê失敗將軍,家庭倫理敗壞,m̄是人民ê表率,伊tī台灣tuà無一年,時間tsiânn短,m̄-koh四百年來一直是hōo台灣各殖民國推崇ê偶像。


清國tī 1874年為tio̍h beh tī台灣推sak海防事務,防止外國人來犯,將叛國ê海賊,bat kā荷蘭人趕走ê鄭成功,美化形象,定位為「忠義典範」、「移忠作孝」、「為民表率」ê模範人物。Tī台南起一間福州式ê建築「延平郡王祠」每年文武百官作詩讚頌。


日本時代ê殖民當局,利用有大和民族血統,bat統治過台灣ê鄭森,hōo台灣人認為日本政府是繼承鄭森來統治台灣--ê,án-ne來解釋統治ê合理性。將「延平郡王祠」改做「開山神社」,整修為神社ê模樣。


蔣介石ê中國國民黨被共產黨迫退來台灣後,搖身一變成做台灣ê統治者,tú-tú好是hām鄭成功仝款,in兩人lóng是同病相憐ê失敗將軍。蔣介石kā鄭成功美化做「民族英雄」、「忠於領袖」,tī教科書中強調「光復台灣」、「反攻大陸」ê事蹟,宣稱伊是偉人。自án-ne,tī台灣tuà無一年ê「民族英雄鄭成功」ê印記tō一直流傳tī台灣人ê心中。1963年以後,每年由行政院派內政部長擔任「延平郡王祠」ê主祭官,列為中樞祭典之一。福州式ê建築hām開山神社被拆掉,另外新起一間中國北方宮殿式ê「延平郡王祠」。正殿ê入口掛有中華民國ê國徽,蔣介石親筆提名牌匾「振興中華」,表示伊mā是中華ê正統。



45 views0 comments

Comments


bottom of page