國際知名 ê 電影導演李安 mā bat hőng 霸凌、聯考失利、而且失業6年--過？伊是按怎 hām 藝術結緣，按怎用台灣水牛精神，拍出一齣 koh 一齣感動人心、koh 定定著獎、 拍破 tsē-tsē 記錄 ê 電影？請 kah gún 做伙來聽李安導演 ê 故事。
讀台語有點吃力? 用耳朵聽台語講古「李安-世界級 ê 電影大師」
文字編輯：陳亞彤
校對：杜荷洲 李以如 蕭如娟
屏東出生 花蓮大漢 師範學校校長之子
李安導演是1954年出生 tī 屏東潮州--ê。出世 ê 時頷頸 hōo 肚臍帶 kenn--tio̍h，佳哉醫生即時趕到厝--裡，平安-- ê kā 伊順利接生，老爸 kā 伊號做李安。名字 ê 「安」字 mā 有另外 ê 意義，祖厝是 tī 江西 ê 德安，逃難到台灣 ê 時，坐 ê 船號做「永安輪」。李安 ê 老爸李昇1956年接任花蓮師範學校校長，李安 tī 花蓮師範附小接受美國式 ê 啟發教育，班上 ê 同窗大部分是講『國語』ê 外省人，伊講師範附小是伊求學中上快樂 ê 日子，花蓮師範學校 ê 另外一个任務是教育退伍軍人去做老師 ê「師訓班」，來自不同省份南腔北調 ê 陸、海、空軍 ê 退伍軍人，定定會開同樂會，會邀請李安去台頂唱『家在山那邊』、答喙鼓 kah 李安自導自演 ê 話劇。
搬去台南 考入去國立藝專
10歲 ê 時，老爸李昇調到台南二中 ê 校長，李安去讀台南市公園國小是一班70人，一年級有20外班 ê 大學校，in lóng 講伊聽無 ê 台灣話。老師 kā 成績無好 ê 學生叫去講台，kā in siàn tshuì-phué，tse sī 李安一世人第一擺 hőng 拍--ê。李安上頇顢(hân-bān)--ê 是數學，到30外歲--ah，猶 koh 會做算 bē 出答案 ê 惡夢。高中 ê 時入去台南一中，「北有建中，南有南一中」上蓋出名升學率 kuân ê 的高中。台南一中校長李昇 ê 要求，李安暗時愛去參加惡性補習，m̄-koh 成績一直無蓋理想，伊定定 tī 日時做春秋大夢，第一年 ê 大學聯考差6分無考 tio̍h 學校，第二年 ê 聯考緊張 kah 腹肚痛、流凊汗，koh 再無考牢學校；老爸安排黃重嘉老師替伊補習，黃老師 kā 伊當做朋友--ê tshuā 伊去看電影、欣賞音樂，引導伊去賞文論字。第三擺 ê 聯考，佳哉影劇 ê 術科成績考了 bē bái，彌補學科 ê 不足，hōo 伊如願--ê 考入去國立藝專影劇學校。
uì寫舞台劇台本開始
Tī 藝專 ê 大舞台，李安 ê 靈魂第一改得 tio̍h 敨(tháu)放，tshuē tio̍h人生 ê 目標。學姊施秀芬安排伊搬舞台劇「詩人」中 ê 腳數(kioh-siàu)，成功 ê 演出了後，受邀請擔任過15齣 ê 男主角。二年 ê 時伊 kā 老爸討一台8 釐米 ê 攝影機，李安 kā 這个寶貝機器，拍一部18分鐘 ê 處女作「拜六下晡 ê 懶趖( lán-sô)」。這部片表達出藝術家面臨理想 hām 現實落差 ê 挫折 kah 掙扎，也反應伊對電影充滿向望 kah 對前途混沌不明 ê 心境。伊用這部短片申請入去紐約大學電影系研究所。李安對所有 ê 藝術 lóng 有趣味，伊 bat kah 申學庸教授學聲樂、學過芭雷舞、寫過一萬外字 ê 短篇小說「失去形體 ê 焚鶴人」、家己自編自演獨幕劇「阿奇」，mā bat hām 余季鬥陣畫素描。電影是一種綜合 ê 藝術，李安有音樂、舞蹈、寫作、美術、戲劇等 ê素質，伊 kā tsia-ê 素質融合成做李安先生特有 ê 電影表達方式。
佇紐約大學受著肯定
1980年伊 tī 紐約大學二年 ê 時，拍過「陰涼 ê 湖邊」，得 tio̍h 金穗獎最佳劇情短片 kah 紐約大學 ê 獎學金，畢業作「分界線」是描述紐約唐人街 ê 附近，分做南爿 ê 華人 kah tuà-tī 北爿 ê 義大利人，in 為 tio̍h 生活 tī-leh 走傱，互相衝突 ê 故事。這个作品 ê 預算，動用伊拍工儉--出-來--ê、爸母鬥相共--ê、未婚妻林嘉慧贊助 ê 新台幣100萬拍--出-來--ê「分界線」，得 tio̍h 紐約大學 ê 學生影展最佳影片、最佳導演 ê 光榮。
結緣牽手
林嘉慧小姐是李安去威廉波特看青少棒冠軍賽 ê 時，坐仝車身軀邊 ê 小姐，兩人一見鐘情--ê 五年後 tī 紐約市政府登記結婚。彼工，翕相 ê 馮光遠遲到，所以 in 到今猶無結婚時 ê 相片；好友鄭淑麗租一間電影 ê 工作室，結婚舞會 tī 工作室 ê 佈置，是提電影道具、佈景來裝飾--ê，逐家 lóng sńg kah 真歡喜，一直到半暝翻點才結束。M̄-koh 對遠遠坐飛龍機、對台灣來參加婚禮 ê 教育家老爸李昇，感覺提 tio̍h 紐約大學碩士 ê 大漢後生 ê 婚禮，無夠莊嚴 kah 隆重，感覺有一寡失望。舞會中 mā 放映兩禮拜進前才完成 ê 畢業作品「分界線」。這擺婚禮過程 ê 情節，mā 成做「喜宴」電影製作 ê 題材。
畢業了後留tī美國suah失業六年
畢業後，李安準備回國發展，tn̄g leh 裝行李箱beh tńg去台灣，接 tio̍h 美國三大經紀公司之一 ê 威廉•莫里斯公司 ê 電話講，看 tio̍h 李安 ê 第一名畢業作品「分界線」，真正滿意想 beh kah 李安簽6年 ê 合約，希望李安會當留 tī 美國發展；李安講威廉•莫里斯 kā 伊 o-ló kā 茫 su-su、強強 beh peh 上天--去，是無法度 kā 伊拒絕--ê。6年 ê 合約期間，李安 kā 寫好 ê 劇本、導演 ê 工作計畫，提去30外間電影公司，beh 爭取工作機會，所得 tio̍h ê 答案 lóng 是「聽候通知」。紐約大學第一名畢業 ê 李安，一年以來 lóng 趁無半仙錢，心內開始鬱卒(ut-tsut) ê 時，佳哉夫人得 tio̍h 博士 tī 紐約 tshuē tio̍h 頭路，hōo 李安會使 tī 6年 ê 失業中，研讀電影 ê 冊、看電影 ê 報導、欣賞不同風格 ê 電影，練出一身 ê 電影基本工夫。伊 mā 是 tshiânn gâu 煮食、gâu 騙囡仔 ê 家庭主夫。
《父親三部曲》以描寫美國華語族群ê作品 開始受tio̍h重視
36歲 ê 時，第二後生 ê 出世，帶來好運。伊寫 ê 劇本「推手」、「喜宴」得 tio̍h 台灣新聞局 ê 劇本獎，獎金新台幣50萬。中央電影製片公司副總經理徐立功，準備新台幣1,200萬 ê 凍霜預算，邀請李安 hām 猶太人好友詹姆士合資 ê 「好機器」公司簽約。「推手」是李安 ê 第一部劇情長片，故事是發生 tī 美國華僑老人 ê 移民故事，男主角是由郎雄主演--ê。「推手」得 tio̍h 金馬獎9項入圍 ê 肯定，得 tio̍h 最佳男主角、最佳女配角、最佳評審團獎 ê 榮譽， koh 得 tio̍h 亞太影展 ê 最佳影片、法國影展 ê 最佳處女作導演獎。
徐立功看 tio̍h「推手」ê 成功了後，鼓舞「好機器」公司再度合作，拍同性戀 ê 題材「喜宴」ê 電影，tú 開始李安有一寡張持(tiunn-tî)，伊對同性戀人士 ê 心理狀態無蓋了解，m̄-koh 好友詹姆士鼓勵伊接這个案，伊有真 tsē 同性戀 ê 朋友，伊了解 in ê 想法；詹姆士 mā 答應李安會鬥寫劇本。「喜宴」ê 故事是華人同志趙文瑄，想 beh 追求家己 ê 同志性向，koh 愛滿足序大人對婚姻生囝 ê 期待，bē 當兩全其美 ê 心情寫照。「喜宴」得 tio̍h 金馬獎最佳影片、最佳劇本、最佳導演，成本75萬美金 ê「喜宴」，全球 ê 票房達到3,200萬美金。
這兩部華人 tī 海外生活 ê 題材電影，發行成功了後，徐立功 koh 再提3,800萬新台幣 ê 預算，台灣新聞局加碼1,000萬 ê 電影補助金。「飲食男女」是 Made in Taiwan--ê、tī 台灣拍片、上有台灣味--ê、探討老爸 kah 三个查某囝 ê 親情故事。一个圓山大飯店 ê 老總鋪師失去味覺了後，由三个無想 beh 結婚 ê 查某囝相親 ê 安排，古井生波--ê 重新恢復喙舌 tām--出-來 ê 滋味感覺，tshuē 出人生愛情 ê 第二春。這部大作 tī 在台灣 ê 票房 kan-na 是「喜宴」ê 一半 niā-niā，tī 金馬獎 mā lóng 槓龜--去。顛倒是 tī 海外大大 ê 出名，得 tio̍h 美國影評協會 ê「最佳外語片」、美國年度十大影片 ê 第七名、亞太影展 ê「最佳影片」、奧斯卡 ê「最佳外語片」。
受邀邁進美國影業 執導演筒
美國哥倫比亞電影公司 ê 製片琳賽•杜倫看 tio̍h 李安 ê「父親三部曲」推手、喜宴、飲食男女 ê 電影了後，主動--ê 邀請真 gâu 掌控內心戲 ê 李安，導演一部超過「飲食男女」十倍 ê 預算，由出名 ê 小說改編 ê「理性 kah 感性」，是由世界級 ê 大明星休葛蘭、艾瑪•湯普遜主演，in lóng 是為 tio̍h 這本出名 ê 著作，想 beh 拍出好ê 內心戲，留落好名聲 tī 電影界，純然 m̄ 是為 tio̍h beh 趁錢而來--ê，逐家自我要求真 kuân，向心力 tsiânn 強。劇本是由女主角艾瑪•湯普遜用四年 ê 時間編劇，艾瑪是典型 ê 英國淑女，伊人品、學識、見解 lóng 超過李安真 tsē，李安 lóng 不時向伊請教學習，到落尾，兩人 ê 交情不斷 ê 增進，親切感 hām 配合度不斷 ê 增加，艾瑪 mā 成做李安一生 ê 好朋友。好友詹姆士替李安收集1775—1817年英國奧斯汀時代 ê 文藝思想，有關 ê 素材。拍完電影李安 ê 英文加進步 tsiânn tsē，人 mā 變 kah 巧，伊發現 tī 西方拍片，導演上重要 ê 工課，tō 是愛 hōo kah 你合作 ê 團隊 kah-ì 你。「理性 kah 感性」得 tio̍h 柏林金熊獎，金球獎 ê 最佳影片，英國影藝學院最佳影片、最佳女主角、女配角，奧斯卡最佳改編劇本，全美影評人協會 ê 最佳影片、最佳導演。全球 ê 票房超過兩億美金。李安 tō 由亞洲級跳到國際級 ê 大導演，證明台灣來 ê 導演，mā 會當 tī 好萊塢創造票房 kah 經典作品 ê 雙贏導演。
「臥虎藏龍」(ngōo hóo tshàng liông) 打造武俠電影新里程碑
李安 m̄ sī 部部電影 lóng 順利--ê，伊拍 ê反越戰「冰風暴」kah 南北戰爭 ê「Kah魔鬼共騎」lóng 槓龜--去，若照好萊塢 ê 迷信，第3部電影絕對 bē 使 koh 再摃龜--ah；伊只好去拍通俗片，來突破票房不利 ê 魔咒。李安少年 ê 時愛看武俠小說，小說內有主角 ê 俠義精神、有千變萬化 ê 情節 koh 有傳統文化 ê 內涵。由徐立功聘請蔡國榮改編 ê「臥虎藏龍」(ngōo hóo tshàng liông) 英文劇本猶原(iu-guân)是由好友詹姆士擔任--ê。這部籌備五年，預算是「飲食男女」ê 十倍，美金1,500萬，演員周潤發、楊紫瓊、章子怡、音樂家馬友友，kah 台灣、香港、美國、中國合作 ê 製作團體，合齊打造出有人文精神 ê 武俠電影。李安放棄舊有 ê 武俠文化，慘入去西方 ê 元素，受 tio̍h 中國電影人士反抗性 ê 批判；m̄-kōh 「臥虎藏龍」卻創造華語電影 ê 世界票房記錄。2000年 tī 坎城影展 ê 世界首演，聽 tio̍h 觀眾10分鐘 ê 噗仔聲，tō 知影「臥虎藏龍」受 tio̍h 觀眾 ê kah-ì。上 hōo 李安歡喜--ê 是連歐洲、亞洲票房 mā tsiânn 好。投資人徐立功 kah「好機器」趁 tio̍h 五倍以上 ê 利純。李安 tī 茱莉亞•蘿勃茲 ê 手中提 tio̍h 全球最佳 ê 導演獎，奧斯卡10項入圍 ê 肯定，提 tio̍h 最佳外語片、最佳藝術指導、最佳攝影、最佳音樂，kan-na 美國 ê 票房 tō 有美金1億2千外萬，拍破外國電影 tī 美國上演 ê 記錄。
2005年台灣導演李安拍出「斷背山」，故事 ê 主角想 beh 創造出斷背山式 ê 理想世界，片中充滿 tio̍h 存在主義 ê 孤單美感，雖然是以同性戀為主題，m̄-koh 電影所表達 ê 精神，已經達到 koh kah kuân ê 感情層次。可惜--ê 是中國人 ê 文化品味落伍，禁演這部電影。「斷背山」是華人導演得獎上 tsē ê 電影。51歲 ê 李安受 tio̍h 威尼斯、全球獎、美國導演協會、全美影評人 ê 十大影片，所有 ê 肯定，李安個人完成了威尼斯、坎城、柏林、奧斯卡四連霸 ê 輝煌成就。成本 kan-na 美金1,400萬 ê 「斷背山」，全球票房達到1億6千萬；tō 親像「臥虎藏龍」仝款是投資報酬率上 kuân ê 電影，是文化創意產業 ê 典範。李安導演 ê 片酬已經達到新台幣5,000萬--ah！
李安 tshím 到美國伊利諾伊州大學讀電影 ê 時，教授所選用 ê 近代經典劇作，差不多 lóng hām 「性」有關連--ê，而且是強烈--ê，hōo 李安意識到「性」是西方戲劇中，重要 ê 因素。李安 kā 張愛玲 ê 短篇小說改編做電影，故事是二次世界大戰 tī 上海 ê 日本佔領區，所發生 ê 國民黨情報員 ê 情慾情節。劇本是由好友詹姆士 hām 王蕙玲合編--ê，「色、戒」tī 劇中有男主角梁朝偉 hām 湯唯真槍實彈 ê 做愛鏡頭，hōo 美國 ê 電影院、連鎖院線拒絕「色、戒」上線。為 tio̍h beh tī 中國上映這支反日電影，李安 kā 電影中 ê 性愛鏡頭鉸掉，m̄-koh tī 台灣卻是原封不動--ê 全套上演，得 tio̍h 第44屆金馬獎最佳影片、最佳導演、最佳男主角、最佳新演員湯唯、最佳改編劇本等九項獎項。李安 mā 因為「色、戒」這支電影，被威尼斯電影節聘為評審團主席。
唯一得 tio̍h 兩改奧斯卡最佳導演獎 ê 亞洲人
2011年製作出3D鏡頭 ê 數位電影「少年Pi ê奇幻漂流」。電影是描述印度 ê 少年家Pi，逃過船難 ê 危險了後，tī 海上 hām 一隻孟加拉虎 tī-leh 小船內，一人一虎--ê 鬥陣227工 ê 故事。李安用細路 ê 手法，kā 兩方 uì 緊張 ê 氣氛到互相依靠，到最後兩方渡過難關 ê 情節表達出來。片中美麗 ê 景緻、動物 ê 生動 kah 少年 ê 純真，lóng hōo 李安用鏡頭 kā 牽牢牢--ê 連做伙。觀眾雖然相信所有 ê 故事情節，卻是憢疑(giâu-gî) in 所看 ê 是真？是假--ê。「少年Pi ê 奇幻漂流」證明李安是一个有豐富創造力 ê 視覺藝術家。李安開1億5千萬 tī 台中水湳機場打造 ê 人造海浪池，會當製造出100外種 ê 海浪；電影完成了後，李安 kā 人造海浪池免費--ê 留 tī 台中供民眾參觀使用。這部電影 tī 中國拍破李安 ê 電影票房記錄。該片得 tio̍h 第70屆 ê 全球獎 ê 最佳電影、最佳攝影、最佳配樂 ê 大獎。奧斯卡入圍11个獎項 ê 肯定：提 tio̍h 最佳視覺效果獎、最佳導演獎。李安是唯一得 tio̍h 兩改奧斯卡最佳導演獎 ê 亞洲人。
李安所導演 ê 題材是多元--ê、寬闊--ê，伊有深厚 ê 中原文化 kah tī 台灣滋養出來 ê 內涵，kah 有 tī 西方學院訓練出來 ê 能力，伊會當融合出東方、西方文化 ê 藝術作品，tse 是中國導演有所不足 ê 所在。李安 tī 電影 ê 出頭天，並 m̄ 是一帆風順--ê，伊 hit 種拍拚 ê 台灣水牛精神，tsiah 是出名光環 ê 後面、會當 hōo 咱得 tio̍h 啟示 ê 所在。
李安這馬拍電影 ê 身價是新台幣5,000萬，真 tsē 劇本 iáu 是 tī-leh 排隊等伊 tìm 頭，m̄-koh 伊講伊上 kah-ì ê 題材是「老台灣 ê 鄉愁」，二次世界大戰後，外省人難民來到台灣後，tō bē 當 koh tńg 去祖國--ah，in 對中國帶--來 ê 中原文化鄉愁是空虛--ê，tō 親像水薸(tsuí-phiô) tī 水--裡 ê 漂流感。李安感覺這種漂流感真 suí；鄉愁是釘根 tī 台灣，轉去祖國卻是虛無飄茫--ê；鄉愁 lóng 是 kā bái--ê 放 bē 記得，kan-na kā 上 suí--ê 留落來，去觸動心內 ê 情懷。跟隨 tio̍h 第一代外省人 ê 凋零(tiau-lîng)，這種鄉愁 ê 美學，漸漸--ê tī 台灣消失去。李安上 gâu 處理這種探討內心世界 ê 戲，lán 向望有一工會當 tī 電影院看 tio̍h 「老台灣 ê 鄉愁」ê 上映。
Comments