杜博士治療好無數受tio̍h鴉片癮毒害ê人，伊發明ê「尿液檢驗法」，到今仔日全世界lóng koh leh 用。伊開辦私立高雄醫學院，hōo台灣南北ê醫學教育會使平衡發展。設立山地醫師專科班，培養偏鄉醫師，hōo原住民tī原鄉mā有好ê治療。伊iā tsiânn重視基礎醫學ê教育，一生作育英才、訓練醫師，是咱台灣醫學ê開山祖師。
台文編寫：郭孟樺 校正：洪偉婷、劉嘉佳
杜聰明博士1893年出世tī淡水三芝鄉。爸母無蓋大漢，伊mā生做細粒子--ê。九歲ê時hām漢學仔仙ê二兄學漢文；十一歲才去滬尾公學校讀冊。三年ê時，新來ê校長小竹德吉看伊聰明、骨力koh愛讀冊，就kā伊tshuā去tuà tī 校長ê宿舍，專心kā伊栽培，koh有一位礦物學家岡山老師mā不三時--ê來kā伊指導。兩位老師用心栽培後進、疼痛學生、無計較名利ê精神，對伊以後辦學有真深ê影響。
1909年伊以第一名ê成績考入去台灣總督府醫學校，滬尾街仔從來m̄ bat有人考牢（tiâu）醫學校，這是天大ê喜事。M̄-koh tī 身體檢查ê時，伊kan-na是丙種--ê，照規定這位草地狀元tō愛hőng退學去；佳哉校長長野認為tsiah-nī-á好成績ê學生，若無kā khioh--起-來是學校ê損失。自按呢，伊逐工練棍仔、走sio-jio̍k、搝橫科(giú-huâinn-kho)、洗冷水，身體才漸漸á勇健--起-來。體育課ê成績mā提tio̍h懸分--ê，這種自我ê訓練，五十年來m̄-bat歇睏--過。Tī醫學校ê時，伊hām蔣渭水、翁俊明、蘇樵山加入去中華革命(kik-bīng)黨，in定定會討論欲按怎支援中國ê革命，mā去募款(bōo-khuánn)hōo革命黨。伊hām翁俊明bat坐船到北京，kā Chorela ê病菌囥入去水源地，想欲kā做皇帝ê袁世凱毒死，m̄-koh無成功。
杜聰明以第一名ê成績畢業了後，去到京都帝國大學醫學部，先學習內科，koh再研習藥理學。有一擺伊轉去台灣探親，tī船頂ê活動熟似tio̍h美麗活潑ê林雙隨小姐，兩人互相意愛，tō行做伙--ah。想袂到--ê是林雙隨竟然是鼎鼎有名「霧峰林家」ê千金小姐，林小姐毋管兩人身份ê差別，堅持欲kah草地狀元行做伙。杜聰明tō請先輩iā是林家ê好朋友蔡培火先生去提親，林雙隨ê老爸林仲衡開出ê條件是：愛是高等官員、愛有博士學位、愛會曉吟詩、聘金5000箍(換做這馬ê錢超過500萬台幣)…等等四个條件。
台灣第一个醫學博士、第一个台灣人教授、第一个台灣高等官員
三年後，杜聰明提tio̍h京都帝國大學ê醫學博士學位，恩師堀內次雄校長聘請杜聰明博士為醫學校ê教授kah中央研究所ê高等官員。伊是台灣第一个醫學博士、第一个台灣人教授、第一个台灣高等官員。彼當時，台灣人ê教育受tio̍h無平等ê對待，杜聰明ê成就大大提kuân台灣人民ê尊嚴kah自信心，m̄-nā 台灣人感覺驕傲，日本人iā看做是重要ê殖民成就，報紙mā用頭版來宣傳。30歲ê老新郎kah青山高等女子學校畢業22歲ê林雙隨結婚--ah，雖然伊猶袂曉吟詩、身軀mā無5000箍，m̄-koh丈人仔林仲衡mā kā準suah--去--ah。
發明鴉片癮(giàn)「漸減禁毒法」
彼時ê台灣深深--ê受tio̍h鴉片ê毒害，家破人亡ê故事不時á ē發生。杜聰明研究出一種「漸減禁毒法」，以愛愛寮做試驗ê對象。愛愛寮是由施乾創立ê救濟院，專門收容乞食koh有鴉片癮ê人。杜聰明發現台灣ê毒蛇內有一種精神毒素，有麻痺ê作用，會當暫時--ê代替鴉片癮(giàn)，方便「漸減禁毒法」ê治療過程。杜聰明kā這種ê治療法，發表tī國際醫療雜誌，國際醫界kā伊hōo做「毒蛇專家」。伊koh發明「尿液檢驗法」，會使對尿液內檢查出是m̄是有食鴉片、嗎啡、興奮劑…等等，這个發明到今猶為世界各國普遍使用。
向國際聯盟告狀
雖然杜聰明tshuē出治療鴉片癮ê方法，m̄-koh鴉片專賣稅uī政府ê稅收貢獻了三份之一，總督府當然毋願放棄這隻金雞母。一直到蔣渭水以台灣民眾黨主席ê名義，khà電報去日內瓦ê國際聯盟，kā台灣總督府慘害人民，違反國際公約ê狀況報告hōo國際聯盟知影，而且iā請求派人來台灣調查。這通電報引起了日本政府ê驚惶，tī國際輿論ê壓力之下，趕緊播出30萬箍，拜託杜聰明博士成立「更生院」，17年來更生院攏總治療一萬一千七百外个鴉片仙。
1926年杜聰明以總督府研究員ê身份hőng派去歐美留學兩年半，做麻痺學ê研究。Tse是足好ê學習機會，mā會當考察歐美ê醫療制度。1935年杜聰明hőng聘做台北帝國大學ê教授，伊是台灣第一个mā是唯一ê台灣人做帝國大學ê教授--ê。1942年升為高官一等，伊是台灣人tī日本時代任官上kuân ê人，1945年受命擔任台灣總督府唯三ê台灣人評議會員。
閃避二二八事件 擔任台灣大學代理校長
後來中國國民黨戰敗來台灣，杜聰明去hōo政府聘請做台灣大學醫學院kah附設台大病院、熱帶(jia̍t-tài)醫學研究所ê主管。1946年hőng選做台北醫學會會長，koh當選國民參政會參政員。二二八事件發生ê時，林茂生、陳炘、阮朝日等hōo lâng lia̍h失蹤--去，伊提tio̍h「中華革命黨」ê黨證做護身符，koh走去閃避欲半年才敢出來轉去醫學院上班。1949年tī傅斯年欲接任台灣大學校長進前ê四十工，是由杜聰明做代理校長--ê。伊發現學校ê財務困難，tō去kā台灣銀行借tio̍h舊台幣九千萬，做為發薪水、事務費用。彼當時台灣ê通貨膨漲非常--ê嚴重，等候還錢ê時陣，台灣銀行收tioh 九千萬舊台幣ê還款，實際上ê價值tsiah tshun 1/4 niā-niā，借錢suah變做會當趁錢--neh！後來，傅斯年到台灣就任台灣大學ê校長，伊引入美國式ê教育制度，tse 和杜聰明日本式ê教育文化tsiânn無相仝，兩人發生了袂少ê衝突。漸漸á杜聰明感覺tī遮ná「有手伸無路，有跤行無步」，伊tō有想欲離開醫學院ê拍算--ah。
創辦「私立高雄醫學院」
本來伊是準備欲去南部開辦原住民醫學校，suah意外--ê得tio̍h高雄名人陳啟川先生捐出來ê十二甲農地，欲用來做醫學院ê校址。杜聰明tō kā台灣省政府委員辭掉，退出政壇，專心創辦「私立高雄醫學院」。這間學校tī1958年正式--ê得tio̍h教育部ê立案核准。In tō一方面上課，一方面建設學校，慢慢á kā七年制ê「私立高雄醫學院」建設起--來。杜聰明依「樂學至上，研究第一」為治學方針；學校重視基礎醫學、醫療研究kah醫療行政教育，培養出tsiânn tsē 傑出ê校友。杜聰明首創解剖大體ê祭典儀式，表示學生對大體ê尊重kah感恩。學校嚴格執行考試ê公平，一旦發現有作弊ê行為，馬上開除。每禮拜上課五工，鼓勵學生拜六、禮拜出去運動。拜六有藝術課，歡迎學生參加，提升人格ê氣質。學校iā首創台灣第一間cafeteria ê食堂，提供清氣、營養ê食物hōo學生。學生愛學德文、法文、英文，按呢才會當隨時--ê閱讀文獻，接受上新ê醫療知識。
開辦「山地醫師ê專科班」
1958年，伊上要意--ê「山地醫師ê專科班」開辦--ah，完成了伊hiah濟年來ê夢想。這ê學制提供原住民四年ê醫學教育，畢業後愛轉去偏僻(phian-phiah )ê山區服務十年，才會當提tio̍h醫學證書。Tsū按呢，原住民tō有機會tī原鄉得tio̍h醫療ê照顧。伊mā成立「杜聰明醫學獎學金」鼓勵清寒子弟來高醫讀冊，創造in美好ê前途。伊tī退休ê時iā放棄退休金，伊講伊成立醫學院毋是為tio̍h beh趁錢。
台灣醫學ê開山祖師
杜聰明博士非常注重基礎醫學，伊一生攏總指導40外个醫學博士學生，伊是咱台灣醫學ê開山祖師。伊ê一生m̄ bat替人看病，m̄ koh伊訓練出來ê學生代替伊照顧tsē-tsē ê台灣病人ê健康。杜聰明博士tī伊72歲ê時講過，伊已經盡了所有ê氣力，問心無愧--ê完成了基礎醫學ê教育工程，hōo台灣成做醫療先進ê國家--ah。
Comments