Tī玉里ê法國阿爸，到今奉獻五十偌冬ê時間tī台灣這塊原本佮伊無關係ê土地。
文稿編寫：洪偉婷 校對：郭孟樺、劉嘉佳
來自信仰虔誠的天主教家庭 Yves Moal 神父，1941年出世佇法國西爿(pîng)ê一个小鎮，厝--裡sī虔誠ê天主教家庭，爸母是作穡人（tsoh-sit-lâng），定定ē送果子、菜蔬(tshài-se)hōo散凶人。阿叔Yves是傳教士，是抱Yves Moal洗禮ê代父，代父tō sī天主教內契爸ê意思；可惜代父tī第二次世界大戰suah過身--去。伊號姓”劉”，用阿叔ê名”Yves” ê諧音”一峰”做華語ê名。
編撰法語kah原住民語辭典
劉一峰tī巴黎大學讀哲學kah神學系ê時，讀tio̍h Formosa是一个多元文化ê社會，畢業了後伊向巴黎天主教外方教會申請beh去台灣傳教；25歲hit年伊uì馬賽港出發，經過一kóo偌月ê時間才來到基隆，伊先tī新竹學華語，兩年後奉派去花蓮、瑞穗⋯等等ê所在。Tī花蓮伊發現hia是一个多語言ê地區，有台語、華語、客語以外，koh ū原住民Amis、Bunun、Atayal ê語言，除了做教會ê事工以外，伊iā開始研究tsia-ê語言，mā hām法國神父傳利亞、潘世光合編Bunun kah法語辭典，Amis kah英文、Amis kah法文ê辭典。
成立讀冊室kah圖書館
1980年伊hőng派去玉里，hit時ê玉里iáu-sī有真tsē路lóng bô 點仔膠(tiám-á-ka)，落雨ê時nā騎oo-tó-bái去傳教，有當時仔ē去tshū-tó--去；koh再深入基層伊iā發現tsiânn tsē囡仔bô讀冊桌仔通用，甚至有ê厝--裡mā bô電火。Tō按呢伊成立讀冊室hōo囡仔有khah四序ê學習環境，前衛出版社iā鬥相共幫贊伊成立圖書館。
用耶穌的心照顧邊緣人
1988年巴黎外方傳教會派劉一峰為玉里玫瑰天主教堂ê神父；玉里天主教堂khiā tī市區，教會大門開開，不時有精神患者、出獄更生人、食毒--ê、身軀破相--ê入來教堂請求幫贊，劉一峰神父lóng袂拒絕 kā in收留；雖然伊按呢做定定ē受tio̍h教會執事kah長老ê反對，m̄-koh劉一峰神父以「耶穌照顧軟弱ê人」ê精神，堅持bē sái kā in拒絕。教堂除了敬拜天主之外，mā有tshāi道教ê神像、中華列祖ê神主牌仔，方便信眾來天主堂崇拜，遮是一个超越天主信仰ê所在，是玉里人ê信仰中心。
鼓勵邊緣人自力更生
1988年台灣ê環保意識開始發-ínn，神父利用教堂外500坪ê土地，成立資源回收站，大概有70个人做伙tī tsia過團體ê生活， tsia-ê社會邊緣人開始有工作ê機會、有適當ê收入，in ta̍uh-ta̍uh-á養成工作ê習慣以後，行出去社會tō會當過有尊嚴ê人生。神父看tio̍h一个睏tī車頭ê中年人，tō kā伊tshuā轉--來、tshuē所在hōo tuà、hōo伊做資源回收ê工課，koh鼓勵伊去考駛卡車ê執照，這馬伊是資源回收卡車ê司機，tshue tio̍h人生ê第二春。
另外，iáu-ū一擺神父ê頭殼去hōo出獄ê更生人kòng一空，倒tī塗跤流血ê時，神父想--ê毋是欲按怎止血，竟然是leh想欲按怎原諒彼个人；伊認為人一定有良善、可愛ê一面，愛hōo伊有悔改ê機會。
上帝才是老大
神父tuì想欲來回收中心上班ê人開出來ê二个條件，第一是袂使啉酒，第二是袂使欲做老大，神父講：老大tō sī天頂ê上帝，kan-na有一个niā-niā。Tńg tio̍h有人冤家ê時，神父攏會認真聽雙方ê理由了後才kā in安tah，勸逐家愛互相體諒⋯等等。神父講世間無一項物件是糞埽(pùn-sò)，人間無一个是無路用ê人，伊照顧in tō親像照顧家己ê kiánn-jî仝款；In四界去收歹銅舊錫，kā物件分解、分類提出去賣，khe̍h tio̍h ê收入除了供應資源回收站ê開銷以外，猶有liōng-siōng ê錢會當捐hōo法國神父顧超前ê「安德啟智中心」。
創造就業機會自食其力的養護中心
1999年「安德啟智中心」ê顧超前神父過身--去，巴黎外方傳教會派劉一峰兼任「安德啟智中心」ê負責人。「安德啟智中心」是佇1983年成立--ê，是為tio̍h 15歲到45歲有身心障礙、智能不足ê人所設--ê一个安身立命ê所在；每一个院生逐個月ê開銷差不多愛4萬khoo新台票，tsia-ê所費(sóo-huì) lóng sī顧超前神父去法國募款來--ê，無夠ê部分除了有院生ê家長交納以外，院生也會去山頂採野果做果醬，pa̍k竹掃梳、做lù塗kha ê布lù仔hōo學校kah病院，in-ê 物件品質好koh耐用，所以訂單sī源源不斷；拜五ê暗時in會去夜市仔街頭走唱、賣藝募款，神父tō sī欲kā in當做普通人仝款，技能訓練、環境整理、火災逃生⋯等等lóng愛不斷提醒、演練。
資源回收站收--tio̍h ê好物件，伊tō設立二手店hōo資源會當循環利用；伊也設立愛心農場，飼雞生雞蛋通好提去賣，koh kā雞屎hām食tshun ê phun挈來種菜、做有機肥，除了家己食以外嘛提去菜市仔賣。種種ê策施攏是欲hōo邊緣人有koh khah濟ê工作機會。
中場：
聽到tsia，你敢ū對劉神父愈來愈hònn-hiân–neh?
伊有耐心，有愛心，kā 所有ê 時間lóng奉獻hōo 異鄉ê 弱勢族群。M̄-koh 伊家己kám bē 有苦疼，kám bē有怨慼（uàn-tsheh）？是siánn-mih 款ê爸母，siánn-mih 款ê 家庭教育，會當 tshiânn-ióng出像伊按呢無私ê 人--leh？咱來做伙1聽--lo̍h-khì。
母愛的支撐
劉一峰tī伊25歲beh離開厝--裡ê時，老母親手刺兩領膨紗衫(phòng-se-sann)予伊寒--人通穿，koh有交代伊「愛照良心過日」ê家訓，每兩禮拜會寫一張批hōo伊，36年來lóng m̄ bat斷--過。劉神父ê一生lóng leh照顧邊緣人，連見老爸最後一面ê機會iā錯失--去，小妹、大兄ê婚禮mā無法度參加；piān-nā思念故鄉ê時，伊tō看相片、摸老母留--落-來ê膨紗衫安慰家己。老母過身了後留hōo伊300偌萬ê遺產，伊遵照老母ê願望用tī花蓮照顧需要hőng照顧ê人身上。
憑信心創建熟齡啟智中心
Tuè tio̍h時間一冬一冬leh過，「安德啟智中心」ê院生in ê年歲iā愈來愈老--ah，照規定超過45歲--ê tō袂當koh留tī中心，毋過in一旦離開tsia生活tō無法度自理、生存有困難；而且智能不足ê人歲壽khah短，劉一峰神父tō趕緊設法hōo in有安歇、食老(lāu)養老(ló)ê所在；伊相信「人計劃、天安排」ê信念，經過十年ê募款，完全無政府補助、kan-na倚靠民間ê力量，伊所籌建ê「安德怡峰園」佇2019年4月30日正式啟用。建築費倚欲1億ê怡峰園佔地1000外坪，是一棟四樓半無障礙空間ê樓仔厝，內面有復健、長照ê設備，會當收留50位45歲以上ê院生；連對面整修過ê「安德啟智中心」50个khah少年ê院生總共100个，全部攏需要劉一峰神父來kā in領導kah照顧。
這位甘願hőng叫做「糞埽神父」mā毋願放棄邊緣人ê劉一峰神父，佇2021年四--月正式提tio̍h台灣ê身分證成做台灣ê公民；伊歡喜宣佈講：我結婚--ah！新娘仔tō sī台灣，gún是一世人ê夫妻，這馬我sī正港ê台灣人--ah，請lín毋通koh叫我「阿啄仔」。
台灣tō sī我ê故鄉
有人問劉一峰神父，若準伊過身--去，是毋是欲tsah tńg-khì法國埋--neh？神父講：我佇台灣tuà 55冬--ah，他鄉變故鄉，台灣tō sī我ê故鄉，當然是埋佇台灣才著；伊koh講：我已經tshuē tio̍h一个靈骨塔ê地下室，攏無人愛khǹg?，koh俗koh清靜，thìng-hāu時間一到，kā我燒燒--leh khǹg?佇地下室，我有天主教ê信仰，相信有天爸ê照顧、耶穌的ê祝福，khǹg佇tó-uī 攏無差--lah！ 相片來源：台灣高鐵網站
Comments