文稿編寫kah校對：杜荷洲、王宇莉、葉信鴻
有一對翁某，hām 台灣無血無緣，因為發現台語誠媠，tō 開始學台語，用台語寫做醫學冊？mā kā thái-ko-pēnn (痲瘋病) ê 病 lóng 醫--好--矣？
是啥 mih 款 ê 大人物--leh？Lán 做伙來聽李老師講古！ 「看不懂台語文，讓李老師念給你聽，點這聽podcast」
加拿大仁醫
戴醫師是 tī 紐芬蘭 (Newfoundland) 出世 ê 加拿大人，hit 當陣厝--裡真散凶，定定受 tio̍h 教會傳教士 ê 幫贊。In 建議伊去倫敦讀醫學院。畢業 í-āu tō tī 倫敦 hia 做醫生，熟似了一位護士小姐。I kā tsit ê 小姐講，伊 tī 紐芬蘭受 tio̍h 真濟人 ê 照顧，tsit-má 想 beh 去照顧 koh 較散凶 ê 人。Hit ê 小姐講伊 mā 想 beh 去外國服務，tsit 項代誌 hōo 英國 ê 長老教會知影，kā in 講台南有一 ê 新樓病院欠醫生，看 in beh khì--bô。In tō 歡喜答應。Nn̄g-ê tō先結婚，mā kā 結婚 ê 錢省 khí--來，án-ne 會當 khì 台灣服務。
用台語寫《內外科看護學》
In 坐船到台南，tī hia 開始學台語，發現台語真趣味，tō ná 學台語，ná 做醫生，mā kā i 所知 --ê 用台語 kā 寫--起-來，寫一本676頁 ê 醫療冊，內面 koh 有500張圖，tsū á-ne 台灣人 tō 有台語 ê 醫學冊 thang 好讀--ah。
擔任新樓病院院長
戴仁壽醫師 ê 生活足簡單，對病人 mā 足有疼心。1915年，新樓病院 ê 院長馬雅各醫生Maxwell 二世 beh 轉去英國做兵，tō kā 戴醫師升做院長來照顧病院。馬雅各醫生1919年轉來 ê 時，戴醫師 kā 病院交倒轉 hōo i，轉去英國進修。Tī hia ná 讀冊 ná 做醫生，用 5 年 ê 時間提 tio̍h 皇家外科學院院士 ê 資格，這是 tī 英國醫生界上懸 ê 地位。I 對教會 ê 事工誠認真，是一个虔誠 ê 基督徒。
擔任馬偕病院院長
1924年，台北馬偕病院 ê 院長偕叡廉 (George William Mackay) 請戴醫師來擔任院長。戴醫師赴任進前，知影台灣 ê 痲瘋病 (thái-ko-pēnn) 真厲害，
帶來痲瘋病ê解藥
伊聽講印度 ē-tàng kah 楓仔樹 ê 油挈來醫治 thái-ko-pēnn，伊 tō khì 印度買 tsiânn 濟楓仔油，mā 買 一寡楓仔樹仔轉來台灣種。這種醫療方法真有效，所以痲瘋病ê患者 tō 愈來愈少--ah。m̄-koh 得 tio̍h 病 ê 人，焦 phí 以後 ē 留 tsi̍t 寡疤痕 tī 身軀頂，hōo人看 tio̍h ē 無爽快，所以 in tī 社會 kiânn-ta̍h 生活 mā 有 tsi̍t 點仔問題。戴醫師用家己 ê sai-khia (私奇錢)，tī 淡水對面 ê 八里坌買 tsi̍t 片土地，搭寮仔 hōo 痲瘋病 ê 人蹛，種菜飼豬，hōo in 自給自足，tsit ê 痲瘋聚落叫做「樂山園」。1934 年 i kā 馬偕病院 ê 頭路辭了後，搬去 hia kah 病人蹛，tsiok 有愛心-- ê，因為古早時痲瘋病無人敢 kap in 接觸，lóng kā in 關 tī 深山林內 hōo in 自生自滅，tsit-má 有 tsiah-nī 好 ê 所在 hōo in 蹛，患者 攏 tsiok 感動--ê。
保留樂山園初衷成立財團法人 1940 年 ê 時，日本參加第二次世界大戰，kah 加拿大是敵對國家，suah kā 戴醫師趕走，i 只好轉去加拿大退休。戰爭期間，樂山園 hōo 日本人改作彈藥庫，koh kā 部分 ê 精神病人關 tī hia。1945年，日本戰敗離開台灣， tsit ê 所在 tō 應該還 hōo 樂山園。留 tī 樂山園 ê 醫生 koh 重新開業照顧痲瘋病 ê 患者，部分改做療養院。因為戴仁壽醫師 lóng tī 加拿大，1953年，國民黨政府 beh 霸占 這塊土地。有人 tō 寫批 kā 伊講：ū 人 beh 霸占 hi̍t 塊土地，愛 khah 緊轉來。彼當陣 伊人 tih-beh 七十歲--矣，愛對紐芬蘭坐火車去溫哥華，對溫哥華 koh 坐船去日本 ê 橫濱，koh 對橫濱坐船到基隆，強 beh 30 工 ê 路程。到遮了後，tō 開始 hām 國民黨拍官司，經過真濟人 ê 幫忙，最後官司拍贏--ah，Tsit 塊土地還 hōo 戴仁壽醫師。I tō kā 財產捐 hōo 樂山園基金會，koh 成立一个財團法人。經過法律手續以後，tsit 塊土地確保 bē-sái 買賣，ē-tàng 保存落--khì。
翁仔某攏選擇入土台灣 1954年拍土地官司 ê 時陣，夫人 suah 過身--去，伊 beh 過身 ê 進前 ū 交代欲埋 tī 樂山園。戴仁壽處理了夫人 ê 後事，四月 ê 時陣坐船 beh 轉去加拿大，盲腸 suah 發炎，結果變做腹膜炎，mā 過身去--矣。伊 ū 交代 beh hām 太太 khǹg 鬥陣。後來信徒 kah in 翁仔某 lóng 埋 tī 淡水八里坌 ê 樂山園， 佮 in 心愛 ê 台灣做伙。戴仁壽 nn̄g 翁仔某，tsi̍t-ê 是護士，tsi̍t-ê 是醫生，對台灣 ê 現代化真 ū 貢獻。In hām 台灣無血無緣，mā m̄ 是 beh 趁大錢，in tō 是對一份人道關懷 kah 宗教 ê 疼痛。Lán-tī-tsia 愛 kā in 說多謝。
咱今仔日 tō 講到 tsia，後禮拜二 tsiah koh 來坐。