top of page
Search

019 賽德克族人的恩人:以愛報父仇的井上伊之助

雖然井上伊之助ê老爸bat去hōo原住民出草刣頭--過,m̄-koh伊顛倒suah欲去台灣行醫,改善原住民ê醫療環境。彼當時山地非常危險ê閣落伍,猶毋過井上堅持耶穌基督的話:「去愛你的仇敵」,佗位有需要山地醫療伊攏會m̄驚艱苦--ê去kā in治療。


文稿編寫:郭孟樺 校對:洪偉婷、劉嘉佳

看不懂台文的請點podcast連結,讓我們讀給你聽 1882年tī日本高知縣出世。老爸井上彌之助tī花蓮山區採樟腦ê時,不幸予太魯閣族原住民出草刣頭慘死。彼當時井上伊之助tī-leh東京ê聖經學院讀冊,接著阿爸予人殺死ê消息,雙手phih-phih-tshuah,哭甲無捨無施,強欲暈倒--去。家己一个人行入去樹林仔內,恬恬仔哀念著死--去的阿爸。伊tī祈禱中想著耶穌基督ê話:「去愛你的仇敵。」雖罔毋知老爸是按怎會過身--去,毋過tī悲傷中透過祈禱得著安慰,相信人ê生死、宇宙間所發生ê代誌攏是神ê安排。因為án-ne伊紲立志欲去台灣傳福音。

中村敏 - 『日本プロテスタント海外宣教史』新教出版社、p.93

裝備家己準備用醫療向台灣人傳教 1907年,伊去伊豆縣ê寶血堂病院學習醫術,嘛開始學台灣原住民ê母語,用兩年貼貼(tah-tah)ê時間,共欲去山區服務ê技術攏tshuân hōo便便。 1911年,伊來到台灣,向總督府申請派令,想欲去新竹廳醫療站服務。伊tī 12 月20日得著歷史性ê第一張原住民醫療派令,毋koh規定伊干焦(kan-na)會當做醫療,袂使傳基督教的教義,因為日本ê國教是神道教。上班ê第一工tō聽著樟腦工寮有六ê人予原住民出草殺害--去。伊tō趕緊寫批予tī東京ê夫人,共in苦勸講毋通來台灣相會,遮實在是有夠危險--ê。

三个囡仔攏得著流行病過身--去

隔轉年,伊接著夫人ê電報,講in已經坐船離開神戶--ah,欲𤆬囡仔來遮規家伙仔鬥陣。彼當時,山地非常落伍,衛生無好,居民普遍營養不良,傳染病湠(thuànn)kā滿四界。寢(Tshím)來台灣三个囡仔攏得著流行病過身--去,夫人小野千代嘛差一點仔tō死佇山頂。1915年,井上𪐞(tòo)著目睭病、ma-lá-lí-á佮十二指腸蟲病,需要轉去到日本蹛院治療,才共一條老命khioh--轉--來。伊佇1922年koh再轉--來-到台灣,這擺是佮總督府合作--ê,服務ê範圍擴大到台中、南投、宜蘭、花蓮。


《台灣山地傳道記:上帝在編織》前衛出版社

照顧霧社事件sīng-î ê賽德克族人

1930年霧社事件發生,賽德克族佮日本警察發生武裝衝突,造成了族人343人死亡,規个部落kan-na賰(tshun)298个老人、查某人、囡仔niā-niā。為著欲延續賽德克族ê命脈,井上自願去川中島ê清流部落,共得著ma-lá-lí-á抑是受傷ê人治病,領導逐家祈禱,tī信仰內tshue著力量,向望(ǹg-bāng)新世代ê子弟會當勇壯--ê繼承部落ê傳統。


堅持「去愛你的仇敵」ê信念到死去為止

山區內無電火、無水道水、無魚無肉,有當時仔補給車無來,iā有bat斷糧食佮味噌(mí-sooh)的情形發生。醫務所離患者蹛ê所在攏愛行路peh山,定定會拄著蜈蜞(ngôo-khî)、毒蛇、虎頭蜂(hóo-thâu-phang),上危險--ê是原住民猶有出草ê風俗,有去予人刣頭ê危險性。猶毋過,對伊來講上蓋艱苦--ê是總督府規定袂當傳教,醫療團隊ê成員攏毋是基督徒,凝聚力無夠強,拄tio̍h困難ê時陣無法度互相有精神上ê支持佮鼓勵。Tō親像一塊pû kah 紅紅ê火炭,若無其他ê火炭相thinn,真緊就會火hua--去--矣。伊雖然幾落擺想欲放棄醫療ê工作,佳哉經過不斷ê反省,上帝幫贊井上堅持「去愛你的仇敵」ê信念到死去為止。

日思夜夢的台灣

上帝佇編織

1966年,一世人為台灣奉獻36年青春,閣失去3个細囝ê「原住民醫療之父」tī神戶過身--去。伊ê墓碑刻著一字「愛」,伊用愛化解仇恨佮悲傷。佇愛ê下面有一tsuā泰雅族語”tminum Utux”,意思是「上帝佇編織」。井上伊之助用伊歸世人ê時間替上帝刺(tshiah)一幅美麗ê原住民圖案,伊共這个困難ê任務完成了後,tō倒轉--去天國kah上帝作伴--ah。

圖/張肇烜翻攝



55 views0 comments

Comments


bottom of page