top of page
Search

013 臺灣美術啟蒙之父——石川欽一郎。

Updated: Oct 21, 2021

日本時代ê美術發展竟然有法度達tio̍h世界級水準?一个日本人為啥物會誠做臺灣近代西洋美術ê啟蒙者,iā sī台灣學校美術教育ê開創者--neh?


文稿編寫:劉嘉佳 校正:洪偉婷、郭孟樺

(看不懂台文,李老師在podcast讀給你聽 )

石川欽一郎,一个kā歐洲ê美術引--入-來台灣,嘛kā咱台灣人𤆬--出-去kah世界連結ê日本人。

逐家好,我是李贊星,真歡喜大家來收聽「李講古,我來聽」。佇拜二咱欲來聽台灣人ê第十三个故事。

留學英國

石川欽一朗佇咧讀典信中學ê時,tō開始hām老師學日本畫、西洋畫,嘛ū學英語。畢業了後,伊去大藏省印刷局設計錢、銀票、kah郵票ê圖案,有一个機會,伊接待tio̍h英國真出名ê畫家 Alfred East,擔任Mr. East ê翻譯官kah導遊。閒ê時陣看tio̍h Mr. East佇咧畫水彩畫,感覺足好看-ê,Mr. East 看伊想beh學tō開始教伊西洋傳統水彩ê技巧。伊佇日本ê老師看tio̍h伊ê水彩畫,鼓勵伊去歐洲繼續學習,所以伊28歲ê時tō透過Mr. East 去英國學西洋畫。

來台擔任通譯兼教美術

1907年伊來到台灣ê總督府擔任通譯官,因為工課閒閒有人tō介紹伊去國語學校教美術(tse个學校sī予準備欲去教台灣人日語ê人所讀ê學校),伊開始kā西洋畫傳--入-來台灣。彼當陣因為無啥物人知影西洋畫,1908年伊tō成立一个西洋畫研究會,用家己佇台灣四界寫生ê圖辦一个個人畫展。伊足拚力佇咧推廣藝術,1913年伊辦一个「番茶會」邀請社會有頭有面ê人來熟似西洋畫(番茶tō sī番仔喝ê茶,指-ê sī咖啡),請in支持新生代、贊助kah散凶(sàn-hiong)ê少年畫家。


「光ê鄉土」-認為台灣sī水彩畫ê天堂 後來,石川欽一郎佇45歲ê時離開台灣,去歐洲精進伊ê畫圖技術,四界去旅行寫生,功夫進步誠濟。1924年受tio̍h台北師範學校ê校長邀請,擔任第一師範kah第二師範ê美術老師,石川老師認為台灣sī水彩畫ê天堂,kā台灣號做「光ê鄉土」,時常𤆬(tshuā)學生去外口寫生;伊上佮意台灣ê紅瓦厝、青翠ê山嶺hām亞熱帶ê濕氣,sī一个誠適合用光線表現畫圖ê所在。石川老師ê作品屬於印象畫派,伊tuì色彩ê厚薄真gâu控制,tuì光線kah空氣ê關係特別ū心得,尤其sī台灣ê濕度kah懸,足適合kā水彩畫ê原料保持澹潤(tâm-jūn),tse對水彩畫家尤其重要。

《台北總督府》.水彩.紙.34 x 25 cm

推動「台灣美術展覽會」的成立

彼當陣台灣人若是beh參加畫展,攏愛去日本參日本人競爭,久久--a tsiah ū一个會當入選--去,伊建議台灣總督府每年舉辦一个「台灣美術展覽會」,提供舞台予台灣畫家發揮,這tuì台灣少年輩ê畫家sī一个足重要ê政策。伊四常佇台灣四界寫生,嘛ū出一个叫做「山紫水明」ê風景畫冊,內面有二、三十幅圖kah in ê故事。伊佇61歲ê時陣轉去日本,學生感念tio̍h老師ê恩澤,每年攏用老師ê別號「一虛」舉辦畫展。

台灣美術界的恩師

伊教過ê學生攏誠出名,比如李石樵(伊ê畫kā社會現實主義表現--出-來)、藍蔭鼎(基隆出名ê水彩家)、洪瑞麟(作品以採礦工人為主題,上出名ê一幅圖「日頭光ê iau-sò」)、李梅樹(作品風格早期kah偏抽象,老ê時轉變-去生活寫實ê風格,這馬佇三峽iā ū一个紀念館)、陳植棋(台灣ê鬼才,可惜二十幾歲就過身--去。)、陳澄波(台灣ê Van Gogh、印象派畫風,可惜予國民黨kā伊銃殺去)。當時ê台灣西洋畫ū世界級ê水準,遮ê人攏是台灣美術界重要ê畫家,嘛sī石川老師留予咱ê資產。

1927/11/20日,臺灣水彩畫會成立大會佇臺北新公園ライオン(Lion喫茶店)舉行,出席者有石川欽一郎(右三)、倪蔣懷(右二)、片瀨弘(右一)、藍蔭鼎(左二)、陳英聲(左三)、李梅樹(左四)、 蘇新鎰(左九)、王新嬰(左十)等人。圖片來源:私人收藏,李梅樹紀念館提供。

創造出台灣美術獨特的風格 國民黨政府來ê時陣,ū另外一个「台陽展」sī一个控業公司推動ê私人畫展,同時猶koh ū一个「台展」kah「省展」。彼ê時陣ū兩派ê人,一派sī大中國主義,in sī用中國ê水墨畫畫--ê,另外sī石川欽一郎留下來ê學生,in 畫--ê sī西洋藝術畫,兩爿ê文化相碰衝突,koh ū另外一派ê畫風--出-來,所以這馬台灣ê水墨畫kah中國--ê sī無相仝--ê。

「奇蹟尋獲」的石川欽一郎的〈河畔〉1927,油畫,畫布,116.5 x 91.0公分

順天堂捐獻六百多幅台灣畫作

台灣tse一百年來經過多元文化ê洗禮、拄tio̍h政治ê衝突矛盾,影響tio̍h美術界鬧熱滾滾、精彩萬分;順天堂製藥公司ê老闆許鴻源醫學博士,佇美國收藏足濟ū台灣代表性ê作品,伊ū交代序細(sī-sè)佇伊過身了後,等到台灣ê政府真安定ê時陣,kā 遮六百五十二幅ê畫獻予台灣。舊年台灣文化部長來到美國接受in ê 獻送,前tsi̍t-tsām-á,遮ê圖佇咧台中國家美術館展出。Lán嘛愛感謝許博士家族ê無私奉獻,予lán看遮ê圖tō會當了解台灣ê背景歷史。 圖片來源: 【名單之後】臺展之外:石川欽一郎與「臺灣水彩畫會」 台北市立美術館 藝噗

53 views0 comments

Comentarios


bottom of page