top of page
Search

021 社會運動ê文學家 楊逵(kuî)

Updated: Jan 17, 2022

若是講著台灣文學,問10个人可能有8个人會提起 tio̍h 楊逵,逐家攏知影伊上出名 ê 小說〈送報伕〉。m̄-koh,咱可能 khah 無清楚楊逵 sī 1930年代開創台灣新文學黃金時代 ê 領導者; 可能mā 毋知影伊受著政治迫害,hōo 人關佇火燒島12年, 晚年suah 無法度繼續寫作 ê 悲劇。Tsit-mā, 咱就鬥陣來聽台灣 ê 文學巨家--楊逵 ê 故事.

文字編寫:杜荷洲、王宇莉、葉信鴻、李以如 校對:杜荷洲


日籍老師引領進文學世界

楊逵先生 ê 本名是楊貴,1905年出生佇大目降 (tsit-mā ê 新化)。新化公學校五年 ê 時,伊搪著一位熱愛文學 ê 導師沼川定雄。沼川先生教伊讀世界名作,開闊著伊文學 ê 天地,伊接觸著 Russia ê 托爾斯泰 kah 法國 ê 雨果等人道主義作家了後,影響著楊貴日後關懷人道 kah 社會良心 ê 寫作風格。1924年佇讀台南二中 ê 時,伊為著欲逃避 kah 新婦á捒做堆,就 kuat-tīng suan去日本大學文學藝能科夜間部讀冊。日時仔做工趁錢,嘛去參加日本當地 ê 勞工運動。


1927年,21歲的楊逵(中立者)攝於自日本返臺進前 圖片來源:楊逵文教協會

牽手葉陶拚農民運動 結婚前雙雙入監 1927年返來到台灣後,參加農民運動反對資方剝削蔗農。台灣俗語講:「第一戇, 種甘蔗予會社磅。」In tn̄g-teh 起草著台灣農民組合大會宣言 ê 時,隨去hōo日本政府掠入獄。佇監內熟識葉陶小姐,兩人 tio̍h 相招四界去巡迴演講。1929年2月11日,tú 佇兩人結婚 ê 前一工,in 去出席台灣工會會員大會,接tio̍h邀請上台演講了後,雙雙就被掠入監,到出--來了後,4--月才佇新竹結婚。

賴和醫師鼓勵寫作

佇彰化演講 ê 時,楊貴熟似 tio̍h 賴和醫師,這會使講是伊一生中,文學生命 ê 轉捩點。經過賴和ê引𤆬楊貴開始大量閱讀台灣本土作家 ê 作品。伊這時 tsiah 了解文學運動 mā 是促進民族解放 ê 一條途徑。1926年賴和寫出台灣新文學運動史上 ê 白話文小說〈鬥鬧熱〉kah〈一桿秤仔〉,這是用「喙講爸母話,手寫台語文」 ê 白話文寫作方式,轟動了台灣文壇。真可惜 ê 是賴和先醫務繁忙,每工 lóng 無閒到暗時十一點,無時間繼續寫作。佇賴和醫師 ê 鼓勵之下,楊貴寫出賴和先心目中理想 ê 小說〈送報伕〉。這篇小說對日本帝國主義壓制台灣農民 ê 土地,有真深 ê 描寫。賴和 mā 建議楊貴將筆名改做楊逵,避免 hőng 叫做「楊貴妃」ê 困擾。


〈送報伕〉就用楊逵 ê 筆名發表佇賴和主編 ê「臺灣新民報藝文版」,可惜--ê是連載到一半,suah hōo 日本政府禁刊。M̄-koh 這並無拍敗伊 ê 戰鬥意志,顛倒增加了伊 ê 勇氣 kah 信心,用文學家 ê 正義之筆 beh去戰勝獨裁者。Hōo人講伊 tō 親像一蕊硩 bē 扁 ê 玫瑰。

代表作〈送報伕〉得著日本文壇的肯定

1934年,伊盡心完成了下半部 ê〈送報伕〉,寄去東京 ê「文學評論」,結果佇14名日本小說家中,得 tio̍h 第二獎(第一獎欠缺)。這是台灣作家中第一篇小說佇日本文壇插旗仔。〈送報伕〉宣告一个台灣新文學時代 ê 開始:台灣文學欲脫離傳統漢文ê封建思考,tō ài khiā tī無仝ê角度,行出 ka-kī ê 路。〈送報伕〉 kā 浪漫抗議 ê 人道關懷注入去小說,引領台灣行入去台灣新文學 ê 黃金時代。 成立「台灣文藝聯盟」 1934年5月6日是台灣現代文學史上值得紀念 ê 日子。這工有82名台灣作家聚集佇台中,佇日本警察重重ê 包圍之下成立「台灣文藝聯盟」。這个聯盟tshuā-niá1930年代 ê 文學運動。聯盟mā 成做當時智識份子 ê 精神靠山,in 攏總辦了十五期 ê 「台灣文藝」雜誌,由楊逵擔任日文欄主編,是一本規模上大,作家上濟 ê 雜誌。

《臺灣新文學》1卷1號 圖片來源:楊逵文教協會

創辦「台灣新文學」雜誌 1936年楊逵提出一生 ê 積蓄 hām 賴和、吳新榮、賴明弘等創辦「台灣新文學」雜誌,中文由賴和主編,日文由楊逵主編,佇雜誌內伊發表了小說「水牛」、「模範村」、「鬼征伐」、「豬哥仔伯」、「蕃仔雞」,是楊逵一生中寫作 ê 黃金歲月。雜誌發行18期,真拍損--ê 是佇1937年6月停刊,mā 是台灣新文學黃金歲月 ê 結束。楊逵除了寫作、辦刊物以外,mā 參加真濟 ê 社會運動,前後被關十擺。

世界上貴的稿費-火燒島關12年 1945年天真 ê 楊逵創辦「一陽日文週報」歡迎祖國來台領導。M̄-koh 1949年伊擋袂牢國民黨佇臺灣 ê 為非糝做,以文人 ê 骨氣 kah 良知發表六百偌字 ê 和平宣言,要求國民黨政府實行地方自治、經濟平等,還政於民,hōo 陳誠省主席宣判死刑。好佳哉 tī 執行 ê 前一工,國民黨政府公布「非軍人改為司法審判」 ê 政策,就 kā 改做送去火燒島關12年。

《一陽週報》〈「三民主義是什麼?」〉 圖片來源:國立臺灣歷史博物館

失語的小說家 佇火燒島 ê 時伊有想欲轉骨改用中文創作,m̄-koh 年歲 有khah 濟--ah,一直無法度用扭掠 ê 中文創作。火燒島12年 ê 監牢生活 ,hōo 伊得著寫作恐慌症,suah 終此封筆。一代小說家、領導台灣文壇 ê 巨人, tō 佇政治 ê 風浪中消失去--ah。


台灣文學家的搖籃-東海花園 1962年楊逵佇臺中東海大學 hia 種菜種花,讀冊為生。有當時仔東海大學 ê 學生 mā-ē 去伊 ê 東海花園開講泡茶、請益人生。1972年楊逵 ê「送報伕」終其尾佇政治 ê 冷凍庫中 hőng 提出來退冰--ah,40年後 lán 臺灣人 tsiah 有機會,以完整 ê 面摸仔來欣賞 tsi̍t 部捌掀起臺灣新文化運動波浪 ê 國際大作。

現此時 ê 臺灣政治家,往往無欲注重文化,甚至對臺灣歷史欠缺起碼 ê 尊重,咱真缺欠像楊逵先生這種 kā 文化 kah 政治融合鬥陣 ê 政治家。雖然伊佇政治運動中是失敗--ê, m̄-koh 伊掖落來 ê 種子,發穎成做大樹--ah,已經成做臺灣人 ê 財產, mā 是臺灣精神上珍貴 ê 遺產。

七等生kah林瑞明教授佇東海花園,背後雕像sī送報伕。(林瑞明教授提供)

31 views0 comments

Comments


bottom of page