文稿編寫：許倩瑜 校對：林琪蓁、吳鈺瑾
19世紀台灣就有西式病院，嘛有台灣的文字？這禮拜的「李講古，我來聽」介紹的是，tī台灣南部傳教、辦病院的馬雅各醫學博士。 「看不懂台語文，讓李老師念給你聽，點這聽podcast」
來自(lâi-tsū)蘇格蘭的仁醫
逐家好！我是李贊星。真歡喜逐家來收聽「李講古，我來聽」。
Lán今仔日tī拜二聽台灣人ê第二个故事時間，beh來講馬雅各醫學博士（Dr. James Laidlaw Maxwell）。
伊是頭一位來台灣醫療傳教ê先知。馬雅各醫生tī蘇格蘭出世，細漢ê時lóng讀教會學校，大學是去愛丁堡大學醫學院研讀--ê。大學畢業了後，伊有去法國、德國學習醫學。1861年，25歲ê時陣，馬雅各醫生有一擺去教會聚會，熟似了一位tùi 廈門轉來英國 ê長老教士杜嘉德（Carstairs Douglas）。杜嘉德kā馬雅各講伊bat khì-kuè Formosa 這 ê 島嶼，是一个真美麗ê所在。這擺ê談話hōo馬雅各醫生頭殼內有一个 tùi Tâi-uân（Formosa）ê 印象。後--來，馬雅各醫生koh去德國留學，the̍h-tio̍h 醫學博士ê學位。
頭前做禮拜堂，後壁做診所
1865年，29歲ê時陣，伊奉著長老教會ê指派出外去傳教，馬雅各選著一ê伊期待 ê所在khì傳教，這ê所在tō sī Tâi-uân（Formosa）。伊留了一tshok頭毛送hōo伊ê未婚妻作紀念，tō 家己獨身前往Tâi-uân。坐了四十外工ê船tsiah來到Tâi-uân，1865年6月16日，tī府城西街租一間厝，頭前做禮拜堂，後壁做診所，免費替人醫療治病。
馬雅各ê醫術高明，患者愈來愈濟，當地ê漢醫怨妒伊ê成就，放出風聲講馬醫師ê用藥是tùi墓仔埔挖--出--來ê心、目睭kah腦提煉--出--來--ê，mā 使弄逐家去伊ê診所khian石頭仔，kā禮拜堂拆掉，馬醫師只好逃避到旗後ê英國領事館請求保護。杜嘉德知影了後tō tùi廈門來kā馬醫師鬥相共，tī旗後設立一間禮拜堂診所，kāng-khuán頭前做禮拜堂，後壁做診所，免費替旗後ê民眾看病。
受著平埔族tsiok大ê歡迎
馬醫師tī tsia 熟似一个做樟腦ê英國朋友，伊tshuā馬醫師去內山 ê 平埔族tuà ê 所在tshit-thô。馬醫師受著平埔族tsiok大ê歡迎。平埔族人kā伊講兩百年前in有荷蘭紅毛kiánn-sài，in iáu-koh真數念kah西洋人鬥陣ê感覺，馬雅各tsiah了解平埔族對西洋人ê友善態度，對基督教ê接受度mā比漢人koh-khah kuân。
用羅馬拼音系統來kā台灣話文字化
1868年，32歲ê時陣，馬醫師再度轉來到府城開設禮拜堂診所，有了頂擺失敗ê經驗，這擺伊倩幾若ê會曉講廈門話ê信徒來鬥相共，廈門話kah台灣話sio-kâng lóng會通，所以這改傳教kah醫療服務tō ke tsiok順利--ê。了後，馬醫師開始訓練台灣人做醫生、做護士，伊發見著荷蘭人留下來ê拼音kah廈門ê拼音會使相通，tō發展出一套用羅馬拼音系統來kā台灣話文字化，這tō是lán講ê白話字。這套白話字真好用，真緊tō學會曉，照文獻leh講，兩個月tō會當熟手，讀、寫lóng無問題，這會使講是提高lán台灣人智識水準ê一項足重要ê代誌。
這ê白話字系統mā會當kā lán台灣歷史上所發生過ê代誌、聲音、風俗、生活方式kah本籍紀錄用文字寫--落--來。Lán tsit-má lóng會當揣著150年前台灣人ê歷史紀錄。馬醫師tī 32歲ê時tsiah去香港kā伊ê未婚妻相會，兩人tī牧師ê見證之下結婚，成為夫妻。M̄-koh，彼當時因為受著樟腦戰爭ê影響kah清朝官廳ê迫害，馬醫師ê傳教koh一擺無順利，種種ê坎坷是lán tsi̍t-má想袂到--ê。
tī平埔族廣設教會
1871年，馬雅各tī平埔族設立教會，tī西拉雅族（Siraya）有木柵、左鎮，tī和雅族（Hoanya）有白河、嘉義，tī巴宰族（Pazéh）有埔里、豐原，其中一ê部落有百分之百ê原住民lóng信教，會使講這改ê傳教真正成功。
催生台灣第一間印刷廠「聚珍堂」印出台灣第一份報紙
1872年，馬醫師36歲ê時陣，因為kha-tsiah-phiann ê舊症koh giâ--khì-lâi，無法度只好離開心愛ê台灣，轉去英國治療。1880年，馬醫師tī英國治療ê期間，一直leh研究台灣ê白話字，伊koh去買一台印刷機、排字架kah一寡仔鉛字ê工具。伊ê信徒利用tsia ê 設備成立一間「聚珍堂」ê印刷廠，這mā是lán台灣第一間印刷廠，印出第一份台灣ê報紙，創辦人巴克禮牧師kā這份報紙號做「台灣府城教會報」。1883年，馬雅各再度轉來到台灣，彼時陣伊ê夫人破病，koh加上拄著中法戰爭，tō是lán講ê「西仔反」，法國人tī beh kā台灣ê經濟封鎖--起來，船隻lóng bē-sái振動，馬醫師不得已，只好坐著尾班ê船離開心愛ê台灣，tō án-ne無koh轉來台灣--ah.
台灣第一座現代化ê西式病院-「新樓病院」
1901年，馬雅各二世追隨老爸ê志業來到台灣醫療傳教，tī府城東門附近建立台灣第一座現代化ê西式病院，號做「新樓病院」。這位少年ê馬雅各二世醫生盡心盡力照顧lán台灣人ê健康二十二冬，kā台灣人ê痲瘋病（thái-ko-pēnn）徹底治療好勢。1902年，英國母會感念著馬雅各老醫生偉大ê成就，tī府城設立一間「馬雅各紀念教會」。1997年，新樓病院ê醫生護士kah教會人員去英國弔念馬雅各爸仔囝對台灣ê疼痛。2001年，「馬雅各醫學紀念館」tī新樓病院成立，若是有去hia，會使sūn-suà khì 參觀。
今年2021年3月到6月，臺南市政府為著感念馬雅各爸仔囝對台灣ê貢獻，特別展出馬雅各離世ê 100年紀念展，將馬雅各ê文物kah影像做一個大型ê展示，歡迎逐家會當去參觀欣賞。
編輯：沈宇蘋
Comments