top of page
Search

016 東京奧運金牌ê故事-郭婞淳(Tana)

Updated: Nov 16, 2021

作者:李贊星

每一張金牌背後一定有一段辛苦付出ê故事,這禮拜欲來紹介thong-lâng-tsai ê 台灣之光!Kueh Híng-sûn (郭婞淳)這ê名逐家應該tī前一站仔痟奧運ê時定定聽著。毋過,郭婞淳是按怎踏入去舉重ê世界?除了訓練,平常時koh有siánn-mih款ê艱苦愛克服?受傷了後是按怎治療、復健,tsiah koh重新轉去比賽戰場,替家己、替台灣提著上懸ê榮耀? (看不懂台文?請點這用Podcast讓李老師讀給你聽)

Kueh Híng-sûn Amis ê名叫做Tana。老母是Amis馬蘭部落ê人,老爸自伊出世tō離家出走--ah。老母tī宜蘭tsò-sit ,kāTana生tī羅東聖母病院ê時;胎位無正,肚臍帶kenn tī頷頸仔--裡。佳哉院--nī ê江育同醫師醫術高明,tī六點外鐘ê苦戰之下,才kā生做一粒仔kiánn ê Tana生--出-來。幸運--ê存活--落-來,kā伊號做“幸存”ê階音[Híng-sûn],有期待伊一生會當幸福kah豐收ê意思。Tana出世後tō hőng送tńg去台東馬蘭部落hōo阿媽tshuā,生tī單親家庭隔代教養êTana家境困難,tuà tī台東ê厝hōo法院拍賣--去,tō愛四界去tuà tshin-tsiânn ê tau,有當時仔愛tuà tī工寮內;媽孫仔4个人tsinn tī一間細間ê房間內,愛phak tī thôo-kha-tau寫學校出ê宿題。

Tana 天生--ê身體柔luán,協調性tsiânn好,閣有爆發力,是一个運動ê好kioh-siàu。國中三年ê時,代表學校參加全國運動會,無細膩suah kā 400公尺接力賽ê接力棒,lak落thôo-kha hőng取消比賽資格。佳哉老師另外有替伊報名舉重ê項目;從來m̄-bat練習過舉重--ê Tana,suah意外--ê提著冠軍,一舉成名,伊不得不相信這是天父ê安排,叫伊行入去舉重ê領域--裡。運動m̄-nā會當tháu-pàng伊不幸ê心情,教練用心ê扶持kah隊友ê做伴,逐家互相--ê鼓勵向正途行;tsia-ê幫贊,對一出世tō無老爸ê Tana,運動是伊生長真重要ê養份。


伊進入台東大學附設ê體育高中,舉重ê成績tō漸漸仔好--起-來,得著ê體育獎金,tō會當維持厝--nī ê基本開銷--ah。高一ê時tī專業教練林敬能ê指導之下,參加亞洲青少年舉重錦標賽,提著銀牌;tō信心大增對未來充滿著向夢;林教練kā伊講,依Tana天生ê素質,加上刻苦ê訓練,有機會ē-tàng peh去奧林比克ê大舞台,師徒兩人tō設定目標,向奧運ê大舞台前進。


2012年tī倫敦奧運伊以女子58公斤級舉重,lia̍h-giâ 掠夯99公斤、thènn-giâ 牚夯129公斤、總和228公斤,失常--ê koh-á提著第8名niā-niā。Tsīng失敗以後,伊著認真拍拚,一禮拜七工,一工七、八小時--ê苦練;成績著tō不斷--ê真步。六--月ê亞洲錦標賽伊以總和236公斤提著金牌。八--月tī世界大學運動會以總和238公斤再提著金牌。十--月世界舉重錦標賽以總和241公斤得著金牌。成績優良,前途一片看好;伊hőng選為該年度ê體育精英,林敬能老師mā得著年度最佳教練獎。


2014年hōo眾人認定會提著韓國仁川亞運金牌ê Tana,tī五--月ê訓練中,不幸--ê suah去hōo140公斤ê石lián teh著大腿ê筋肉,造成70% ê筋肉ê斷裂,連khiā to khiā袂--起-來,只好用輪椅代步。為著欲hù九月ê仁川亞運,左營訓練中心積極--ê kā伊做物理治療,伊mā不時仔坐tī輪椅做重量訓練。每禮拜五會坐高鐵去台北長庚心身靈轉化中心,由楊定一博士替伊做生物ê科枝治療;楊博士一直鼓勵Tana愛用正面ê思考,用感恩ê心準備欲付出所得,相信一切攏是上好ê安排;mā鼓勵伊去學彈鋼琴,訓練專注力,看勵志ê傳記,tī冊內得著力量。Tsia- -ê訓練suah成做伊以後比賽,上重要ê勝利元素。短短ê兩個月伊竟然會當奇蹟--ê khiā--起-來,加上林敬能教練ê幼路訓練。九--月tō去參加仁川亞運,koh-á提著第4名。雖然這擺無提著獎牌,m̄-koh卻建立無欲認輸ê信念,相信成功是不斷--ê挫折kah磨練中提著--ê。這一年,伊雖然每工認真訓練,m̄-koh攏無法度giâ起超過100公斤ê心理關卡;經過教練耐心ê鼓勵,tī彈鋼琴、看勵志ê冊、tī祈禱中,最後才kā100公斤ê石lián giâ--起-來,突破「挵牆期」ê魔咒。

2016年成績漸漸--ê回生起--來,伊參加亞洲錦標賽以總和238公斤提著金牌,得著大會ê最佳女舉重者。Kang年去參加巴西奧運以總和231公斤提著奧林比克ê銅牌,mā得著體育署頒發ê運動精神獎,表揚伊受傷後,復出ê優良成績。Tana kā體育獎金包做三包,每包100萬送hōo過去栽培過伊ê教練,若無in ê照顧kah指導tō無今仔日Tana ê成就。伊koh再捐出150萬hōo羅東聖母病院,做為採購新ê救護車之用;欲感謝23年前聖母病院對伊無私ê付出。Tī感恩ê記者會「神秘嘉賓」23年前kā伊接生- -ê江育同醫師突然間- -ê出現,Tana趕緊走去kah伊相攬;婦產科醫師江育同,期待會當早一日替Tana接生伊ê紅嬰仔,Tana回答講,教練m̄肯- -lah!26歲以前阮袂使交男朋友- -ê,引起了規場眾人ê笑聲,伊mā kā ta̍k-ke保證2020年ê東京奧運,一定會koh提獎牌tńg- -來--ê。Tana mā真疼痛少年家,伊每年攏會捐出十萬箍hōo台東體育高中,學弟、學妹ê加菜金,向望in會當身體健康、營養豐富- -ê長大。


2017年伊人生上重要ê比賽 ,台北世界大學運動會起鼓--ah。Tī全國人民ê期待之下,伊不負眾望--ê,以142公斤ê thènn-giâ拍破世界記錄,以總和249公斤提著金牌;造成了全國ê轟動,提kuân咱台灣人ê信心,kā金牌留tī台灣人ê心肝內。教練林敬能hām Tana得著蔡英文總統ê召見,感謝in tī受傷後,kā苦練成做正面ê能量,奮鬥ê過程中,感動著全國ê人民,得著總統頒發ê五等景星勳獎。2018年伊再度參加雅加達亞運提著金牌;伊kā體育獎金tī台東買厝,hōo阿媽kah阿母有安定ê所在通tuā,m̄免定定tī-leh搬厝。


2019年東京奧運積分賽,伊以新ê規定59公斤級女子舉重,lia̍h-giâ106公斤、thènn-giâ137公斤、總和243公斤三項ê成績,拍破世界ê新記錄;伊lóng總五擺--ê拍破世界ê記錄,伊是世界ê光榮,伊是世界之光!2020年亞洲錦標賽,伊以lia̍h-giâ110公斤、thènn-giâ 137公斤、總和247公斤再度改寫世界ê記錄,提著三面金牌;mā提著入去東京奧林比克比賽ê門票。

2021年東京ê奧林比克,伊hōo台灣隊選為開幕典禮ê giâ旗官。2021年7月27日伊人生上要緊ê舞臺,東京已經為伊準備好--ah!Tana依女子59公斤級舉重,lia̍h-giâ 103公斤、thènn-giâ 133公斤、總和236公斤,提著台灣tī東京奧林比克ê第一面金牌;這三項成績mā拍破奧林比克ê記錄。自按呢,伊完成了「世界大學賽」、「亞洲錦標賽」、「世界錦標賽」、「亞運」、「奧運」ê「大滿冠」全面金牌ê記錄。Tī東京奧運giâ完最後一giâ ê時,陪伊訓練11年ê恩師林敬能歡喜甲tsông去臺頂,師徒兩人攬攬做伙;想起過去ê辛苦,一年koh-á會當tńg去厝--nī一改niā-niā,食物件是用tshìn兩--ê,恐驚體重會增加,所有ê朋友交陪lóng切斷--去。In兩人嚴格ê師生關係,mā變成做會當滾耍笑ê朋友,這種互動ê氣氛,尤其tī緊張ê比賽中,特別ê珍貴。林教練講,依Tana天生ê素質,柔軟ê協調性,嚴格ê自律生活,伊會當繼續參加2024年ê巴黎奧運kah 2028年ê洛杉機奧運,tsiânn有機會閣再為國家提著兩塊金牌--ê。


東京ê奧運金牌,Tana會當得著2000萬ê國家體育獎金,kah富邦集團提供ê十萬箍美金。Tana這馬是天主教輔仁大學ê副教授,伊想欲利用獎金去外國進修、學英文,來提升教學ê程度。Ah獎金ê其tha用途,tō愛tńg到台東hām序大人參詳,欲按怎用獎金來幫贊khah tsē ê人;不而過,伊一定會tī台東體育高中ê門跤口,開一間早餐店,免費--ê提供營養早餐hōo學弟、學妹食,希望in會當健康--ê、營養--ê去追求金牌會ê美夢!

(圖片來源:路透社、BBC中文網)

47 views0 comments

コメント


bottom of page