文稿編寫：許倩瑜、郭孟樺 校對：林琪蓁、吳鈺瑾
想欲知影為siánn-mih一个荷蘭大使會hőng號做「台灣先生」？這位「台灣先生」koh出了一本冊叫《真情台灣》，內底是寫siánn-mih？請來聽這禮拜「台灣先生：荷蘭大使胡浩德」ê故事。「看不懂台語文，讓李老師念給你聽，podcast click here」
記持超人展外交長才
「台灣先生」荷蘭大使胡浩德（Oô Hō-tik, Menno Goedhart），胡大使sī 1947年tī荷蘭海牙出世--ê。1979年進入khì荷蘭經濟部工作，mā bat hōo政府派khì巴黎做六年ê外交，伊ê夫人非常kah-ì 法國浪漫ê情懷。胡大使tùi橋牌（Bridge）tsio̍k 有 tshù-bī，bat khì hőng 選入khì荷蘭國家代表隊。胡大使遺傳著in tau 特別ê好記持，一禮拜使用ê 120副牌，伊lóng ē-kì-tit 每一副牌出牌ê順序，有這種天生ê才調，連戰連勝。
一步一跤印發現台灣
2002年，胡大使被派來台灣做荷蘭駐台灣投資辦事處ê代表。猶未來台灣進前，伊tùi台灣一點仔tō bô了解。伊kā每禮拜上班ê日子調整做連休三工，通好四界khì台灣tshit-thô，suah發現著台灣有真濟荷蘭人留--落-來ê 跤跡。譬如講，屏東八寶宮（Pat-pó-kiong） 祭拜ê 主神竟然是紅毛荷蘭公主。公主sī來台灣tshuē愛人ê時，tī墾丁ê海邊發生海難，kah五十，主神幾名荷蘭人被原住民殺害，公主託夢愛kā伊入廟祭拜。另外，雲林水林鄉有綠佑將軍廟（Li̍k-iū-tsiong-kun-biō）是荷蘭將軍Leo。Leo是為著beh做公親來平息水林鄉ê車港地區有相搶鹿仔皮生理地盤、互相sio-phah ê代誌，想bē到公親變事主，suah khì hōo雙方kā伊拍死，不幸喪生。後--來，mā 是 Leo託夢愛kā伊入廟祭拜。猶koh有屏東林邊慈貞宮（Tsû-tsing-kiong）ê荷蘭女醫生，是原住民Makatao（馬卡道）族ê守護神。平埔族人感念荷蘭女醫生tùi醫療濟世ê精神，kā伊立廟祭祀。台南四草大眾廟（Tāi-tsiòng-biō）祭拜三百五十年前荷蘭kah鄭成功作戰死亡ê荷蘭軍士ê遺骨，每年定時普渡。胡大使看著真正感動，tō請求廟方會使hōo伊每年鬥陣參加普渡荷蘭軍士ê祭典。
做原住民的紅毛親情 有一改，伊khì魯凱原住民山區旅行ê時，khì hőng認做紅毛親情。代誌sī án-ne--lah：一百年前有一个荷蘭少年家來過山區，娶著頭目ê查某囝做牽手。這位囝婿ê魯凱名號tō叫做Daganau。伊帶來真濟金屬玉品kah來福獵槍，伊mā扶弱濟貧，tsia ê事蹟到今猶流傳--落-來。In tshuā胡大使入khì族人tsiah會使入khì ê祖靈厝，tī hia靈休，大使tī厝內有感受著魯凱祖先誠懇ê心意，in mā kā胡大使尊作部落長老，號名叫做Daganau，kah較早hit ê少年家仝名。胡大使tńg-khì到厝--裡，查著荷蘭東印度公司tī 1651年進入khì魯凱山區，有kah魯凱人發生流血衝突，tùi魯凱人血腥對待。了後，胡大使揣一工下晡khì到台東卑南鄉利嘉溪ê達魯瑪克部落，khì kā in會失禮，為三百五十年前ê不當對待，握手講和，進行鬥陣啉仝杯酒ê和平儀式。Tī tsia伊收一个真gâu講英文ê契小妹，魯凱部落頭目古明德mā贈送隨身ê傳統佩刀hōo伊。
《真情台灣：荷蘭駐台代表胡浩德的台灣遊記》
胡大使tùi荷蘭kah台灣ê貿易有真大ê貢獻。荷蘭是咱台灣tùi歐洲貿易業ê第二名，台灣mā利用荷蘭先進ê物流系統kah地理優勢，kā台灣ê產品進入khì歐洲各地。胡大使kā台灣囡仔khì荷蘭留學ê獎學金由一年200萬提升到1400萬，hōo咱ê子弟通好khì荷蘭留學。胡大使研究荷蘭統治台灣ê時，彼時ê主民大部分lóng 是原住民，所以伊定定khì拜訪原住民部落，有Drekay（魯凱族）、Cou（鄒族）、Amis（阿美族）、Pinuyamayan（卑南族）、Siraya（西拉雅）、Bunun（布農族）、Tayal（泰雅族）等，交了真濟朋友，寫了一本冊叫做《真情台灣：荷蘭駐台代表胡浩德的台灣遊記》。這本遊記tùi台灣kah荷蘭雙方互相ê了解有tsio̍k大ê幫贊。2010年，胡大使ê任期到--ah，為著beh繼續研究荷蘭統治台灣ê 跤跡，伊申請台灣永久居留權，通好駐在留tī台灣。成功大學邀請胡浩德做駐校學者，胡大使mā tī成功大學設立「荷蘭遺跡台灣研究中心」。仝年，伊得到總統頒發ê紫色大綬景星勳章，肯定伊推動台荷關係ê貢獻。
台灣kah荷蘭仝款有海洋國家的性格
胡大使mā見證著台灣不斷提升民主ê過程，不時tī國際外交ê機會，仗義為台灣發聲。伊mā 是台南ê榮譽市民、高雄ê榮譽市民kah觀光大使、行政院文建會文化親善大使，koh得到經濟部ê經濟專業獎章。咱台灣bat tī 1624年成做荷蘭三十八年ê殖民地，自從荷蘭離開台灣了後，三百年來lóng無koh交集。一直到1970年，全球第一名ê荷蘭Philip公司來台灣投資2000萬美金，tsiah開始koh交流。自án-ne，台灣五十年來，無論tī貿易、生物、科學、半導體kah荷蘭有誠濟ê合作，咱台灣mā利用荷蘭phah-khui歐洲ê市場。Hōo人號做「台灣先生」ê胡浩德大使，伊講台灣hām荷蘭lóng 是細koh強ê國家，有真好ê海港kah做貿易ê才調，mā重視下代教育，有國際視野ê共同點，mā仝款有海洋民族開放、吸收、tshun-kiu ê性格。
凊心--ê離開台灣留遺憾
這位上有台灣氣口ê退休大使，本成是拍算欲長期--ê tuà tī 台南--ê。M̄-koh tuà 無一年tō暗然離開台灣，去到法國ê巴黎--ah。這到底是啥物原因--neh？好朋友盧芳蕙表示，十幾年前荷蘭代表處bat捐hōo台南市政府一千萬做為整理德記洋行kah荷蘭治理台灣ê展覽品，beh hōo台灣人了解400年前荷蘭時代ê狀況，這个重要ê展覽suah突然間--ê hőng 拆掉去，市政府ê理由是展覽品siûnn過舊，這種無重視捐獻人ê感受，伊用上強ê字crazy. terrible等來表示憤慨。
猶有，舉辦濟年ê荷蘭日mā hőng 取消去，市政府無koh繼續聘請伊做顧問。Tsia--ê攏會影響伊做外交ê工課。成功大學bat答應伊若留落來台灣，會聘請伊做駐校學者mā無影。種種ê原因hōo這位「榮譽市民」凊心--ê離開了台灣。
咱台灣是海島型ê國家，kah世界各國建立關係是尤其重要，若是有外國人士欲替咱做外交是求之bu̍t得ê代誌。M̄-koh 為著欲kā外國人才留tī台灣，政府官員mā毋通過度--ê提出條件兼保証；咱愛知口頭ê承諾mā是一種契約ê行為，到時若無法度遵照約束，當事人當然是會使解除契約--ê。胡浩德大使ê突然離開，hōo台灣失去一个為台灣發聲ê外國人，也是外交損失。Tī 這擺ê教示中咱愛tshue出如何kā外國人ê專業人士，留tī台灣ê政策。