文稿編寫kah校對：杜荷洲、王宇莉、葉信鴻
逐家攏知影台灣出名ê地標總統府是日本時代起--ê，猶毋過是啥 mih 人設計--ê--咧？
東京帝國大學建築系ê高材生 tī 台灣設計 tsiok 濟建築，tsia--ê建築是按怎融合台灣特色？
伊設計 ê 建築，是按怎變成世界出名 ê 典範、koh hōo 東京 beh 重建 ê 時做參考？
「看不懂台語文，讓李老師念給你聽，點這聽podcast」 (link coming soon)
歡迎逐家做伙收聽「李講古，我來聽」，這集欲講ê故事是華麗官廳 ê 創作者─森山松之助。
建築優等生(iu-tíng-sing)
Lán 今仔日 beh 講森山松之助 (Moriyama Matsunosuke) ê 故事。森山是日本人，tī 台灣設計 tsiok 濟華麗 ê 官廳。伊真 gâu 讀冊，考入去全日本上好 ê 東京第一高等學校。Tsit 間學校 hōo 學生囡仔 tsiok 自由--ê，in ē 使做 tsiok 濟 in 家己愛做 ê 代誌、去思考人生ê方向。後來，森山考入去東京帝國大學讀建築系，主修新古典主義 ê 建築，第一名畢業了後，真緊 tō hōo 建築師事務所 tshiánn 去做建築師，同時 mā 兼任專科學校 ê 講師。
結合東西方：德國紅磚仔建築kah台灣紅瓦厝
1907 年、伊 38 歲 ê 時陣，日本已經殖民台灣 12 年--ah，台灣漸漸平定，是開始建設 ê 好時陣，台灣 ê 總督府 tō 聘請伊來台灣，專心設計官廳 ê 建築。森山設計 ê 特色是採用德國式 ê 紅磚仔，磚仔角 lóng 有拍會社 ê 標記 。因為台灣有地動，建築 bē-sái 傷過潦草，所以森山 tō 引進水泥，kah 紅磚仔配合來使用。紅磚仔色 kah lán 台灣 ê 紅瓦厝 tsiânn 四配，台灣 ê 傳統配合 tio̍h 德國 ê 歐洲式，suah 變做 tsi̍t ê 多元特別 ê 風格。台灣定定有風颱，氣候 mā khah 溼，lóng ē 生白蟻，所以建築 mā 愛考慮 tio̍h 通風性 kah 衛生。森山真 gâu 運用日頭光照入去厝內，hōo 厝內 ê 空氣 khah ta-sò。伊 ê 建築 m̄-nā 考慮 tio̍h 本地環境，koh 講究官廳 ê 外形愛威嚴，內面 ê 工作流程設計 mā 愛合理，技術官僚辦公 ê 時陣，使用性 khah 效率性 tsiah ē-tàng 提懸。
Kā lán 台灣 ê 建築 tshuā 入去世界
森山 tī 台灣 14 年、做 tsiok 濟建築，khah 有代表性--ê tō 是台北水源地 ê 辦公設施 kah 官舍、台北電話交換室、台南郵局、基隆 ê 大阪商社、台北州廳、台中州廳、台南州廳、東門 hia ê 專賣局，猶 koh 有台南 ê 地方法院 kah 最近 tī 北門附近 tsiah 恢復--起-來 ê 台北鐵道部，逐家 ē 當去看。特別愛紹介 ê tō 是台北賓館，日本政府開 tsiok 濟錢，beh hōo 台灣總督蹛 ê 所在 ē 當來招待貴賓，聽講伊建築 ê 費用比皇居 ê 建設 koh khah 濟。伊上出名 ê建築是台灣總統府，到 tann 猶 koh 是世界十大上 suí ê 總統府。森山 kā lán 台灣 ê 建築 tshuā 入去世界，m̄-nā kah 人比 bē 輸 koh 贏人 kàu-kàu，伊對台灣有真大 ê 貢獻。伊設計 ê 建築，lóng 去 hōo 人保留--起-來做國定古蹟，是 tsiânn 好 ê 歷史記持。
「部落群」ê 建築設計觀念
森山建設台北 ê 官廳 ê 時，有參考德國國土規劃師「部落群」ê 觀念。伊 kā 台北新公園做中心，tī 四箍輾轉起真濟官廳，內面有軍事、電信 ê 設施，mā 有病院、學校、銀行、商店、旅社、餐廳、冊店、kah 博物館，lóng 集中 tī 新公園 ê 附近，變成 tsi̍t ê 世界出名 ê「建築部落群」ê 典範。後來東京因為 hōo 大火燒燒去、beh 重建 ê 時，日本政府重建委員會 ê 委員長後籐新平，有 kā 20 幾年前台灣成功 ê 建築部落群觀念提來用，tī 東京 ê 霞が関 (Kasumigaseki) 設中央政府 ê 官廳，mā 做了真成功。
韓國kah台灣殖民地建設ê無kāng結果
Hit 陣日本想 beh kā 台灣建設做世界殖民地 ê 模範，所以 tsiânn 認真做建設 ê 工程，各方面 lóng 做了 tsiânn 好。Lán 台灣人有感受 tio̍h 日本人對台灣 ê 貢獻，感覺日本政府比 tsit 陣 ê 國民黨政府 ke khah 好。韓國 tō 無 tsia-nī-á 福氣--ah，因為 in 一直反抗殖民統治，所以日本 lóng 派軍人去做總督，用武力 ê 手段控制百姓，mā khah 無才情建設韓國。比起來，lán 到 tann 猶 koh leh 懷念日本對 lán ê 好，韓國猶 koh leh 氣日本對 in ê bái，tse tō 是歷史 ê 宿命。
Lán 今仔日「華麗官廳 ê 創作者--森山松之助 ê 故事」tō 講到 tsia，多謝逐家收聽，lán 後禮拜二 tsiah koh 來坐。
編輯：沈宇蘋