top of page
Search

009 黃彰輝牧師-世界級的傳道者

Updated: Sep 23, 2021

文稿編寫kah校對:杜荷洲、王宇莉、葉信鴻


台灣長老教會對建立台灣本土意識 kah 推動台灣獨立建國 ê 運動有 tsiânn 重要 ê 貢獻,但是逐家對 20 世紀台灣長老教會第一番 “ichiban” ê 人物--黃彰輝牧師可能無啥熟似。Tsit 禮拜,lán 來聽黃牧師 ê 故事,伊是 án-tsuánn 由台灣出發,宗教事業影響 tio̍h 全世界,koh kā 全世界 ê 世界觀提轉來台灣教 lán 下一輩 ê 少年人。 「看不懂台語文,讓李老師念給你聽,點這聽podcast

黃彰輝-相片來源:台灣教會公報新聞網

留學日本東京kah英國劍橋 黃彰輝牧師 1914 年tī 台灣彰化出世,阿公 kah 老爸 lóng 是牧師,老爸 tī 長榮教會中學教聖經,自細漢 in 規家伙仔蹛 tī 學寮內。初中部 tō tī 遮就學,高中去日本青山學院中等學部讀冊,1931 年伊考入去真歹考著 ê 台北高等學校,tsit ê 學校是準備欲讀大學 ê 學前教育。1934 年考入東京帝國大學哲學科,蹛 tī 東大 YMCA ê 學生寮內。1937 年日中戰爭,伊 bô 轉來台灣,直接坐船去英格蘭 ê 劍橋 New Westminister College 神學校讀冊,拄好避開台灣實施皇民化 bô 民主 ê 困擾。


1941 年神學院畢業後,英國人教會海外宣道會受職伊為宣道教育師,伊 tī 英國四界宣教,建立了真好 ê 人脈,這對伊以後宗教事業發展有真大 ê 幫贊。日本偷襲珍珠港後,英國正式加入對日戰爭,黃彰輝 tō 變成敵人國 ê 外國人,行動受 tio̍h 限制。但是經過長老教會走傱,英國內政部安全署特別許可,伊 ē-sài tī 英國自由行動--ah。

黃彰輝kah Winfred Sounder結婚照-httpwww.laijohn.com

佇英國結婚生子 1943 年,經過世界普世會 ê 紹介,去倫敦大學亞非學院教英國軍人日語 kah 台語,bô 偌久就升做正式 ê 老師,契約三年。佇遮熟似英國女性傳教師 Winifred Sounder,兩人相愛,由蘭大衛醫生替 in 二人主持婚禮。因為戰爭 ê 關係,通信中斷,in 兩人結婚 ê 代誌,台灣 ê 序大 kah 親情 lóng 毋知。1945 年戰爭結束,德國無條件投降,大漢後生 David 出世。英國雖然戰贏,m̄-koh mā 付出慘重 ê 代價,民不聊生,生活困難,國力大不如前,殖民地紛紛獨立。黃彰輝夫婦 tō 決定 beh 轉去祖國台灣。


台南神學院第一个台灣人 ê 院長

1947 年 tī 長榮中學教英文 kah 聖經,228事件後,國民黨清鄉,白色恐怖漫延全台灣。1949 年經過7年關校 ê 台南神學院決定復學,特別請黃彰輝為第三任院長,是第一个台灣人 ê 院長。


主張 「實況化神學」

彼時台灣 ê 基督教分做兩派,一派是長老教會派,另外一个是護教反共黨國派。1951 年,南、北長老教會合一為總會,加入世界普世教協總會 (WCC)。白色恐怖時 ê 時,國民黨不時想 beh 約談黃彰輝,m̄-koh lóng hōo 西洋人 ê 副院長 kā 特務趕--tshut-khì,副院長堅持國民黨政府愛有英國領事館 ê 許可,tsiah ē-sài 來約談。1952 年,台南神學院改為六年學制,設立在職牧師返校進修 ê 制度,神學班 mā 開始招收女性學生。黃院長主張 「實況化神學」,基督教徒愛融入當地 ê 文化 kah 歷史,愛對「我是台灣人」開始做 khì ,關懷政治,tī 教學 lóng 全部用台語,推行本土化。1952 年被邀請參加日內瓦 WCC 世界總會籌備委員,當年有邀請美國副總統尼克森來主持東海大學 ê 破土典禮,黃彰輝和黃武東牧師兩人擔任第一任董事。


經歷內外衝突的人生

1956 年黃彰輝受邀做第四屆長老教會總會 ê 議長,黃武東牧師為總幹事。 Tī 非洲開會 ê 時,被邀請成為世界宣教神學教育基金會委員,同年 koh 擔任美國聯合長老教會宣教諮詢委員會主席。 Hit 陣,台灣 ê 政府敵視異國 ê 婚姻,黃彰輝夫婦 ê 身分證 kah 護照上 ê 婚姻欄 lóng 是空白--ê 。甚至 koh 有護教反共黨國派 ê 牧師恥笑講黃彰輝 kah tsi̍t ê 查某人同居、生了四个私生子等等歧視 ê 語言。外國人 bô 受 tio̍h 國民黨 ê 歡迎 , 而且黃彰輝基督教事務 tiosk bô 閒--ê 、定定 bô tī 厝--裡,夫人凊心之下 suah tshuā 四个囡仔轉去英國。1960 年,台南神學院 ê 學歷 iáu-bô 受 tio̍h 教育部 ê 承認,因為擔任院長 ê 黃彰輝 m̄ 接受政府 ê 三 ê 條件:1. 軍事教官愛入校園, 2. 學校愛承認人二室駐校、控制學生思想,3. 愛全面改用北京話上課。

黃彰輝牧師-台灣教會人物檔案(人光出版社)http://gospel.pct.org.tw

發起台灣人民自決運動 伊特別注重英語、希臘語、哲學、教義、新約、音樂 kah 宗教科學。經過刻苦 ê 經營,suah 建立出世界級 ê 神學院。加拿大多倫多 Knox College 肯定 i 對台南神學院 ê 貢獻,頒授榮譽博士學位。1965 年東京大學 mā 頒授榮譽博士學位。當年 tī 慶祝長老教會來台傳教 100 年 ê 紀念,破例 koh 邀請黃彰輝再度擔任總會議長,推行各種 ê 慶祝活動。活動任務完成了後,伊辭去台南神學院院長,由宋泉盛博士接任,黃彰輝去擔任倫敦 WCC 神學教育基金會 ê 副主任。1971 年 koh 升做 WCC 神學教育基金會總幹事。Tī 基督教 ê 教界內面,tsit ê 地位是非常崇--高-- ê。1972 年尼克森訪問中國,台灣地位陷入危機。當時由黃彰輝牧師、林宗義教授、黃武東牧師、宋泉盛院長發起台灣人民自決運動。台灣人ê 運命 bē sái hōo 人當做商品交易,愛實現聯合國憲章 ê 人民 ū 自決 ê 自由,喚起台灣人 ê 意識。

黃彰輝牧師-台灣教會公報新聞網

推動成立台灣人公共事務協會(FAPA) 1977 年台灣基督教長老教會 ê 總幹事高俊明牧師發表人權宣言,支持台灣 ê 自決運動。1980 年高俊明牧師被掠,黃彰輝展開救援。當年,黃彰輝 kah 彭明敏等海外人士推動台灣人公共事務協會(FAPA),拓展國際空間。1989 年,有長年食薰歷史 ê 黃彰輝 tit - tio̍h 肺癌末期。經李登輝副總統 ê 奔走,黃彰輝轉來到心愛 ê 故鄉。長榮中學盛大歡迎傑出校友轉來,並舉行感恩禮拜。台南神學院 hōo i 榮譽神學博士學位,副總統李登輝召見。黃彰輝提出國是建言,lóng hōo 李登輝肯定接受,並且答應推動 i ê 所言。1988 年旅居美東 ê 台灣同鄉會,tī 紐約 ê 台灣會館設宴 25 桌,歡迎黃彰輝牧師來訪,並成立基金會,當年黃彰輝 ê 回憶錄落筆完成。


kā 台灣 tshuā 出去世界

Tsit 位哲學家,神學家,教育家一直教示台灣人愛疼痛家己 ê 文化,愛有國際視野 kah 國際觀,kā 台灣 tshuā 出去世界。I tī 台灣上軟弱、危險 ê 時陣,tshuā lán 台灣行入去台灣人民自決 ê 運動內,kā 台灣出頭天,注入去強心劑,安定 lán 台灣 ê 民心。


59 views0 comments

Commentaires


bottom of page