top of page
Search

012 《亞細亞的孤兒》-吳濁流

Updated: Oct 13, 2021

羅大佑有一條 tsiânn 出名 ê 歌叫做〈亞細亞的孤兒〉,伊tō是引用台灣作家吳濁流上重要小說 ê 冊名?吳濁流是啥 mih 人、為啥 mih 伊 ē 講日本時代 ê 台灣人是亞細亞 ê 孤兒— leh? 咱今仔日 tō 來聽吳濁流身份認同轉變 ê 故事! (聽故事請來遮podcast連結)

文稿編寫kah校對:杜荷洲、王宇莉、葉信鴻

吳濁流(正爿)kah小弟吳建鋒合影

家族因抗日被掠 吳濁流1900年出世佇新竹新埔,細漢 ê 時定定聽 tio̍h 伊 ê 叔公抗日被掠,祖厝 khì hōo 人放火燒--khì ê 故事。阿公一直交代伊袂使插政治,做一 ê 戇百姓 tō 好。M̄-koh,這 ê 事件,一直留佇伊 ê 心肝內。自細漢伊就去漢文書房學漢文,到11歲 ê 時,庄--裡上尾 ê 漢文先關門khì--矣,伊只好去接受日本式 ê 現代教育。


1916年伊考入去 tsiânn 歹考 tio̍h ê 台灣總督府國語學校師範部。讀冊 ê 時陣,拄 tn̄g-tio̍h 日本領台 20年 ê 紀念。師範學校 ê 學生 hőng 派到現場歡迎皇親仕紳,名流政客。伊看 tio̍h 貴族院議員辜顯榮坐 tī 一台特大號人力手車仔。辜顯榮是𤆬日本人進入來台北城,hőng 賞賜 tsò 全台灣鹽 kah 鴉片 ê 總代理,suah 變 tsò 一 ê 好額人。吳濁流聽 tio̍h 懸年級 ê 學長佇後面 kah 叫做 「辜狗」,顧日本政府 ê 狗 。koh 講:「辜阿榮假顏智(甘地),破尿壺假玉器」,hōo 伊印象 tsiânn 深--ê。


吳濁流先生(左/倒爿)tī 關西公學校kah日本同事合影

受著日籍女同事的鼓勵開始創作小說 1918年,第一次世界大戰了後,自由 ê 思想傳來到台灣,伊寫一篇文章「學校佮自治」,佇新竹州教育科 ê 刊物發表。日本政府認為伊思想偏激,kā 伊調去交通上無方便 ê 四湖庄公學校。1937年轉任 tsò 關西公學校首席訓導,學校來一位日本女老師袖川。袖川小姐愛讀小說,mā 有 tī-leh 寫小說,伊鼓勵吳濁流小說創作。袖川 kā 吳濁流寫 ê 小說〈水月〉提去《台灣新文學》雜誌投稿,意外--ê khì 予採用,無偌久 koh 再寫一篇 〈泥沼中 ê 金鯉魚〉,mā 被採用。可惜,心內 ê 愛人袖川小姐被調去別 ê 學校,吳濁流失望之餘,封筆無愛 koh 寫作--ah 。

中國夢碎 發現原鄉就是祖國

1940年新埔運動會 ê 時,日本督學無理 ê 責備台灣老師,吳濁流爭取無效,suah 憤怒辭去頭路。1941年戰爭擴大,伊驚 hōo 人掠去做兵,tō tshuā 某囝走去汪精衛政府控制下 ê 南京,tī 日本人開 ê《大陸新報》做記者。 Tī 報社內面,伊想袂到--ê 是,佇南京 ê 日本同事無種族歧視、mā 有開朗 ê 世界觀。佇遮伊熟似 tio̍h 上野總編輯,in 兩个人成做肝膽相照一世人 ê 朋友。M̄-koh 伊發現祖國政府貪污腐化,人民做人處世馬虎虛華,kah 伊所想像 ê 中國完全無仝。中國人 koh 講伊是日本間諜,袂受 tio̍h 逐家 ê 信任。Tī 中國15 個月 ê 經驗,伊上大 ê 收成是發現伊真正 ê 祖國是台灣。

1926年,吳濁流先生(倒爿)tsham 夫人林先妹(前)kah 同事劉先生合影

記者人生因為228事件中斷 1944年,吳濁流轉到台灣、tī《台灣日日新報》做文化記者,熟似一位知音──台北帝大 ê 工藤好美教授。工藤定定邀請吳濁流 kah 張文環、呂赫若、王白淵等台灣文化界 ê 菁英到 in 兜座談,tse 對吳濁流以後所研究 ê 台灣文學誠有幫贊。1945年國民黨政府來台,日日新報社改做雙語 ê 《台灣新生報》,日語版面 tō 由吳濁流負責。伊 ê 薪水只有中國人的百分之六十 niā 。兩年後日本版 suah hőng 取消,伊 tō 去林茂生先生辦 ê 《民報》上班。毋過民報因為報導228事件,去 hōo 國民黨禁--起-來--矣。Hit 陣吳濁流寫一本經濟冊《黎明前 ê 台灣》,主張台灣愛向工業發展、提供青年就業 ê 機會,受到大同公司林挺生 ê 賞識去大同工職教冊,bô 偌久 tō 調伊去做機器工業工會專員,一直到退休為止。

發表代表作《亞細亞的孤兒》

1946年,日文長篇小說《亞細亞的孤兒》出版。Tse 是吳濁流 tī 戰火中、日本政府監視中、經濟壓力下,用生命來完成一生上重要 ê 著作。《亞細亞 ê 孤兒》 描寫了台灣人 tī 日本時代 ê 苦悶 kah 身份認同 ê 悲哀:主角胡太明 tī 日本時代上課 ê 時,老師講逐家 lóng 是日本人,事實上,日本人看台灣人是支那人、中國人講台灣人是日本人 ê 走狗。這本冊 ê 華文版一直到1959年 tsiah 出版。《亞細亞的孤兒》mā 是影射 tio̍h 對蔣介石來台灣 ê 中國難民 ê 苦悶:in tī 台灣 hőng 叫做芋仔,轉去祖國中國,suah hőng 叫做台胞 ê 外省人,心情真複雜 ê 描述。

1970年10月10日林白出版社發行ê《無花果》。因為描寫228造成轟動,上市bô-guā-kú tō hōo 國民黨查禁。相片tō是留存數量真少ê初版《無花果》。

自傳《無花果》《台灣連翹》發表 揭發228真相 1964年,吳濁流創辦《台灣文藝雜誌》,引起了探討鄉土文學可能性 ê 風潮,培養出陳映真、黃春明、王禎和、王拓、楊青矗等作家。伊 kā 全部 ê 退休金設立了吳濁流文學獎,獎勵後進。1966年,伊 ê 日文自傳《無花果》,分做三改,佇台灣文藝雜誌發表。內面有18頁是用記者 ê 角度來描寫228事件發生 ê 情形,造成轟動。1970年《無花果》再度發表單行本,suah 去 hōo 國民黨查禁,m̄-koh 真濟《無花果》ê 小說已經按地下流通出去市面--矣。1974年,伊用3年3個月 tsiah 完成《台灣連翹》, tsit 本冊表明了伊是按怎由中國民族意識轉化成做台灣意識 ê 心路歷程,mā 表明台灣屬於台灣人 ê 時代到--ah。 為 tio̍h 欲避免 hōo 國民黨查禁,12 年後政治較安定 ê 時, tsiah 由鍾肇政翻譯成做華文,正式出版。1984年,khah 早 hőng 禁 ê 《無花果》mā 再度由前衛出版社佇台灣發行。

《台灣連翹》是吳濁流人生上尾ê作品,內底有伊對過去客觀誠實ê 描寫批判,mā有對台灣真深ê 未來向望。 相片是1987年初版ê《台灣連翹》。(相片為本站企劃編輯陳翔容個人收藏)
來自《台灣連翹》內頁 吳先生hām吳濁流文學獎紀念碑合影

用生命寫下台灣人的形成 《亞細亞 ê 孤兒》、《無花果》、《台灣連翹》是吳濁流 tī 台灣特殊 ê 歷史空縫中,用性命創造出來 ê 三本大作。伊用留遺言 ê 寫作方式苦心提供伊家己 ê 心路歷程 hōo 台灣人思考未來 beh 按怎去、beh 按怎行、beh 按怎去思考台灣 ê 未來。

吳濁流先生tī 新竹縣新埔鎮大茅埔 ê老厝「至德堂」

(部片圖片選自Hakka literature 客家文學)

45 views0 comments

Comments


bottom of page