Tī 自來水普遍化進前，啉井水是有可能會出代誌--ê。若是 bô 細膩，啉--tio̍h ê 水內面若有砷（一種毒性誠懸 ê 重金屬，古早人會 kā 提來做毒藥 ）， tō 會 tòo tio̍h 烏跤病，m̄-nā 疼 kah beh 死、koh 愛截肢，會 hőng 認為是歹運著厄、m̄ 敢kah in 往來。今仔日，咱 tō beh 來聽王金河醫師翁某 tsiok 有愛心 teh 照顧烏跤病患者 ê 故事。 (看不懂台文？請點Podcast讓李老師讀給你聽)
文稿編寫: 王宇莉、葉信鴻、李以如 校稿: 王宇莉 潤稿: 杜荷洲
東京醫科大學畢業 1916年，王金河 tī 台南北門出世，老爸是以插蚵仔 kah 掠魚為生。I 原先是 tī 台南長老教會中學讀冊，m̄-koh 因為當時總督府 bô 承認教會學校 ê 學歷，只好 koh 去日本明治學校讀預備科，順利--ê 考入去東京醫科大學。畢業以後，奉厝--裡 ê 命令，轉來台灣 kah 毛碧梅小姐結婚，通好 kā 破病 ê 老母沖喜。婚後去日本大久保病院上班。兩年後老母過身--去，tō 轉來台灣處理老母 ê 後事，自按呢 tō lóng 留 tī 台灣行醫。I 當選過兩屆 ê 台南縣議員，m̄-koh 因為派系之爭，hōo 競爭者誣陷入獄 23 工。雖罔後來拍贏官司、平反了名聲，m̄-koh 人格被抹污 ê 冤枉日子 hōo i 凊心失望，tō 離開政壇，專心行醫。
恐怖ê烏跤病
1957年，故鄉北門發生了怪病「烏焦蛇」（烏跤病），tòo tio̍h 怪病 ê 患者，末梢血路會 bē 通，致使小腿反烏，患部 koh 會發臭生蟲，hōo 人疼 kah 擋袂牢，愛截肢處理，截肢以後 mā 有可會繼續湠到大腿，tō 愛二度截肢。Hit 當陣，患者 lóng 深信烏跤病是邪神作怪、因果報應 ê 結果，有 ê 患者因此輕生自盡。
回鄉照顧上需要照顧的患者
1959 年王金河醫生接 tio̍h 長老教會 ê 奉召，投入去烏跤病 ê 醫療救濟大工程。這个工程是由美國牧師娘孫理蓮出資金，由王醫師主持，mā 請 i 東京醫學大學 ê 學弟謝瑋來支援，成立「憐憫之門」診所，開始了 25 年 ê 免費醫療服務。這間診所會使收留 80 名患者，大部分 ê 患者 lóng 是對布袋、北門、學甲、義竹四个地區來--ê。
1950 年以後 ê 北門等地區，因為地層下陷、海水thàu-lām 入去井水，鹽份傷懸，suah 無法度通好啉，只好另外拍 khah 深 ê 古井來用。井愈挖愈深，重金屬砷 ê 量 tō 愈懸，啉 tio̍h 這款水以後 tō 會得 tio̍h 烏跤病。
親像耶穌捨己的愛teh愛患者
王醫師 kah 護士長王滿嬌，誠有愛心 ê 對待 tsia--ê 患者，m̄-nā 細膩仔 kā 牢 tī 肉--裡 ê 蛆ngiáu--出-來，koh kā 行動不便 ê 患者由二樓偝--落-來換藥仔。王醫師 ê 夫人 mā 每工煮三頓 hōo 患者食，koh 𤆬領 in 唱詩歌祈禱，hōo in 內心有向望。若是有散赤 ê 患者過身--去，in 會去木材行買柴板做棺材，koh kā 患者 ê 身屍扛去山頂埋--起-來。這種 ê 義行感動了誠濟醫界 ê 人士，不時有人會來鬥相共，社會 ê 贊助 mā 源源不斷而來。
捐家己ê土地幫助患者建立自立能力 雖罔不幸染 tio̍h 烏跤病 ê 患者享有免費 ê 醫療服務，猶 m̄-koh 無跤、ia̍h-sī 賰一跤 ê 人生，生存猶是真困難，患者 mā m̄ 甘願死坐活食，beh 按怎--neh？Tī 孫理蓮牧師娘 ê 幫贊之下，王醫生 tō kā 家己 ê 土地捐--出-來，起一間「烏跤病患工藝生產中心」，由夫人負責訓練患者編草帽、草蓆等，銷去日本等地，hōo 患者有經濟收入 kah 抬懸 in ê 尊嚴。1977年，省政府才隨後接辦「烏跤病防治中心」。1984年後水道水普遍化--ah，烏跤病患者愈來愈少，基督教芥菜種會 kah 王醫師 ê「憐憫之門診所」 tō 功成身退--ah。
翁某情深
1985年，王醫生轉來私人診所行醫，想講 tsit-má ē-tàng khah 輕鬆--ah。殊不知，夫人因為糖尿病併發症，腦血管
窒--tio̍h，愛 kā 倒跤截肢。Tī 夫人最後十年 ê 輪椅生涯，不管時 tō 會看 tio̍h 王醫師捒夫人四界去𨑨迌 ê 情行，kā i 照顧 kah 無微不至，翁某情深，使人感動。
得tio̍h烏跤病醫療歷史紀念館kah景星勳章
1993年，王金河醫生得 tio̍h「賴和醫療服務獎」kah 北美洲台灣人醫師協會頒發 ê 「醫療服務獎」。2003年，文建會 kah 台南縣政府 tī 「憐憫之門診所」 ê 原所在，成立了「烏跤病醫療歷史紀念館」。 2007年，陳水扁總統頒發景星勳章 hōo 王金河醫師。
Tī 怪病烏焦蛇拄發生ê 時陣，社會驚惶、迷信謠言四界流傳，王金河醫師翁某秉持 tio̍h 仁心仁術 ê 精神，免費為散赤 ê 患者醫病，並為 in 提供生活自理 ê 訓練 kah 趁錢 ê 技術，為當時 bih tī 烏暗 iap-thiap ê 鄉親，提供了一葩寶貴 ê 光明燈。
多謝逐家收聽，咱後禮拜二，tsiah koh 來坐。