Lán台灣有一ê音樂家創作了真tsē有台灣特色ê作品，像《1947序曲》、《台灣翠青》、《台灣頌》，你若有聽過管弦樂團演奏台灣民謠，有真大ê機會mā是這ê音樂家編曲--ê。這位hōo人稱做「台灣ê拉赫曼尼諾夫」ê音樂大師tō是lán這禮拜beh紹介ê蕭泰然。
文稿編寫：吳鈺瑾 校對：林琪蓁、陳翔容
看不懂台文，點連結讓李講古我來聽Podcast讀給你聽
逐家好！我是李贊星。真歡喜逐家來收聽「李講古，我來聽」。Lán這禮拜beh講一位浪漫派ê音樂詩人——蕭泰然（Siau Thài-jiân）教授。
蕭泰然是1938年tī高雄出世--ê。老爸是齒科醫生，老母是留日ê鋼琴老師，mā是蕭泰然ê音樂啟蒙者。老母蕭林雪雲（Siau-Lîm Suat-hûn）bat對伊講：「你是我教--過ê學生中，反應上緊，上有天份--ê。」Tī長榮中學ê畢業典禮中，老爸專工uì高雄來參加。校長tō趁機會kā蕭爸爸建議，hōo蕭泰然去學音樂。校長講「做一ê一流ê音樂家，sī比做一ê二流ê齒科醫生koh-khah有成就感--ê 。」
聽tio̍h校長ê建議，蕭泰然1959年考入去師大音樂系。Tsiânn好運--ê tú-tio̍h tshím對法國巴黎轉--來ê許常惠（Khóo Siông-huī）教授。許常惠tī蕭泰然ê作業中發現著伊ê天份，tō叫伊下課以後去做許教授ê私人學生，免費授課。
1963畢業彼年，蕭泰然和台南望族出身ê高仁慈（Ko Jîn-tsû）小姐結婚。婚後兩年，去日本武藏音樂大學進修。本來想講專修鋼琴，m̄-koh恩師藤本秀夫（Tîng-Pún Siù-hu）發現伊有作曲ê才華，tō引tshuā伊行入去作曲家之路。暗時蕭泰然mā tshiânn-tsò藤本老師免費ê入室子弟。另外一位鋼琴老師中根伸也（Tiong-Kin Sin-iá）mā不三時tī浪漫派ê鋼琴協奏曲領域內kā伊指導。Tse對蕭泰然往後ê創作風格有真大ê影響。
1969年，蕭泰然轉來到台灣四界去各學校教冊。主要是教琴為主，作曲為副。六年後，才升做師大音樂系ê講師。Mā tsiânn好運--ê，tú-tio̍h奧地利來ê音樂家蕭滋博士（Dr. Robert Scholz），指導伊鋼琴kah作曲。兩人雖然是師生ê關係，感情卻親如爸囝。蕭滋博士tī作曲技巧kah鋼琴藝術hōo蕭泰然真深ê啟示。無偌久，蕭泰然tō升做音樂系ê副教授。另外，南加州來ê Eudice Shapiro教授，tī台灣提tio̍h蕭泰然ê《台灣頌》做世界首演。這是蕭泰然上kah-ì ê作品。發表了後，引起廣大聽眾tshiânn大ê共鳴。這ê作品mā hōo林昭亮（Lîm Tsiau-liāng）、胡乃元（Ôo Nái-guân）、陳慕融（Tân Bōo-iông）提出來演出。
1975年，蕭泰然tī台北舉行「蕭泰然樂展」，由世紀交響樂團kah台北兒童、YMCA合唱團共同演出。這年，蕭泰然寫出一首精彩ê小提琴小品《冥想曲》。
1977年，蕭太太生理失敗，全家不得不移民到Atlanta來投靠小妹蕭美媛（Siau Bí-uān）。39歲ê蕭泰然拄才離開台灣來到美國，思鄉心切，伊將思念故鄉ê感觸譜出民歌《出外人》，描寫出一ê獨居異鄉、遭遇挫折ê遊子心情。《點心擔》唱出出外人思念故鄉食物ê滋味，hit種激動ê 心情。
1978年，蕭泰然ê音樂知音許丕龍（Khóo Phi-liông）先生mā移民到洛杉磯--ah。許丕龍再三邀請蕭泰然來洛杉磯，伊講：「只要我有一碗飯通食，你就有一碗 ám-muê-á通啉。」Tī許丕龍kah同鄉ê幫贊之下，蕭泰然tī shopping mall內底開一間小食店兼賣台灣手藝品。有一工，伊tī店內彈鋼琴soo-tháu心情。琴聲停--落-來了後，khiā tī琴邊tshiânn久ê三位Long Beach舞蹈教授，對伊講: “Young man, why you are here?” 這句話kánn-ná kā蕭泰然搧著tshuì-phuè仝款，伊彷彿是大夢初醒，tō決定欲轉去到伊ê音樂之路。
1980年，台灣ê音樂家、美術家、文學家紛紛移民到南加州--來。洛杉磯suah變做台灣文化人聚集ê所在。1982年，蕭泰然和許丕龍合辦「第一屆南加州感恩節音樂會」，促成了海外台灣人菁英ê大會師。這ê音樂會大量--ê紹介台灣音樂家ê作品。同時mā hōo逐家了解台灣是一ê有優秀音樂傳統ê民族。這ê籌備一年ê音樂會，tī氣派豪華ê水晶大教堂內面演出，將近三千人參加。節目有：陳泗治（Tân Sù-tī）ê「台灣高山之舞」、「鍵盤頂ê遊戲」、「挵（lòng）龍」。江文也（Kang Bûn-iá）ê「台灣舞曲」、「鋼琴三舞曲」。Mā有蕭泰然ê「思鄉夜曲」、「幻想圓舞曲」kah兩首改編ê弦樂四重奏：「心酸酸」、「燒肉粽」。蕭泰然來到洛杉磯了後，毋若是舉辦大型ê音樂會，伊mā重視栽培少年ê音樂家。有一擺由少年音樂家組團巡迴去美國十大城市演出，tī舊金山做最後一場ê演出「出外人」ê時，少年--ê ná演奏ná流出感動ê目屎。演出了後，逐家mooh mooh做伙，鬥陣享受tio̍h做台灣人ê驕傲。
1986年，48歲高齡，蕭泰然去加州大學碩士研究所進修作曲。Tī兩年學師仔ê日子，影響伊上大ê就是韓國ê出名教授B. K. Kim。金教授建議蕭泰然mài hōo現代音樂影響--tio̍h，應該以台灣民謠做為元素koh再灌入去西洋、古典、浪漫、印象ê作曲技巧，培養出台灣現代音樂ê花蕊。Mā tshiânn好運--ê，koh去tn̄g-tio̍h恩師Milton Stern做伊ê鋼琴老師。畢業了後，Dr. Stern suah變做蕭泰然ê樂迷。後--來，Dr. Stern tī 1995年去到台灣kā蕭泰然ê鋼琴協奏曲tī台灣做首演。Dr. Stern安排台北愛樂交響樂團kah指揮家Henry Mazer（梅哲）合作。可見Dr. Stern和蕭泰然ê師生感情是有夠好--ê。
1988年，蕭泰然ta̍k工用十八點鐘不眠不休--ê全神貫注tī-leh創作小提琴協奏曲。彼時老爸tú過身，老母破重病，夫人生理無順，tsia-ê打擊tō是伊人生上烏暗ê時陣。伊講：「我是用寫遺書hōo台灣人ê心情，完成這首小提琴協奏曲--ê。」作品完成後，洛杉磯tú-hó tī-leh舉辦「台灣文化之夜」，林昭亮mā有來參加。Lán台灣ê文化產婆——林衡哲（Lîm Hîng-tiat）醫師，tō順手kā蕭泰然ê樂譜交hōo林昭亮參考。無想到隔轉工，林昭亮tō激動--ê kā蕭泰然講：「恭喜--ooh！無想到亞洲人竟然有法度寫出tsiah-nī-á suí ê協奏曲。」這ê好消息去hōo日裔指揮家大山平一郎（Tāi-San Pîng-it-lông）知影，主動去tshuē蕭泰然並且安排kā這首有東方味--ê、充滿活力--ê協奏曲tī聖地牙哥交響樂團做世界首演。當首演結束ê時，林昭亮、大山平一郎、蕭泰然做伙出來謝幕ê時，聽眾起立，感動kah噗仔聲phah kah無停。這場音樂會是台灣文化國際化ê先聲，hōo世界知影台灣已經有一流ê藝術作品--ah。聖地牙哥論壇ê評論講：「Kā懷鄉記持ê民謠和拉赫曼尼諾夫後期浪漫派ê豐富色彩完全融合--起-來，莫怪會受著聽眾hiah大ê歡迎。」Lóng-tsóng演出三場ê音樂會，坐滿了六千外ê聽眾。逐家lóng認為蕭泰然ê小提琴協奏曲是廿世紀東方浪漫派ê代表。美國聖地牙哥交響樂團tī 1995年再度演出蕭泰然的作品：由指揮家Yoav Talmi領導、由范雅志（Huān Ngá-tsì）擔任大提琴主奏，世界首演蕭泰然ê大提琴協奏曲。
蕭泰然tī節目單頂懸講：「我ê小提琴協奏曲tō親像清純少女仝款，hōo你一見鐘情。」伊koh講：「我ê大提琴協奏曲tō親像成熟ê少婦，有豐富ê內在美涵。」
1994年，蕭泰然koh再創作伊人生ê第三首協奏曲，tō是轟動武林ê鋼琴協奏曲。這擺ê世界首演tī加拿大溫哥華，由出名ê溫哥華交響樂團和少年鋼琴家湯崇生（Thng Tsông-sing）合作。由名指揮家克來・米契爾（Clyde Mitchell）領導，tī古色古香ê Orpheum Theatre演出。第一樂章是生命ê史詩，第二樂章是心酸酸ê昇華，第三樂章是勝利ê凱歌kah天使之音。這首鋼琴協奏曲表現出蕭泰然對友情、思鄉kah信仰ê紛亂衝突ê心內感情。Tsia ê感情uì每一ê樂章內散發--出-來。演出了後，全場爆發出如雷ê噗仔聲，tō知影這首華麗、浪漫、金光閃閃ê鋼琴協奏曲已經得著全場聽眾ê共鳴。
蕭泰然創作tio̍h三首世界級水準ê小提琴協奏曲、大提琴協奏曲、鋼琴協奏曲以外，koh tī 1994年完成伊人生上感動人、上重要ê作品：《1947序曲》。這ê作品是描寫台灣tī 1947年二二八事件中，被國民黨軍隊屠殺ê苦難歷史。Tō是因為這首作品，蕭泰然被國民黨政府列為海外黑名單，袂當轉去伊心愛ê故鄉--ah。
1995年，加州奧克蘭門斯劇院邀請這位人人尊稱為「台灣拉赫曼尼諾夫——最後ê浪漫主義詩人」演出。由奧克蘭青年管弦樂團kah舊金山灣區ê百人合唱團做歷史性ê首演。由魏斯甘尼 （Wes Kenney）指揮，黃美星（N̂g Bí-tshenn）女士擔任女高音。音樂中一直重疊--ê強調台灣人愛行出烏暗、開拓光明ê未來。Tī最後，百人合唱團唱出鄭兒玉（Tēnn Jî-gio̍k）牧師作詞ê《台灣翠青》ê時，彷彿是祖國台灣ê美麗山河出現tī面前。一幅台灣國旗tī心靈內漸漸上升，一ê鳥語花香，有情有義ê台灣理想國，tī蕭泰然ê音樂詩歌中漸漸仔清楚--ê出現tī面前。
多謝逐家的收聽，lán後禮拜二tsiah koh來坐。