若講著人權律師，逐家會想著siánn-lâng--leh？若講著人權律師、後--來koh投入選舉，你koh會想著sia̋nn--leh？若講著人權律師、當選議員，koh提錢贊助有台灣意識ê文藝活動，愛有這三ê條件，你ê答案是⋯⋯？
嘿嘿，小等一咧！各位朋友回答進前，請kā時間、空間khǹg tī 1930年代、日本統治之下ê台灣。
Lán今仔日ê主角：陳逸松律師，tī 1930年代，是hōo日本總督府看了tsha̍k目ê一方之雄。伊是免費為弱者伸張正義ê人權律師。伊是1935年第一屆台北市市會議員。伊koh tī 1941年提錢幫贊張文環創辦《台灣文學》，抵抗彼陣皇民奉公ê文藝創作。
看不懂台文，請點podcast 連結李贊星老師讀給你聽 文稿編寫: 杜荷洲、王宇莉、葉信鴻、李以如 校對: 李以如 咱佇每拜二，來收聽台灣人 ê 故事，欲講陳逸松辯護士 ê 前半生。
伊是1907年佇宜蘭羅東出世--ê。阿公陳輝煌開發羅東真有成果，是有一千外甲土地 ê 大地主，koh 參加清法戰爭協防雞籠有功，予清國欽賜二品頂戴。陳逸松自細漢 tō kin 漢學先學漢學，畢業了後去日本讀冊，主修德文。學校教育 ê 方式是培養學生 ê 閱讀能力，予 in 會當了解外國人 ê 思想，hōo 伊會當 sáng-sè--ê 浸佇德國文學 ê 大海--裡，享受著歌德、海涅等文學 ê 精髓。伊參加學校雜誌 ê 編輯，捌 kā 胡適 ê 作品通譯做日文。佇雜誌社裡，開發出對文學 ê 趣味。伊 iā 參加辯論社，每禮拜一擺--ê 討論不同 ê 主題。共主題提來做辯論，互相攻防對方 ê 辯論點，這種 ê 正反面思考訓練 mā 開通了伊思想 ê 視野。1922年，考入去世界水準 ê 赤門，東京帝國大學法學部。一戰後，tī 大學中受 tio̍h 美國總統 Wilson 倡導民族自決 kah 蘇聯共產黨革命成功 ê 影響，參加背骨學生組成 ê 「東大新人社」，對極左 ê 馬克斯主義、無政府主義一直到極右 ê 國家主義制度，攏提出來探討。「東大新人社」分做十組公社，每組約二、三十人合租一間厝，生活鬥陣做伙，各人定定為著議題、觀點 ê 無仝，諍 kah 面 á 青恂恂，mā 提煉出 in 對社會主義運作 ê 理論。學生運動中，伊捌予共產黨利用--去，被警察掠去關。雖然被關過二擺，學校 mā 對伊真包容，予伊順利--ê 畢業。
畢業了，本成想 beh 去讀研究所，以後通好做教授，m̄-koh 伊 ê 老師 kā 伊點拄講，tī 日本，台灣人是袂當做教授--ê，伊只好改變方向，去參加司法科高等考試，以後通好做辯護士。tī 準備考試 ê 時間，心內想 tio̍h 老母賣田 hōo 伊讀冊 hit 種 ê 期待，想 tio̍h bat hōo 日本人看無、恥笑 ê 記持，tō 拚命讀 kah 三更半暝。考完試了後，去南京旅行 ê 時，搪 tio̍h 台灣人 ê 飛行士謝文達，介紹伊熟似國民黨安徽省高等法院檢察廳 ê 金廳長。金廳長一聽 tio̍h 陳逸松 mā 是帝大 ê 學弟，馬上 beh 聘請伊做檢察官，m̄-bián 考試，直接上任就可以，月給是約日幣120箍 ê 高薪。 陳逸松心內想，雖然中國落伍，m̄-koh 薪水 bē 䆀，生活指數低，食食 mā 會合。而且日本 ê 司法考試猶是未知數，揣其他 ê 頭路 mā 無把握，最後 tō 決定接受金廳長 ê 聘請。殊不知，有一工去金廳長公館，發現有一个人吊 tī 客廳，金廳長當 teh 用藤條 kā 伊捽。陳逸松問為何如此，金廳長應講：「伊是我 ê 警衛仔 ê 保證人。警衛仔 kā 我偷提物件，到今猶揣無人，我只好 kā 保證人掠來拍，拍愈 thiám、拍愈腥矂，按呢警衛仔 tō 會愈早提物件來還。」天--ah！世間竟然猶有這款為非糝做 ê 檢察官，陳逸松 tō kā i 講：「這款 ê 檢察官我無 giàn 做。」tō起身告辭--去。
轉來到東京無偌久，tō 收到高考及格 ê 通知書，歡喜甲趕緊敲電報轉去羅東 hōo 慈母知影。隔轉工緊提通知書去司法省登記為辯護士，立志成做為人權、為弱者 ê 辯護者。朋友三浦次郎介紹伊去東京松崗松平法律事務所上班，月給20箍爾爾。雖然薪水較少，毋過替人服務 ê 申冤中間，做菜鳥仔 ê 陳逸松 mā 學著袂少 ê 司法鋩角，尤其是伊 hām 三浦參加「自由法曹團」，免費替弱者伸張正義。日本 ê 法律來源自德國 ê 社會思想，認為 beh 判斷「因」造成 ê 「果」，愛 uì 整個社會觀點來判斷。這種 ê 宏觀社會觀念 hōo 伊感觸誠深。1933年轉來到台灣，tī 台北大稻埕開設「陳逸松法律事務所」。日本 ê 社會誠重視學歷，伊掛 tio̍h 東京帝國大學畢業，司法科高等考試及格 ê kha̋ng-páng，連法官 mā 對伊尊重三分。伊 mā 遵照「自由法曹團」ê 精神，替弱勢免費--ê 伸張正義，開業後登門求救 ê 人愈來愈濟，真受 tio̍h 北部地區民眾 ê 尊重。
1935年日本領台40年，台灣總督府公佈實施地方自治，同意市議員 ê 一半，開放選舉，大稻埕 ê 市民希望陳逸松出來選舉，按呢較容易爭取著台灣人 ê 福利。競選期間乞食頭施乾 (ep.4 李講古我來講) tshuā 愛愛寮 ê 乞食組成樂隊，拍鼓--ê，歕古吹--ê，拍鑼--ê，鬧熱滾滾，吸引誠濟人來聽演講，當時規定納過五箍稅金 ê 市民才有資格投票，雖然如此，陳逸松 mā 得 tio̍h 第四懸票，是台北市會議員內底上少年 ê 議員。1936年日本配合 tio̍h 侵略中國 kah 南洋 ê 政策，台灣總督開始由武官擔任，實施皇民化運動，其中禁止人民穿有布鈕仔 ê 台灣衫。經過陳逸松議員 ê 爭取，kā 布紐仔改做暗鈕仔，lak 袋仔小寡仔改型，自按呢，台灣衫會使閣穿出來--ah。猶閣有宮廟 ê 祭拜，戲劇 ê 演出，mā tī 陳議員 ê 爭取之下，會使改變方式 ê 祭拜 kah 演出。
1937年日本人 kah 御用台灣作家聯合發行 「文藝台灣」。這群御用文藝作家攏有強烈 ê 殖民意識形態，漠視殖民地人民 ê 苦難，引起大多數知識分子 ê 不滿。陳逸松就提1500箍（約三萬斤栗仔）邀請留日 ê 朋友張文環當主編，mā 請出名台菜館「山水亭」ê 頭家王井泉先生 (ep.20 李講古我來講) 擔任出版 ê 實務，「台灣文學」就正式出刊--ah。因為題材是在地--ê，攏是台灣人 ê 生活經驗，馬上受 tio̍h 市場 ê 歡迎，1000份 ê 創刊號一禮拜 tō 賣甲空空。第二期加印到1500份 mā 賣了了。第三期開始 tō 印到3000份、黃得時、巫永福、張深切、林茂生、金關丈夫、瀧田貞治、楊逵 (ep. 21 李講古我來講)，mā 陸續加入陣容。陳逸松有 tī 第一期發表中篇小說「姊妹」。這本「台灣文學」比日本人 ê 「文藝台灣」超過三倍 ê 發行量，發行到1944年被總督府命令停刊為止。配合著皇民化 ê 運動，台灣傳統戲劇 kah 音樂被禁。日本人組立「演劇挺身隊」，特別對東京重金聘請松井桃樓先生，採用日本文學作品「南國之花」做為劇本，製作一部加強戰爭合理化 ê 政治戲劇。「台灣文學」 ê 同仁不滿， tō 組織「厚生演劇研究社」，請留日戲劇家林摶秋導演，改編張文環 ê 中篇小說「閹雞」來演。這幾落个月 ê 排練，食食 lóng 是山水亭免費提供--ê ，戲劇 ê 服裝，mā 是王井泉夫人踏 mi-sín 車仔，一領一領 tāu-tāu-á 做--出-來--ê。1943年9月，日本ê「南國之花」tī 有電風、有點心通食 ê 第一劇場演出，kah tī 三流設備永樂座臺灣 ê 「閹雞」捙拚，想袂到--ê 是「閹雞」場場爆滿，「南國之花」冷冷清清。「閹雞」雖然照規定用日語演出，m̄-koh 當呂泉生 ê 臺灣歌 「六月田水」hām 「丟丟銅仔」tī 台頂唱出來 ê 時，台跤 ê 觀眾 mā 綴 leh 唱，一擺 koh 一擺唱 kah 袂停。「台灣文學」作為對抗皇民化 ê 靠山，hōo 台灣作家充分發揮 in ê 良知，保持了台灣人 ê 尊嚴。
1945年8月15日，山水亭 ê 收音機放送出日本投降 ê 消息，臺灣人內心真正歡喜。一來戰爭結束--ah，免 koh 走空襲，二來臺灣回歸祖國，50年來 ê 災難就此結束，lán 會使當家做主--lo̍h！陳逸松 kā 偷藏 ê 中華民國國歌放送出來，呂泉生猶閣 kā 國歌做成五線譜 kah 歌詞，刻了鋼板 kā 歌譜油印分 hōo 大眾，商店 mā 紛紛 kā 日本店名修改，「日光堂」改做「三民書局」。中華民國 ê 上校軍官張士德 kā 陳逸松講，tī 國軍猶未到位進前日本人可能 ē 破壞建設，叫陳逸松 kā 少年人組織起來通好監視日本人，任命陳逸松為三民主義青年團中央直屬台灣區團部主任。消息一出來，四界 ê 少年家 lóng 想欲參加三民主義青年團，保護家園。日本投降到臺灣光復 ê 70 工內，臺灣無政府 ê 真空狀態，佳哉有青年團 ê 暫時填補，無計較名分 kah 報酬，創造了罕見 ê 自治奇蹟。1947年二二八事件發生，陳逸松為二二八事件處理委員會委員，應李萬居 ê 邀請鬥陣起草二二八處理委員會組織大綱，hōo 陳儀列為首謀名單，佳哉軍統局 kā 伊藏tī軍統局長林頂立 ê 厝內，避免被殺 ê 風波。1948年擔任第一屆考試委員，中央銀行常務理事。宜蘭縣第一屆縣長選舉 ê 時，陳逸松支持政治理念相近 ê 黨外人士陳旺全，得罪國民黨 ê 高層，自按呢伊放棄政治，專心生理。1964年臺灣 hām 法國斷交，國際情勢逆轉，地位非常危險，陳逸松tō復出政壇希望有所做為，以無黨籍 ê 身份參加臺北市長選舉失敗。1971年陳逸松收著日本朋友送 ê 羊羹，予國民黨特務認為是謀反 ê 炸彈，kā 伊逮捕。出獄了後，經由邱永漢先生 ê 走傱，用欲參加查某囝婚禮ê名義獲准出國。自按呢陳逸松tō長期離開伊心愛 ê 故鄉--ah。
多謝逐家 ê 收聽，lán 後禮拜二 tsiah koh 來坐。
Comments