014 台灣的凡古：陳澄波

世界級ê畫家，m̄驚「大格雞慢啼」：來聽30 歲tsiah考tiâu美術界上懸ê學府「東京美術學校圖畫師範科」ê台灣畫家陳澄波，tī伊52冬ê精彩人生中，是án-tsuánn透過美術hōo世界看著台灣、提懸台灣人ê文化意識。 (看不懂台文？請點Podcast讓李老師讀給你聽)

文稿編寫：吳鈺瑾 校對：林琪蓁、陳翔容

逐家好！我是李贊星。真歡喜逐家來收聽「李講古，我來聽」。Tī每禮拜二，聽台灣人ê故事。咱beh講一位世界級ê畫家。伊hōo人稱做台灣ê凡古（Vincent Willem van Gogh），伊叫做陳澄波（Tân Tîng-pho）。

1917年3月11，陳澄波（前排正爿第二位）uì國語學校師範科畢業，kah同學tī臺北市省立博物館前合影。

陳澄波tī 1895出世，拄好是日本領台ê彼年，日本時代ê開始。雖然老爸是清國ê舉人，學問tsiânn飽，m̄-koh 只有 tī漢學仔內面教冊。老母mā早死，家境清寒。到了13 歲才入去公學校讀冊。平常時仔tī厝--裡tiānn-tiānn會畫東畫西，對畫圖tsiânn有趣味。17歲ê時，考入去公費——食、住、穿lóng免錢ê「台灣總督府國語學校公學師範科」。

Tī tsia tn̄g-tio̍h一位啟蒙ê印象派ê水彩畫家：tō sī 鼎鼎有名ê石川欽一郎（Kinichiro Ishikawa，Tsio̍h-Tshuan Khim-it-lông）。陳澄波kah石川老師學著水彩ê技法kah寫生訓練，建立了tsiânn好ê畫圖基礎。

1917年，畢業了後，tī嘉義做小學仔ê美術老師七年，受tio̍h石川先生ê影響mā tiānn-tiānn會tshuā學生囡仔去野外寫生作畫。

1924年，30 歲ê高齡，考入去美術界上懸ê學府「東京美術學校圖畫師範科」。Tī日本留學ê時，家己規範講bē-sái虛華、ài認真phah-piànn。唯一ê娛樂tō sī去郊外ia̍h-sī上野公園寫生。彼時日本人對台灣iáu無啥了解，想講台灣唯一--ê tō sī高砂族，食mih-kiānn lóng用手me，對這ê烏鉎ê台灣人有一寡歧視ê行為。不而過，tī 1926年，這位烏鉎ê 臺灣人ê 作品，卻 tī 帝國美術展2283件參賽作品內面，經過激烈、嚴格篩選 ê 競爭，成為人人欣羨、入選帝國美術展ê 154件精品之一。

陳澄波先生有幾ā幅圖lóng號名做《嘉義街外》，這幅是目前知影siōng早ê 《嘉義街外》，mā sī 1926年伊第一kái入選第七屆帝國美展ê 作品。原作不幸失落，現此時kan-na 賰烏白相片。

這件作品叫做「嘉義街外（一）」。自án-ne，逐家lóng改叫伊「陳さん（陳先生）」。這項代誌，日本報紙mā有專欄報導，講伊是歷史上第一位入選到帝展殿堂 ê 臺灣人。毋若按呢，1927、1929 kah 1934陸續受tio̍h帝展評審ê肯定入選。是lán台灣人ê光榮。

1926年，陳澄波第一擺入選帝國美展，tī 畫室接受報社記者採訪。

1927年，畢業了後，tī老師ê建議之下，koh再入去研究科，做二年ê研究來增進學業。1929年，受tio̍h美術學校ê中國同窗ê邀請，去上海ê新華藝專教冊，sūn-suà擔任第一屆「中國美術展」ê西洋畫評審。Kāng這年，陳澄波ê作品「清流」hōo中華民國政府提去Chicago博覽會，代表中華民國參加展覽。

1931年tī 上海。正爿起是陳紫薇、夫人張捷、次女陳碧女、陳澄波、長男陳重光kah六叔伯小弟陳耀棋。

1932年，上海發生了一二八反日事件。陳澄波hőng認為是日本人，不時仔受tio̍h中國人ê 歧視、無公平ê對待，只好某仔囝𤆬--leh，轉來到台灣。

第三回臺陽展臺中移動展會員歡迎座談會。一排正爿起洪瑞麟、李石樵、陳澄波、李梅樹、楊佐三郎、陳德旺，二排上正爿起張星建（白西裝）、林文騰、（不明）、田中保雄、楊逵；三排右起吳天賞、莊遂性、（不明）、葉陶、張深切、巫永福、莊銘鐺

1934 年對日本學藝轉來台灣ê陳澄波、楊三郎（Iûnn Sam-lông）、李石樵（Lí Si̍k-tsiâu）、顏水龍（Gân Suí-liông）、李梅樹（Lí Muî-tshiū）、廖繼春（Liāu Kè-tshun）、陳清汾（Tân Tshing-hun）kah好朋友日本版畫家立石鐵臣（Tateishi Tetsuomi，Li̍p-Tsio̍h Thih-sîn）成立了由基隆顏家ê台陽礦業公司贊助ê「台陽美術協會」。這ê協會，不時仔舉辦畫展、講座，mā鼓勵藝術本土化：將台灣ê風景、名勝畫入去畫布內面。這十年ê時間，是lán西洋美術ê黃金期：創作上自由、上多元、上濟作品ê時期。

1946《慶祝日》，描畫嘉義街頭慶祝光復ê情景。畫中快樂ê氣氛ē-tàng看出陳澄波當時迎接國民政府ê心情。

1946年，陳澄波加入去中國國民黨，當選第一任嘉義市參議員。1947年，二二八事件燒到嘉義，國民黨ê部隊不敵民眾戰敗，紛紛逃避到水上機場內。地方ê士紳為tio̍h　beh平息事端，早日恢復正常生活，成立了「二二八事件處理委員會」，並派和平使者參議員六名，包括陳澄波在內，前往水上機場協商。殊不知，國民黨部隊竟然kā in掠--起-來拘留，嚴刑拷打，被迫承認煽動民眾暴動，無經過司法ê審判。3月25日陳澄波等人tī嘉義火車頭前被銃殺。結束了伊52歲精彩ê人生。

陳澄波雖然受著嚴格ê正統學院訓練，tī構圖ê嚴謹性、色調ê合理運用，lóng有刻板ê心得。M̄-koh伊受tio̍h伊足佮意、崇拜ê荷蘭後印象派畫家凡古ê影響，刻意保持純樸、素雅ê素人精神，tī作品內底有tsiânn特殊ê風韻。

陳澄波1928《自畫像》

除了得獎不計其數以外，伊成立了七星畫壇、赤島社kah tsiânn重要ê台陽美術協會，對推捒台灣ê藝術文化tsiânn有貢獻。可惜ê是英年早逝，對台灣人藝術化ê人生推廣，受著tsiânn大ê損失。

這位被人尊稱「台灣凡古」ê陳澄波先生，伊留--落-來ê作品《淡水》tī 2006年香港蘇富比ê拍賣場中，以1億4千4百萬新臺票賣出，創作了台灣人油畫上貴ê紀錄。

大概tī 1935-1937年間完成ê《淡水夕照》，2006年用1.44億新台票ê價數拍賣--tshut-khì。2007年，koh tī香港佳士德用2.12億台票ê懸價成交。

1995年，雕塑家蒲浩明（Pôo Hō-bîng）創作ê全身雕塑品，作品ê名叫做「我是油彩ê化身」，tshāi tī嘉義文化中心前ê廣場。

1997年，「陳澄波文化館」tī嘉義市中正公園對面設立。

1999年，陳澄波文化基金會成立，繼續發揚推廣台灣人ê藝術化人生。Kā這位世界級ê畫家創作ê精神留--落-來。

多謝各位ê收聽。Lán後禮拜拜二tsiah koh來坐！

圖片來源： （陳澄波文化基金會、新南向政策資訊平台 )