文稿編寫：劉嘉佳 校對：洪偉婷、郭孟樺
田朝明醫師kah田孟淑翁仔某 （ang-á-bóo）
「老少配」kám是現代人ê專利？七十年前，tō ū-lâng 勇敢爭取家己ê愛情，閣用tsi̍t 世人維護台灣ê人權。遮爾á勇敢ê民主鬥士是啥人？李贊星老師講予你知！ 看不懂台語文，讓李老師念給你聽，點這聽podcast
弱勢ê守護者
田朝明先生tī日本東京醫學院畢業了後，tú-tio̍h第二次世界大戰結束，日本彼當時經濟tsiânn 䆀，tsiânn濟難民lóng無飯通好食，甚至無力kā身軀頂ê胡蠅趕走，看tio̍h這个慘淡ê狀況，田醫師就立志beh做一个弱勢ê守護者。 音樂kah哲學來牽線 三十三歲伊轉來到台灣ê診所工作，伊tsah tsiok濟冊kah唱片，所以定定ē邀請地方ê人士，鬥陣來聽音樂、討論讀冊ê心得。Tī-leh音樂欣賞ê時，田醫師提一本哲學ê冊，叫做”銀ê湯匙仔”，借hōo田孟淑小姐看，兩个tō開始si̍k-sāi。田醫師拄好有si̍k-sāi一个朋友叫做田先生，田先生有一个查某囝，想beh去考法學院，恐驚ē考袂牢，問田醫師會當kā查某囝課業輔導--無？這个查某囡仔就是田孟淑小姐，機會難得，田醫師就馬上答應--ah！
老師學生鬥陣研究學問，日久生情，兩个人ê興趣kah價值觀仝款，情投意合，就開始談戀愛，嘛不管相差十六歲猶閣仝姓--ê。彼當陣，仝姓ê人bē當婚配，女方ê家長反對in兩个人交往，經過朋友、親情ê遊說，kā伊老爸苦勸講：「老翁(ang)疼tsínn婆，田醫師會kā恁查某仔疼命命--啦！」最後田先生答應至少mā愛高中畢業、滿二十歲以後才會使成婚。 人二室是抓耙仔
彼當陣是威權戒嚴ê時代，sì-kè 攏是抓耙仔，田醫師tī花蓮公立病院上班ê時陣，kah同事講tio̍h東京廖文毅發起台獨運動ê代誌，hōo人偷聽著，就去人二室報告。人二室是一个情報單位，tī每一个組織攏有派人tī 遐監視你ê思想kah行動。Hōo抓耙仔報去了後，田醫師就bē當去公家機關上班--ah。田醫師只好共伊ê田地賣掉，開一个私人診所。
反抗威權：kan-na beh講台灣話 自án-ne田醫師就開始無愛講北京話，kan-na講台灣話niā-niā，厝內底伊無tshāi電視，無愛hōo伊ê囝看電視，驚去hōo國民黨洗腦tio̍h。雙十節咱攏被迫愛掛車輪牌ê國旗，伊tō kā這个車輪牌ê國旗掛顛倒pîng。
食苦當作食補
田醫師過tio̍h一个清教徒彼款清苦ê生活，嘛教示家己ê kiánn-lî愛會當受苦，kā食苦當作食補，身軀頂bē使tsah買sì-siù ê錢。伊講mài食siunn好，若是hōo人抓去關ê時，按呢才ê慣習，伊不管時攏想著會予人抓去關。
長期關懷政治受難者
伊誠愛讀哲學ê冊，哲學ê理念kah修養對伊社會關懷ê工課有真深ê影響。彼當時，他對李萬居、郭雨新、雷震tsia--ê前輩攏足欣賞，尤其雷震是外省人，毋過對台灣民主ê活動有誠大ê貢獻。In兩个翁仔某對政治受難者tsiok 關懷。彼當陣，in ê診所tī-leh雙城街，定定有政治救援人士tī遮聚會，tsham-siông愛救啥人，in兩个翁仔某真勤儉，毋過對受難者攏出手大方。有一擺，in聽著鄭南榕(Nylon) ê雜誌社財務有困難，伊就趕緊去外面tsông-tsînn，去借一百萬交hōo Nylon。 Nylon講：「田爸爸，你做誠濟代誌，嘛需要用錢，你若予我遮ê錢，你手頭會誠ân--lah！」所以tō kā一百萬還予田爸爸。
田媽媽個性外向，真愛打抱不平，性情真活潑，每擺若有伊tī ê時陣攏ê帶動氣氛。自1986年開始，若有民主運動ê時，攏會看著伊tī第一線遐出現。每年中秋節，田媽媽攏會做月餅，送予遐ê良心犯；五日節攏愛包六百粒ê粽，送去牢房ê內面，予受刑者趁燒通食。田爸爸會曉講日語kah英語，語言對外聯絡幫助真大，經過伊ê tsáu-tsông，lán台灣人有tsi̍t-kuá 政治受難者，包括謝聰敏、魏廷朝，攏受tio̍h伊ê關心，ka-tsài 按呢才bē hiah-nī-á 艱苦。
八十年代末期，美麗島事件受難者，田媽媽定定去監獄共in 探監。
全美台灣人權獎ê得主
1991年，in兩个翁仔某，去予人選做全美台灣人權獎ê得主，得獎ê理由是in對抗威權統治，對台灣行向民主人權ê社會有誠大ê貢獻，田媽媽親身去Georgia, Atlanta 領獎，接受tio̍h在場台灣人o-ló ê pho̍k-á-siann、掌聲久久無停。
Lán beh tī遮對這个無私疼痛台灣六十年、真心大愛ê兩个翁仔某致敬。
編輯：沈宇蘋