top of page
Search

017 自學台灣史的一代宗師 曹永和

Updated: Nov 17, 2021


雖然學歷只有中學畢業,m̄-koh透過自學學會曉kuí-nā種語言,koh khah厲害--ê是,伊自學台灣史,最後提tio̍h中央研究院院士ê榮譽。這禮拜beh紹介ê是台灣史ê一代宗師,曹永和。 (看不懂台文? 點podcast我們讀給你聽)


文稿編寫:林琪蓁 校對:吳鈺瑾、陳翔容

真歡喜逐家來收聽「李講古,我來聽」ê節目,Tī拜二,聽台灣人ê故事。Lán這禮拜beh講一位自學台灣史研究ê一代宗師,伊無siánn-mih好學歷,suah成做台灣第一ê上出名ê宗師,tse tō是曹永和(Tsô Íng-hô)院士。

圖片來源:光華雜誌

書香世家ê落第書生 1920年,曹永和院士tī台北士林出世,老爸是士林公學校ê訓導,老母lóng總生7 ê查埔、6 ê查某。曹永和是大囝,細漢tō真愛讀冊,tī台北第二中學校畢業了後,因為身體多病,連suà兩擺lóng無考入去高等學校,當然mā無法度去讀大學--ah。只好去士林信用組合做書記,工作之餘發起「士林協志會」。這是士林地方人士何斌(Hô Pin)、陳泗治(Tân Sù-tī)、郭琇琮(Kueh Siù-tsong)、張鈺(Tiunn Gio̍k)、曹永和等憤怒青年推sak士林地方文化、反對皇民化運動ê組織。曹永和負責士林地方文史資料ê調查、展覽,koh kā報告發表ê工課。 曹永和tō kā tsia-ê報告投稿去台北帝大金關丈夫(Kaneseki Takeo)教授主編ê《民俗台灣》,真好運--ê hōo人採用,自án-ne,伊ê才華受tio̍h金關教授ê鼓勵,開始自學,行入去歷史ê khoo仔內。

1995年武陵出版社復刻版 (liap影:Yu-Ping Perng for 李講古我來聽)

1947.228事件了後 開始38年ê自學生涯

曹永和tsham士林協志會ê帝國大學醫科高材生張鈺學德文,張鈺真欣賞曹永和,tō kā女子學院畢業ê小妹紹介hōo伊。張若華(Tiunn Jio̍k-huâ)小姐是摩登ê時代女性,學院內ê風雲人物,提倡自由戀愛,拒絕爸母beh kā伊嫁hōo一位醫生ê安排,毅然kah落第書生、tī 信用組合食頭路ê小書記結婚。張若華ê兄哥張鈺被日本調去南洋戰爭ê時,不幸--ê戰死tī南洋。戰後反叛青年ê士林協志會tī白色恐怖中,郭琇琮被銃殺、何斌逃亡去中國、陳泗治音樂家bih去淡水山頂。真佳哉--ê曹永和tú入去台大圖書館做基層ê助理,避開了風波,tī tsia mā看tio̍h台大文學院院長林茂生(Lîm Bōo-sing)被掠ê經過。自án-ne伊不問世事,開始了tī圖書館潛心學習38年ê自學生涯。


lóng總學會曉十種語言 1947年,台大圖書館是採用最先進ê比利時研發ê國際十進位法文管理系統,若想beh tī tsia上班,一定愛學法文才會使。這時,國民黨堅持beh用中文ê管理系統,曹永和tō koh去學中文。台大圖書館管理系統tō有法文、中文,進步、落伍ê兩套系統。Lán台灣是多元ê社會,圖書館ê藏書有英、日、荷、西、法、德等等,若想beh tī tsia上班,一定愛kā以上ê語言學hōo好。經過暝日拍拚,真有語言天分ê曹永和lóng總學會曉十種語言。伊對航海交通史特別有趣味,寫ê心得報告「明代交通史」、「環東亞海域之國交流」投稿去台銀研究室周憲文發行ê《台灣銀行季刊》了後,周憲文iā請伊tàu整理《台灣文獻叢刊》ê出版。

倒爿起:吳密察老師、曹永和老師、鄭欽仁老師、黃富三老師合影佇臺大研究圖書館前

以個別指導學生為授課ê方式 1984年,台大本來無重視曹老師ê學術研究,m̄-koh不斷接tio̍h國際對曹老師ê肯定,tsiah醒--起-來知影伊是台大ê寶貝,台灣大學tō聘請曹老師為歷史系兼任教授。1985年,曹教授tī研究所開設台灣史專題研究,上課ê時歡迎任何人旁聽,其中以僑生、中國人、西洋人上濟,教室tō親像聯合國kāng款。曹教授依帝國大學授課ê方式,以個人指導學生為主,學生愛上台報告,kā報告寫做論文發表。這時ê台灣學運tú開始,本土意識開始發穎,這tsūn參加研修ê學生,以後lóng成做國家ê棟樑。

圖片來源:台大歷史系網站

夫人是成功ê背後上重要ê角色 1998年,曹教授得tio̍h台灣學術界上懸ê榮譽,受聘為中央研究院院士。上蓋歡喜--ê tō是包樂史,伊講tse是遲來ê正義,30年前tō應該提--tio̍h tsiah tio̍h。上拍損--ê是夫人過身去--ah,無法度聽tio̍h這ê好消息。夫人張若華,富貴千金、高學歷,不管爸母ê反對嫁hōo落第秀才,婚後照顧家庭、外出賺錢,支持翁婿ê學術志業。伊是學生、聽眾、助教,mā是秘書,若無夫人ê鬥相共,曹永和院士無可能成做一代宗師--ê。


2002年,荷蘭女王頒發奧倫治—拿騷勳章(Order of Orange-Nassau)。2009年,台灣大學授hōo名譽博士。2012年,日本頒發旭日章勳章。

Lán台灣本tsiânn tō是一个獨立ê歷史舞台,經過政權轉移、多元族群、海洋文化ê商貿活動等等ê交摻形成特有ê台灣文化。曹院士用「以地範史」提供了上有力ê武器來解決台灣kah中國ê關係,並且開拓以台灣為主ê國際空間。


多謝逐家的收聽,lán後禮拜拜二tsiah koh來坐。



30 views0 comments

Comments


bottom of page