文稿編寫：吳鈺瑾、校對：許倩瑜、林琪蓁
一百年前台灣就有一位思想前衛的出家人。後禮拜lán 欲來講，主張關懷農工、參與政治運動、性別平權，而且閣是詩人、思想家、佛教改革者毋過英年早逝的#證峰法師，林秋梧。 「看不懂台語文，讓李老師念給你聽，點這聽podcast」
作家、詩人、社會運動者、佛教ê改革者
「出家何必入山中，今古時潮盡不同。 」啥物人講佛學一定愛歸隱山林、食菜修行--neh? 真正ê佛學修行是tī現實社會中khiā tī弱者大眾ê hit pîng去向強權抗爭--ê。這禮拜二咱beh紹介ê人 tō 是台灣ê革命僧人林秋梧先生。 逐家好！我是李贊星。真歡喜逐家來收聽「李講古，我來聽」。
Lán今仔日tī拜二聽台灣人ê第五个故事時間，是beh講林秋梧（Lîm Tshiu-ngôo），台灣ê革命僧，證峰法師。
林秋梧是台南人。1903年出生tī日本統治之下ê台南。Tī台南第一公學校上課了後，林秋梧lóng會koh走去漢學仔先hia學讀漢字。這款ê磨練對後來tsiânn-tsò詩人，詩詞ê創作有tsiânn大ê pang-tsān。
受台灣文化協會的啟蒙
因為有漢學仔基礎，林秋梧tī 1918年考入去台灣總督府國語學校，準備beh做日語ê老師。Tī台北讀冊ê時陣，熟似著大稻埕ê蔣渭水醫師，mā定定hām台灣文化協會ê先進交往，思想起了變化。當時，世界思想潮流是社會主義、無產階級鬥爭，tsia--ê思想影響著全世界ê人類。1922年，19歲ê林秋梧參與台北師範抗議活動ê學潮。雖然tshun 十一工tō畢業，m̄-koh iáu-sī去hōo學校勒令退學。林獻堂先生the̍h錢beh pang-tsān 伊去日本留學，但是做tsi̍t ê 散赤囡仔ê林秋梧，m̄ kánn得著tsiah-nī大ê恩情，只好kā林獻堂先生ê好意拒絕掉。
愛看冊閣口才好bat做過電影辯士
紲--落-來兩冬，林秋梧sì-kuè食頭路。M̄-koh，因為定定tī厝看冊看kah入神，袂記得去上班。頭路換了koh再換。1924年，21歲ê林秋梧去中國廈門大學哲學系求學，mā有tī集美中學兼差教冊。1926年，23歲時，林秋梧因爲老母過身轉來台灣。彼當時，伊參加台灣文化協會ê「活動寫真部」，做「美台團」ê電影「辯士」。「辯士」就是搬電影ê時陣，電影ná搬，hit ê tī 邊仔ná解說劇情ê人。林秋梧口才tsiânn好，不時koh會加參tsi̍t-kuá-á民族意識觀念tī內底，啟發著市民對台灣文化ê認識。
文協分裂影響伊beh出家ê決心
1927年，林秋梧24歲ê時，台灣文化協會由左翼份子連溫卿（Liân Un-khing）、王敏川（Ông Bín-tshuan）把持，行為舉止愈來愈極端，致使左派、右派分裂。林秋梧凊心，suah去台南開元寺剃頭、食菜，做和尚，投禮tī得圓和尚為師。同年4月，以開元寺練習生ê身份去日本ê東京駒澤大學學習禪學，拜禪學大師忽滑谷快天門下。 「和尚ài負責社會責任。」
1930年，27歲ê林秋梧完成學業，轉來到台灣。出任開元寺ê講師兼書記，並開設佛教講會，講授佛教ê哲學。證峰法師以入世ê精神當作修行，伊講：「和尚ài負責社會責任。」
第一、伊關懷工人、農民kah lán ê社會。參加「台灣民眾黨」，tō是政治組織；伊mā參加「台灣工友聯盟」，這是社會運動。
第二、伊依「唯物史觀」解放佛學，mā主張ài對抗佛教界ê腐敗kah過度ê迷信。另外，林秋梧主張女性kâng-khuán會使tsiânn sîng佛。
第三、創辦刊物《赤道報》。《赤道報》收錄著社會思想ê評論、文藝作品。伊認為淨土ê世界mā會當落實tī現實ê世界中。
英年早逝khiok-sī一生精彩 1934年，臨濟宗護國禪寺邀請證峰法師佈教，並做日語佛法ê翻譯。護國禪寺敬奉總督兒玉源太郎，tī佛教界地位崇高。證峰法師是唯一被邀請弘法ê台灣法師，可見伊hit-tang-tsūn-á tī佛教界ê地位。1934年，10月證峰法師因爲肺結核（hì-kiat-ha̍t、hì-lô、hai35 khe55 kha55 kuh3）過身，英年早逝。這位kiông beh hōo台灣人放bē記得ê作家、詩人、社會運動者、佛教ê改革者，性命雖短，khiok-sī一生精彩：無kiann-hiânn，無反悔ê改革kah反抗ê精神。
下面這首詩上會當代表伊期待台灣建立tsi̍t ê民主、樂利ê世界：
出家何必入山中，今古時潮盡不同。 悟到婆娑即淨土，降魔伏怪樂無窮。
Lán台灣經歷日本五十年ê統治後，已經tsiânn-tsò公義、法治、現代化ê社會，已經kah封建腐化ê制度，tàn-sak去pùn-sò-tháng--ah！M̄-koh，國民黨khiok再度引進漢沙文hi-bî ê思想，kah霸權ê清國文化再度引入台灣。Hōo台灣變做貪污、私利、鬥爭ê社會。這是拚心拚命、全心為台灣ê證峰法師萬萬tō想bē到ê社會現象。
多謝逐家收聽！Lán後禮拜二才koh來坐。