台灣現代化ê水道水設施是tī日治時代ê早期(1896年)，由臺灣總督府特別聘請英國人巴爾頓來臺灣，總督府mā派技師濱野彌四郎鬥相共--ê，in兩人為台灣ê水利建設貢獻真濟，mā影響後--來水道水系統ê發展。巴爾頓sī一个愛台灣ê蘇格蘭工程師，伊uì水源ê調查、水道ê設計開始做起，進行全臺灣ê水利衛生工程；台灣第一座水庫，暖暖水庫tō sī 巴爾頓為咱建設--ê，Hőng號做「臺灣水道水之父」 看不懂台文? 請點李講古我來聽的連結，用podcast講給你聽 (聽故事請點我)
文稿編寫：洪偉婷 校對：郭孟樺、劉嘉佳
台灣hōo清國治理ê時陣環境衛生tsiânn bái，傳染病滿四界，主要ê原因是因為一寡khah清氣ê深井(tshim-tsénn)、水泉lóng hōo好額人霸佔--去，一般百姓bô清氣水通lim，in干焦ē-tàng啉雨水、水窟á水iā sī河川水，而且人tsham精牲(tsing-senn)蹛鬥陣、koh bô排水ê設施，糞埽、垃圾（lah-sap）水窒tī門跤口規四界，所以malaria、cholera、黑死病誠流行。Hit陣ê台灣人平均歲數tsiah三、四十歲niā-niā，台灣mā hőng叫做「Tsiòng-lē之地」意思tō sī破病ê所在。
日本自1895年派兵來台灣接收所發生ê大細項戰事，軍士戰死ū 164人，m̄-koh tòo tio̍h傳染病死--去ê竟然ū 4,600人，猶有26,000人愛送轉去日本治療，公務人員便若愛去台灣就任，心内lóng真躇躊（tiû-tû）敢通去--neh？第三任ê台灣總督乃木希典tō sī án-ne想--ê，m-koh 伊tī老母ê鼓勵之下，老母mā beh tuè伊去台灣，伊才答應來台就任，不幸--ê是老母到台灣bô外久tō得tio̍h Malaria 過身--去-ah。
1887年東京帝國大學高薪聘請英國人Mr. Burton（巴爾頓）tī日本做衛生工程ê教師，伊sī都市供水kah排水道ê衛生工程專家，除了教冊以外mā四界去進行水道調查hām計劃，伊真緊tō迷tio̍h日本ê文化，mā娶日本人做牽手。1896年經由日本內務省衛生局長後藤新平ê推薦、總督桂太郎ê聘任，巴爾頓為總督府衛生工程ê顧問技師。
當時伊ê學生濱野彌四郎tú tuì東京帝大土木工程科畢業，mā tsham老師巴爾頓鬥陣去台灣。醫生後藤新平特別交代in到台灣愛趕緊鋪設水管線kah污水管路，消除流行病ê湠散(thuànn-suánn)。1896年8月師徒兩人先對臺北城內、大稻埕、艋舺ê排水工程提出調查報告，後--來tō開始做全台灣ê水道水供水調查ê規劃，提出一份報告交hōo總督桂太郎。1899年為tio̍h beh提供hōo國外船隻ê飲用水，tī基隆暖暖設立地下水淨水場，mā tī淡水水源地設立地下水淨水場，完成了滬尾水道，1902年基隆市區ê水道水系統完成了後，tō開始供應hōo市民飲用--ah。
1897年巴爾頓去台北水道水源地新店溪探勘ê時，不幸tòo tio̍h Cholera ，佳哉經過治療好去--ah；來台ê第三年，tī調查探勘ê時koh-tsài tì tio̍h Malaria，雖然趕緊kā伊送轉去東京治療，可惜--ê是病情惡化變做肝硬化，suah病死tī東京，tâi tī東京青山靈園。學生濱野彌四郎延續老師ê計劃開始工程ê建設，伊建議總督明石元三郎tī台北水道水源地khiā一尊巴爾頓ê紀念銅像，表揚伊tuì水道水、下水道規劃ê貢獻，尊稱伊sī「台灣水道水之父」。
1908年依照巴爾頓ê規劃，uì台北公館ê新店溪引水入山跤ê淨水廠，進行淨水處理後koh-tsài用抽水機抽去山頂ê配水池，借tio̍h自然ê重力流入去hōo用戶使用，這个系統提供出水量2萬噸，供應12萬人ê日常用水，自án-ne台灣行入現代化ê供水系統。1932年台北ê人口lú來lú濟，需要設立第二套飲水系統，tō kā大屯山竹仔湖、kah西帽山這兩位所在ê湧泉水khioh做伙，架設水管流向三角埔（天母）ê發電廠發電後，koh kā水送落去圓山ê水神社貯水池，經過明治橋（中山橋）送去市區各地；日本政府iā tī圓山設立水神社供市民參拜，保庇台北市民ê飲水衛生。圓山水神社經過90年ê歲月，見證了台灣水道水事業ê發展，台北市政府kā列為古蹟，紀念日本時代ê水道水工程建設對市民ê貢獻，m̄-koh ū一段時間自來水事業處kā改做敬拜中國ê水神——大禹治水ê大禹；這个古蹟tī 2017年hōo中華統一促進會成員張修嘉潑油漆破壞，現場iáu留落侮辱日本人ê字條，連保護水神社ê石頭狛犬mā拍毋見去。
Tī二次大戰期間，巴爾頓銅像kah tshāi tī台南山上淨水廠ê濱野彌四郎紀念銅像，lóng hōo日本軍方徵收去做軍事用品；2004年濱野彌四郎ê後代來台灣tshuē 濱野ê銅像，mā拜託台南縣政府鬥相共，lóng bô成功。
2005年ū藝術才情ê奇美企業董事長許文龍，感念tio̍h城市醫生濱野彌四郎，為台灣ê水道工程建設付出23年ê時間，替台灣消滅流行病ê貢獻，特別對照相片重新塑造半身ê銅像，捐hōo台南水道博物館；2019年日本ê人民團體「日本下水文化研究會」經過研究探討發現，英國ê巴爾頓對日本hām台灣ê衛生建設規劃貢獻誠大，逐年tī 8月5日巴爾頓做忌ê時lóng ē去東京青山靈園ê墓地祭拜，另外mā募款捐錢製作巴爾頓ê銅像，2021年3--月台灣、日本、英國ê政要tī台北參加水道水博物館巴爾頓工程師ê銅像揭幕儀式，另外，巴爾頓tī日本ê查某孫hām台灣駐日大使謝長廷，mā tī線頂同齊參加儀式。
2019年到今年2--月，武漢肺炎疫情造成4億2千萬人tòo tio̍h病症，690萬人死亡，全世界tú tio̍h遮爾嚴重ê人災事件，hōo咱koh khah體會--tio̍h公共衛生ê重要性，今仔日倒轉來看125年前巴爾頓hām濱野彌四郎為台灣ê公共衛生拍拚ê故事，hōo咱特別感覺ū意義--ê。
圖片來源： A：巴爾頓相片：wikipedia
C：濱野彌四郎相片
D：謝長廷獻花
E：巴爾頓銅像
G：濱野彌四郎銅像