毋知恁敢有聽過「二二八牽手護台灣 」？這是 2004 年彼陣，kā 咱臺灣人團結起來 ê 重要活動，我細漢 ê 時陣 mā 有去參加。今仔日 ê 「李講古我來聽」欲來講「二二八牽手護台灣 」ê 執行總幹事李應元先生 ê 故事，是啥物款 ê 因緣，hōo 這个學者一生投入為台灣獨立走傱 ê 志業？聽 suah 了後，咱 tō-ê 閣較了解這位勇敢 ê 台灣人--lo̍h。
(看不懂台文嗎? 從 podcast用台灣話聽台灣古)
文稿編寫: 李以如 校對：杜荷洲 陳亞彤 蕭如娟
李應元是1953年出世 tī 雲林崙背鄉 ê 客人家庭--ê。台中一中畢業了後，伊以第二名 ê 高分考入去國立台灣大學公共衛生系。若照伊 ê 分數，是會當讀醫學系--ê，m̄-koh 伊認為做醫生一擺干焦會當救一个人爾爾，若是做好公共衛生，卻是會當救無數人 ê 性命--ê。伊讀公共衛生系 ê 時，熟似著台中女中畢業, 以第一志願考入去同系 ê 黃月桂小姐。兩人後來 m̄-nā 是14年 ê 同窗，koh 是伊40外年 ê 牽手。同齊去哈佛大學讀醫療管理 ê 碩士，koh 做伙去北卡羅萊納大學提著醫療經濟 ê 博士。
北卡羅萊納大學是北美洲臺灣獨立運動 ê 大本營，tī 讀冊 ê 時，看著美麗島事件、林義雄家庭 ê 血案、陳文成教授 ê 命案等等 tsia-ê 代誌 ê 發生，hōo 李應元感覺有良心 ê 臺灣人，是袂當去放外外--ê，袂當無去插--ê。彼當陣臺灣 ê 民主運動發穎--ah，抗議獨裁 ê 行動不斷--ê 發生，mā 鼓勵著海外留學生 ê 戰鬥士氣，李應元 hām 郭倍宏 tō 帶領台灣留學生成立臺灣學生社。
列為海外 ê 烏名單 無法度轉去故鄉貢獻所學
1985年6月，李應元 hām 另外5位作者，合寫出版一本深入描寫海外臺灣獨立運動歷史 ê 冊 「風起雲湧」，hōo 美國國會圖書館編號收入館藏。1988年，李應元揣著南達科他大學教授 ê 頭路，隔轉年，koh 提著國立臺灣大學 ê 聘書。M̄-koh，伊 bat 做過全美台灣同鄉會 ê 副總幹事，hōo 國民黨政府點香做記號，kā 伊列為海外 ê 烏名單， m̄-nā 失去轉去母校貢獻 ê 機會，若是轉來臺灣，閣ē因為刑法100條 ê 叛亂罪 hőng 掠起來起訴。
闖關成功 戲弄國民黨
1990年郭倍宏接任「世界臺灣獨立聯盟」美國本部 ê 主席，李應元為副主席；兩人參詳了後，beh kā 獨立聯盟 tshuā 轉去臺灣。李應元首先偷渡到臺灣，化名「阿火」，靠著各方人士 ê 協助，tī 臺灣四界拋拋走，不斷--ê 發表行蹤、製造新聞，來呈現海外烏名單 ê 無合理。伊 kā hām 謝長廷立委合照 ê 相片寄去黨外雜誌發表，甚至去總統府頭前 hām 憲兵做伙翕相，tō 按呢戲弄國民黨政府14个月， tsiah tī 情治單位全面掠補之下，hőng 掠入去土城看守所。這个消息一傳--出-來，李鎮源院士、陳師孟教授、陳永興醫師、林山田教授等人馬上發起「100行動聯盟」，tī 總統府面頭前靜坐抗議，承受 tio̍h 鎮暴部隊高壓水道水 ê 衝擊；陳婉真女士 ê 絕食、郭倍宏 mā uì 美國轉來臺灣闖入海關，tsi̍t-kuá 事件造成社會 ê 轟動，加上各方 ê 走傱，最後促成刑法100條 ê 修正，李應元 mā uì 土城看守所 hőng 釋放出來。自按呢，主張臺灣獨立 ê 人毋免 koh 驚 hőng 起訴，海外烏名單 ê 勇士會當轉來去心愛 ê 故鄉，貢獻所學--ah。
當選立法委員 開始從政
1995年李應元 tī 新莊、泰山參加第三屆 ê 立法委員選舉，以高票當選，第四屆再度連任立委。2000年，陳水扁總統揣伊做駐美國 ê 副大使。2001年 ê 游錫堃內閣 kah 2005年 ê 謝長廷內閣，lóng 借用應元靈活 ê 手腕 kah 協調 ê 能力，請伊做行政院 ê 秘書長。李應元為人熱情，平時 lóng 是 tshiò-bún-bún--ê，伊記持特別好，便若 hōo 伊見過兩擺 ê 朋友，伊 tō 會當叫出 in ê 名，伊 hőng 叫做「人人好先生」，民進黨 ê 各派系 lóng 佮伊有交情，甚至藍營 ê 人士 mā 真尊重伊。
2002年，李應元 hőng 徵召參加台北市長 ê 選舉。Tī 這个艱難地區，應元提出來 ê 主要政見是beh kā 松山機場 suá 走，中山區、松山區相接--出來 ê 土地會當做科學園區 kah 大巨蛋體育館, tshun-ê 土地會使做超級 ê 森林公園，hōo 臺北市民有一个呼吸新鮮空氣、tháu-pàng 心靈 ê 所在，這个有創意 ê 政見 hōo 學者非常肯定。可惜--ê 是，李應元選輸 hōo 馬英九，這个被肯定 ê 遠見，到今 iáu-是石沉大海。
策畫〈牽手護台灣〉活動
2003年，李應元 tī 民調中發現，beh 連任總統 ê 陳水扁民調竟然落後連戰 kah 宋楚瑜 ê 組合30%以上，非常 ê 不利。伊想著：佇1989年，波羅地海三國 ê 人民，bat 手牽手形成600公里長、通過三國首都 ê 「自由人鍊」，向全世界宣示欲脫離蘇聯統治 ê 決心，mā 鼓舞全民以堅定 ê 選票否決蘇維埃議會；若是 tī 臺灣，逐家手牽手心連心--ê 成做一條人鍊，mā 會使呈現臺灣人民 ê 力量。算起來，siōng 少 mā 愛動員50萬以上 ê 民眾才有法度完成，李登輝前總統更加裁決愛加碼動員100萬以上 ê 民眾，kah 這个任務交 hōo 「二二八牽手護台灣」 ê 執行總幹事李應元來負責。為著 hōo 這條人鍊牽 hōo tiâu，李應元 kā 活動 ê 總部設 tī 苗栗，請李前總統佇遐現身，吸引民眾。抑若屏東 lò-lò-tn̂g ê 海岸線--neh？好佳哉有民眾自動自發，tshiànn 30台 ê 遊覽車前往支援。總部為著欲節省義工 ê 便當開銷，kā 活動時間訂 tī 食晝飽以後舉行，伊提陳明章作曲、作詞 ê 歌曲「伊是我 ê 寶貝」做活動 ê 主題曲，佇四界放送，hōo民眾通好練習。
2004年2月28日，天公伯仔有保庇，天氣 tsiânn 好，有200萬 uì 四面八方來 ê 台灣人民自動自發--ê khiā--出-來，uì 基隆和平島到屏東鵝鑾鼻形成500公里長 ê 人錬，作伙唱出「伊是我 ê 寶貝」動人 ê 歌聲。李應元 kā 電視公司 ê 轉播車分配去20个無 kāng ê 所在，hōo 全國 ê 民眾即時--ê 看著各所在 ê 活動現況，mā 委託民間 ê 公司佇各地攝影，留落來珍貴 ê 紀錄。直升機飛過頭殼頂 ê 時，民眾 lóng 會 ia̍t-手致意、歡呼。最後，李登輝前總統 kah 陳水扁總統 ê 出現，再度引起ㄧ波高潮kah pho̍k-á-siann; 歌聲、笑聲傳遍台灣各地，向全世界展現出咱台灣人對未來 ê 信心。李應元完成這个空前絕後 ê 任務了後，伊講伊歡喜甲連作夢 mā teh 笑。
「二二八牽手護台灣」 ê 活動了後，陳水扁總統連任，koh-kah 堅心--ê 推-sak台灣文化，伊認為每一个鄉鎮 lóng 是上有特色 ê 寶貝，幫贊地方發展經濟、發揚地方 ê 文化，hōo 每一个人以身為地方 ê 一份子感覺驕傲。陳水扁總統 mā 加強推 -sak 台灣認同，由教育部長杜正勝推行同心圓教育政策, uì 社區、地方、城市、國家、世界 ê 順序來認 bat 歷史，增加學生對台灣 ê 認 bat 和認同。杜正勝部長 mā 佇2006年制定台語文 ê 標準用字 kah 台灣羅馬字拼音系統， hōo 學生方便--ê 學習本土語言。這个台灣語言標準化 ê 建立，對咱推-sak 台語有莫大 ê 貢獻，毋才有你這馬收聽 ê 「李講古，我來聽」 ê 節目。
2016年，李應元被任命環保署長。虔信佛教 ê 伊鼓勵逐家愛燒有符合環保標準 ê 好香，拜神明時，心香一欉 tō 好，心誠著靈；培墓 ê 時，mā 莫燒金紙以避免山林著火燒; 若是一定愛燒，金紙 tō 愛買品質較好 ê 本地金紙。可惜，2018年應元無達到家己要求 ê 空氣品質指標，suah 辭去環保署長 ê 職位。
2020年，蔡英文總統親身去拜託彼陣身體已經無偌好勢 ê 李應元出任駐泰國 ê 大使。一年後，伊發現身致著壺腹癌，緊 tńg來台灣醫治。2021年11月，佇昏迷一個月了後，這位勇敢對抗威權 ê 烏名單勇士過身--去-ah，享年68歲。伊綴聖嚴法師以環保自然 ê 方式樹葬。夫人黃月桂講，應元一生對生命正面，樂觀 ê 看待，希望逐家會記得伊樂觀 ê 笑容。 M̄-nā 按呢，伊對民主、自由 ê 信仰勇氣，mā 會留--落-來 hōo 後代人做學習 ê 典範。李應元，多謝你!
相片來源：李應元面冊 https://www.facebook.com/LoveYingYuan/