鄧麗君、江蕙翻唱--過ê雨夜花，國小音樂課本內底教ê望春風，tsia--ê歌原唱者是啥物人？
文稿編寫：郭孟樺 校對：洪偉婷、郭怡婷
純純ê本名是劉清香， 1914年出世tī 台北大稻埕城隍廟對面ê巷仔內， 爸母是開麵店仔--ê。城隍廟定定有人還願， 會請歌仔戲班來謝神；便若有戲班起鼓kah鼓吹歕--出--來ê聲音，會hōo tng-teh洗碗ê清香無心作穡(tsoh-sit)， 兩粒目睭向向(ǹg-hiòng)戲棚。伊上佮意(kah-ì)小生ê扮相kah小旦溫婉ê歌仔調，戲棚頂所有ê一舉一動lóng會吸引著伊ê注目。清香是厝裡--ê獨生女，13歲ê時，伊不管爸母ê反對，猶袂完成公學校ê學業，tō 走出去kah 歌仔戲班學戲。
俗語講：「無捨施，送囝去學戲！」tō是欲表達彼當陣，tī戲班生活是足艱苦--ê。
旋登歌仔戲當家小生 甚至錄曲盤
清香ê聲喉亮， 身段koh好，尤其是扮小生特別緣投、飄撇， 兩年後tō成做戲班內ê當家小生， 迷倒袂少ê女戲迷， 四界來ê女戲迷會jiok到清香演出ê所在。15歲，清香加入去小鳳園歌仔戲班ê時， hōo 日蓄(thiok)曲盤唱機會社，聘請去日本灌錄歌仔戲ê曲盤。伊用清香ê本名， 唱出新款ê歌仔戲。伊歌聲優美， 豐富ê聲調變化， 一直是日蓄會社栽培ê對象。
唱映畫「桃花泣血記」主題曲tshìng(衝)起來 1933年上海聯華電影公司發行烏白默片(bi̍k-phìnn)「桃花泣血記」(thô-hue khip-hiat-kì)欲tī大稻埕ê永樂座上演。為著欲宣傳電影，電影公司邀請大稻埕出名ê辯士詹天馬作詞， 共樂軒西樂隊ê指揮王雲峰譜曲， 創作電影ê主題曲，主題曲ê主唱tō-sī當時上出名ê歌仔戲歌手清香。歌名「桃花泣血記」ê歌詞是沿用電影ê情節，描寫一个富家子弟愛著散凶ê看羊女子「琳姑」ê悲情故事。歌詞雖然是傳統ê七字調仔，改名做純純ê歌手，卻唱出歌仔戲哭調ê新式唱法。歌詞內底寫tio̍h：「戀愛無分階級性，第一要緊是真情」這種「新思潮、新觀念、自由戀愛」ê劇情，吸引著tsē-tsē ê青年男女觀眾。
無聲電影主要愛靠辯士來配音， 伊是幫贊觀眾了解劇情ê解說員，愛有好ê口才， 有通天文地理ê才調， 票房ê好䆀lóng sī愛靠辯士--ê；辯士會tshuā 五个樂手到現場演奏，製造音響效果，帶動電影ê氣氛。公司kā五个樂手送去永樂町kā太平町沿街演奏， siânn 人客入去戲院看戲。Tuè著電影ê出名，主題曲lú來lú受歡迎。日本人開ê「古倫美亞曲盤會社」看著商機tō請純純kah樂手去日本錄音，灌第一塊台灣ê流行歌曲盤，受著市場大大ê歡迎，意外--ê竟然賣出六萬外塊曲盤，甚至銷去到東南亞，mā捀紅著純純。
早期台灣民間khah tsē-lâng 傳唱ê音樂，主要以南管、北管、歌仔戲iah-sī挽茶歌為主，「流行歌」算是一種新ê試驗。曲盤發行ê成功大大提升公司ê信心，tō決定欲擴大陣容矣， in請作詞ê李臨秋、周添旺，作曲ê鄧雨賢，mā聘請純純、愛愛兩个專屬歌星，koh成立文化部beh提懸曲盤ê水準。Uì 1932年到1939年期間，有30首ê台灣歌曲lóng是配合著電影ê宣傳來發行--ê，遮--ê歌大部份lóng是由純純主唱。純純受過歌仔戲ê訓練，tī歌曲中感情會當收放自如。純純hām作曲家鄧雨賢有真tsē ê合作， 逐塊曲盤lóng誠受歡迎；上出名ê「四月望雨」，tō-sī四季紅、月夜愁、望春風、雨夜花。純純灌錄ê 70外塊曲盤，逐塊銷路lóng真好。伊是台灣流行歌壇ê大牌歌星，無人通好kah伊比平--ê；同時純純猶閣用清香ê名tī-leh 灌歌仔戲ê唱盤，伊是跨越流行歌kah歌仔戲兩項領域ê雙料明星。
新女性先鋒 開咖啡廳談自由戀愛
外表清純、個性條直，不時仔會流露出天生ê憂愁感ê純純，伊一心leh期待愛情， bat主動追求鄧雨賢老師， m̄-koh老師已經是有家庭ê人， 拒絕純純ê愛情。純純tī台北後車頭新舞台ê斜對面開一間咖啡廳，內部裝潢tuè 著時代，音響koh特別講究，咖啡廳有大牌歌星純純知名度ê加持，生理是插插插。有一工，咖啡廳來一位tī帝國大學讀冊ê學生，伊真kah-ì這間咖啡廳ê氣氛，熟似頭家純純了後，tō定定來遮lim 咖啡；經過交談，兩人互相有意愛情投意合，多情、滿面春風ê純純接受這段感情後。純純tō tú-hó tuè tio̍h時代，行--入-去自由戀愛ê時行--裡。這段姊弟仔戀情hōo對方ê爸母反對，認為兩人ê學歷差siunn tsē。男方是tī社會上有名望ê家庭，袂當娶一个搬戲--ê，唱歌查某做新婦，堅持反對in兩人做伙，只好宣告結束這段關係。這段感情tō親像「桃花泣血記」電影中ê劇情，富家子弟hām看羊ê女子袂當有結局仝款。
嫁日本人白石先生
聽講純純tī學歌仔戲練武ê時傷著一蕊目睭，所以有一蕊是tàu假--ê。伊自細漢tō有自悲感，tī搬愛情劇ê時，lóng會kā家己投入腳數(kioh-siàu)內底，享受著短短ê愛情；伊向望tī現實生活中發生ê愛情，會當彌補伊空虛ê心靈。按呢不斷kā家己催眠ê結果，tō發生一段不顧一切追求愛情ê後果。純純愛著一个來店裡消費ê日本人白石先生，tī白石ê追求之下，純純kah白石先生結婚。煞毋知白石是一个欲食毋討趁ê人，而且伊koh是已經得著肺癆ê病人。彼時tòo著肺癆是無藥通醫--ê，真有可能會去hōo伊uì--著。雖然老母kā親友lóng苦勸(khóo-khǹg)伊離開白石，m̄-koh純純認為以伊ê財力，會當tshiánn好醫生kā翁婿ê病醫好，而且白石對伊真好，純純tō按呢一直活tī家己編織ê幸福美夢中。
使性地致使失去性命
白石先生過身--去-ah！照當時日本時代ê慣勢，肺癆病人斷氣ê時，愛煎卵kā亡者ê鼻、喙khàm tiâu leh，來防止病菌ê湠開；m̄-koh 純純tsiânn毋甘白石ê離開，去kā翁婿tsim koh kā伊lám-tiâu-tiâu，見景傷情suah放聲大哭，致使吸入大量肺癆ê細菌，純純mā染著肺癆。
1937年日華戰爭爆發，因為皇民化運動ê政策，限制台語ê使用，曲盤會社配合戰爭，改變創作風格。純純tō離開古倫美亞，去「日東曲盤會社」做一个臨時ê歌手。M̄-koh tī二次大戰ê亂世之下，生活物質欠缺(khiàm-khueh)，民眾mā無才調去買曲盤來聽，純純ê收入tō減真tsē--去， ka-siōng第三期肺癆ê身體，唱歌lóng走調去。29歲ê純純tō安詳--ê離開人間，結束伊短短燦爛ê人生。
後--來， 日本tī二次大戰中失利，為著欲鼓勵khah tsē 台灣人去前線做兵。日本軍方kā純純唱紅ê「四月望雨」四季紅、月夜愁、望春風、雨夜花等哀愁ê歌曲，改做快版、激動、振奮人心ê軍歌。
流行歌開基祖精彩人生
純純ê一生tō親像「雨夜花」這條歌仝款：「花落塗！花落塗！有啥人通看顧？無情風雨，誤阮前途，花蕊若落欲如何？」伊一生演唱無數ê愛情歌， suah lóng無得著愛情。
仝彼个時期台灣人會欣羨tī中國有白光、周璇這款超級巨星，tī日本有一位出色ê歌星李香蘭；m̄-koh 攏毋知咱台灣bat出一个紅遍全台灣，發行曲盤無數ê大牌明星純純，純純解說歌曲ê能力、唱出優美音韻ê才調、天后級ê天生光環，是絕對袂輸中國kah日本任何ê藝人--ê！ 相片來源：國家地理雜誌