文稿編寫：林琪蓁 校對：吳鈺瑾、許倩瑜
用三十年ê心血編《台日大辭典》ê小川尚義（Sió-tshuan Siōng-gī, Ogawa Naoyoshi） 「看不懂台語文，讓李老師念給你聽，點這聽podcast」 毋管父母反對 決心去台灣
1896年日本領台第二年，小川尚義先生tī東京帝國大學文學部語言科畢業。伊上課ê時陣bat聽tio̍h老師上田萬年講，學台灣話tuì漢語ê研究有真tsē pang-tsān，伊tō有去台灣ê phah-sǹg。 Hit當陣仔第一任ê台灣總督樺山資紀想講：台灣人lóng是講北京話。Tō tshuā 成百位北京話專家，鬥陣到台灣。Tsiah發現台灣人bē-hiáu講北京話，而且in有二十幾種話teh流通。樺山資紀知影beh hōo四百萬ê台灣人學國語（日語）是真困難ê代誌，不如編輯一本正確ê、對譯ê辭典，kā日語kah台語互相翻譯，所以總督府ê民政廳tō邀請語言專家小川尚義來台灣協作編輯辭典。但是小川ê爸母反對，因為幾個月前，有六个日本老師被殺害。M̄-koh小川真kah-ì台灣多元語言ê環境，伊tō無顧tio̍h爸母ê反對，來台灣就職。
毋驚危險 sì-kè去做田野調查
小川尚義嚴守學術田野調查ê方法，一步一跤印，sì-kè去做田野調查。有當時仔，一个人到深山林內。hit當陣仔lán台灣ê治安無 kài guā好，定定聽tio̍h日本人被殺害ê新聞，所以tī tsia做田野調查是一項真危險ê工課。
小川翻譯杜嘉德（Carstairs Douglas）牧師所編ê《廈英大字典》。內面收tio̍h泉州腔、漳州腔、廈門腔ê差別，對小川tī台灣做語言工課有真大ê pang-tsān。1907年，第一本ê《日台大辭典》完成，這時，伊ê任務應該是完成--ah，但是伊對高砂族ê語言tsiânn有趣味，tō繼續留--落-來做研究。
第一ê研究平埔族語言ê學者
小川尚義mā是第一ê研究平埔族Pazeh（巴宰語）ê學者。1930年，出版Paiwan（排灣）語ê語集，koh去hőng聘任做tú開始設立ê台北帝國大學語言學ê教授。 1931年，出版Atayal（泰雅）族ê語集、《台日大辭典》上冊；1932年，出版《台日大辭典》下冊。這本台灣語言學ê舊作，攏總收錄tio̍h九萬條詞條，包括台語、客語、華語、南島語。伊用日語ê五十音做主音，台語kah日語互相翻譯。這本辭典收集學術性ê用語、地方仕紳ê用語、平民百姓、凡夫走卒ê話語，到tshò-kàn la̍k-kiāu ê話mā lóng有收錄--起-來。這本辭典用三十年ê心血記錄tio̍h台灣ê語言kah文化，ē-sài講「前無古人，後無來者」。
《台日大辭典》已經由台語運動家林俊育（Lîm Tsùn-io̍k）翻譯tsiânn-tsò台語文，方便逐家tī線頂使用（https://taigi.fhl.net/dict/）。 《原語台灣高砂族傳說集》
1933年，小川出版Amis（阿美）語集。1935年，用十二種高砂族語出版驚世之作——《原語台灣高砂族傳說集》，得tio̍h日本文部科學省ê文史賞，mā去hōo日本學院選入去做院士。1935年，告老還鄉，離開有四十年感情ê台灣，去四國松山市。1938年，tī日本，伊mā繼續整理田野調查後ê文稿，陸續出版。有高砂族語言分佈圖、台灣語言使用分佈地圖，mā修訂《台日大辭典》。
著作成做後世研究南島語言的寶藏
1970年，世界當leh時行研究南島語言ê時陣，小川尚義南島語言ê研究hōo美國南島語專家Mr. Isidore Dyen發現tio̍h，kā i隆重紹介hōo世界ê學者，自án-ne，台灣ê南島語言tō行出世界，受tio̍h國際學者ê認同、重視。美軍轟炸東京ê時陣，小川ê住地mā受tio̍h災厄，好佳哉，大部分ê資料lóng已經存放tī東京外國語大學亞非語文化研究所保留。台灣ê語言學者每年mā lóng會去hia做研究、收錄。部分流傳tī民間ê資料，mā由台大圖書館買--起來收藏。
小川尚義用一生ê青春kah心血，用上tíng-tsin ê態度、上嚴肅ê研究成果，留hōo台灣一份豐富ê文化財產。Lán tī tsia來kā伊行禮、說謝。
Lán後禮拜二tsiah koh來坐！