王井泉(Ông Tsińg-tsuân)先生，是台灣文化 ê 奉獻者。伊是tsi̍t-ê 餐廳 ê 頭家，這間餐廳tī 30年代台灣suah變做文化運動ê 發源地。
文稿編寫：陳翔容 校對：林琪蓁、吳鈺瑾
酒家經理的經歷
王井泉先生sī 1905年 tī 台北市出世。Uì 大稻埕 ê 太平公學校升入去台灣商工學校，出業(tshut-gia̍p)āu 先 khì 鈴木商店機械部服務。27歲 ê sî ū tsi̍t-ê 機緣 khì kàu 維特咖啡廳上班，這是台灣第一間咖啡廳，m̄-koh hit 當時á 台灣人iáu-koh m̄-tsai-iánn siánn-mih 是咖啡？生理tsiânn bái，頭家 tō kah改做ū查某陪酒 ê 維特酒家，酒家內美女如雲，四界lóng是芳貢貢 ê 粉味，這iā sī 台灣第一間ê 高級酒家。身為酒家經理 ê 王井泉身穿白色 ê 西裝，川流tī 人客 kah 酒女之間，無閒tshih-tshah，生理沖沖滾，這 mā hōo 王井泉thàn-tio̍h bē少 ê 錢，m̄-koh 伊對酒場 ê 虛華 kah 無情 ê 歲月並無留戀，tō照進前kah 頭家ê約束，服務三年liáu-āu，離開了維特酒家。
純粹(sûn-tshuì)台灣味 提倡大菜mā ē-sái小食
1939 tī延平北路二段開設一間純台灣茶館「山水亭」。山水亭 ê 裝潢tsiânn ū台灣khuì-kháu，餐具 kah 排盤 mā sī ū台灣味--ê。上蓋出名 ê 菜是東坡割包、鳳尾蝦、脆皮雞、紅悶魚翅、燒賣、掛爐全鴨等等。山水亭無beh kiânn高級消費ê 路線，in 推出5 碗 3 khoo，3碗2 khoo ê定食，推出大菜mā ē-sái小食 ê 策略，真緊tō吸引tio̍h 台灣人kah 日本人 ê 胃口，生理tsiânn好，人客是tshah-tshah-tshah。Tû-liáu口味以外，伊mā 重視飯桌頂 ê 服務，上菜、收盤，應對ê 動作lóng ū受 tio̍h嚴格 ê 訓練。王井泉 tō是beh kā傳統路邊擔 á 食品提升到ū水準 ê 餐飲文化。山水亭出名liáu-āu，tit-tio̍h台北siōng 出名ê 辦桌大總舖師張萬火（Tiunn Bān-hué）先生主動lâi 投靠山水亭，伊甘願放棄辦桌 ê 生理，來做tsi̍t-ê ū體面ê 「山水亭頭師」。
自án-ne，山水亭mā接受大型 ê 宴會，tī 料理界tsiânn 做四大料理店之一。另外--ê 是蓬萊閣（Hông-lâi-koh），江山樓（Kang-san-lâu），東薈芳 （Tong-kuè-hong）。 品味獨特 藝術家ê知音
王井泉本人愛音樂，收集tio̍h全集 ê 西洋古典唱盤。師兄弟廖永來（Liāu Íng-lâi）開ê 波麗路（Pho-lē-lōo）西餐廳，tī tsìn-tsîng ê 時生理tsiânn-bái，經營困難，想 beh kah放棄。Hó-ka-tsài經過王井泉 ê 鼓勵，送伊全套 ê 古典音樂唱盤，到tann lán tsiah iáu-ū一間出名 ê 西洋古典音樂西餐廳thang khì。 伊會曉彈gih-tah、曼陀鈴（mandolin），愛讀文藝作品，mā 真愛puann 新劇。Bat ū tsi̍t-pái 星光演藝團khì 宜蘭表演「火裡蓮花」，tī 劇中王井泉扮演tsi̍t-ê 阿舍，四界khì 戲弄查某囡仔ê kioh-siàu，因為表演真逼真，suah khì hōo 台跤 ê 庄跤人衝khì 台頂 kā伊tsing。 名家雲集 流連忘返
山水亭不時 á tō ū 出名人士khì kàu in 半樓 á ê 樓栱聚會，ū林茂生（Lîm Bōo-sing）、陳逸松（Tân I̍t-siông）、黃啟瑞（N̂g Khé-suī）、呂赫若（Lū Hik-jio̍k）、呂泉生（Lū Tsuân-sing）、吳新榮（Ngôo Sin-îng）、楊三郎（Iûnn Sam-lông）、張文環（Tiunn Bûn-khuân）、王昶雄（Ông Tshióng-hiông）、巫永福（Bû Íng-hok），iáu ū台陽美術協會 ê 畫家，mā ū不滿日本至上主義ê 日本學者，人類考古學家金關丈夫（Kanaseki Takeo, Kim-Kuan Tiōng-hu）、台灣帝大文學部長矢野峰人（Yano Hōjin, Sí-Iá Hong-jîn）、德川文學家瀧田貞治（Takita Teiji, Lông-Tiân Tsing-tī）、民俗學家池田敏雄（Iketa Tosio, Tî-Tiân Bín-hiông）、畫家立石鐵臣（Tateishi Tetsuomi, Lı̍p-Tsio̍h Thih-sîn），lóng不時á ē tī山水亭高談闊論，談古論今，評畫賞文，三不五時mā ē tsiap tio̍h 頭家 ê 料理招待。
慷慨資助有猶未出名的藝術家
若ū 學生 á beh khì 日本留學，當teh 等船期 ê 時，王井泉mā ē大方邀請in 來山水亭免費寄食。Ū-tang-sî-á 少年家手頭khah ân，無夠錢thang-hó la̍p 學費，伊mā ē 提錢kā in tàu-sann-kāng。1939 年入選帝展 ê 雕塑家陳夏雨（Tân Hā-ú），音樂家呂泉生lóng bat siū tio̍h 伊 ê 照顧。 幫贊《台灣文學》運作出版
1941年台灣作家想beh 編輯出版《台灣文學》雜誌，來塑造台灣人ê 文藝思想kah 意識，反應日本皇民化運動之下ê 苦悶 kah無奈。這本雜誌是由張文環主編--ê，文友陳逸松律師tī 財務上支援。M̄-koh iáu tshuē無人 thang 做出版、發行、場地管理 ê khang-khuè，siūnn-bē-kàu王井泉真爽快tō即時答應，鼎力相助。伊講 bē-sái hōo 日本人看無ba̍k-tē， hōo人看sue-siâu。《台灣文學》hōo 文人發揮ê 平台，tō 一期一期á 出版發行，山水亭ê 門跤口mā一直掛tio̍h 「台灣文學社」ê kha̋ng-pán。好客ê 王井泉名利淡薄，本身無文藝創作，m̄-koh 伊尊重文人、扶持文人，thàn 錢lóng提出來支持文藝活動。伊bat kā 契囝王古勳（Ông Kóo-hun）講精神層次ê 追求比物質ê 享受 koh-khah 重要。Thàn錢nā ē造福台灣人，比留 tī 身軀邊koh-khah ū 路用--ê。
戰後日本人離開suah無迎來好日子
1945 二次世界大戰āu，國民黨來台殖民，民眾雖然日子歹過，m̄-koh酒樓，舞廳khiok不時傳出笑聲kah歌聲。這種粉飾太平，社會失衡ê 現象，對正派經營ê 山水亭打擊tsiânn大，平民百姓無錢來山水亭消費，ū權ū勢 ê 特權份子，看山水亭無燈紅酒綠ê 風景，看伊無夠重。盛極一時ê 山水亭生理一落千丈，只好關門大吉。
俠客變做三頓困難ê 無業遊民
王井泉 tō由仗義輸財ê 俠客變做三頓困難ê 無業遊民，bat khì 中廣公司ê 宿舍kā 呂泉生借錢度日。Ka-tsài 文友辜顯榮（Koo Hián-îng）ê 第六囝辜偉甫（Koo Uí-hú）tī 下埤仔買一片土地，想beh khí 一座兒童樂園。Beh khí 兒童樂園tsìn-tsîng ài 先種花草、栽樹欉，先kā 花園先做--khí-lâi。伊聽講王井泉需要tsi̍t-ê 頭路，tō請伊來花園上班，栽花種樹。經過幾年灌溉、佈局，tsit-ê 花園suah變做收費 ê 榮星花園。人客來到tsit-ê 典雅、秀麗、花草青翠 ê 花園，殊不知sī iû一位出名餐廳 ê 文化園丁，流汗、留目屎，一點一滴栽培--khí-lâi--ê。 本土文學家藝術家背後的推手
王井泉先生是台灣人民ê 文化英雄，伊一生上大ê 夢想便是期待ū一工台灣ê 文化會超過日本。山水亭m̄-nā提升了台灣ê 飲食文化，mā成做30年代台灣文化運動ê發源地，tō 親像法國 ê 文化sa-lông 對西方文化運動 ê 貢獻仝款。Lán 30年代上重要ê文學家、音樂家、畫家、戲劇家lóng以山水亭做為in 精神ê tau。王井泉雖然有當時仔ē tuì 少年家大聲sàu，有khah嚴格一寡，m̄-koh伊mā盡可能對in 照顧， kā一碗飯分做三份kah少年人鬥陣分享， hōo in度過iáu-bē出名ê 艱難歲月。伊期待大稻埕ē-tàng kah西洋ê文藝復興互相連接，向望台灣ē-sái tsiânn-tsò 現代文明ê國度。誠可惜！伊終其一生ê向望，到tann iáu-bē實現。 圖片來源：莊永明書坊 《山水亭初探》-蔡淑滿 淺談日治末期的臺灣料理屋山水亭